Jenesis
Stori bilong Kein na Abel.
4
1Adam em i slip wantaim Ivi, meri bilong em, na Ivi em i kisim bel. Ivi em i karim wanpela pikinini man nem bilong em Kein. Na Ivi em i tok, “BIKPELA Em i helpim mi na mi karim wanpela pikinini man.” 2Bihain, Ivi em i karim narapela pikinini man nem bilong em Abel.
Abel i save lukautim ol sipsip na meme, na Kein i save klinim bus na wokim gaden. 3Na bihain, Kein em i laik mekim ofa long BIKPELA na em i go kisim sampela kaikai long gaden bilong em na em i kisim dispela kaikai i kam long BIKPELA. 4Tasol Abel, taim em i laik mekim ofa long BIKPELA, em i go kisim ol namba wan pikinini sipsip mama i karim na ol i gat gris moa yet, na em i kisim ol i kam long BIKPELA. Na BIKPELA Em i amamas long Abel na long ofa bilong em, 5tasol Em i no amamas long Kein na long ofa bilong Kein. Na long dispela as Kein em i bel hat nogut tru na pes bilong em i narapela kain.
6Orait na, BIKPELA Em i tokim Kein olsem, “Long wanem as yu bel hat? Na long wanem as pes bilong yu i narapela kain?” 7Sapos yu mekim pasin i stret, em nau, Mi bai orait long yu. Tasol, sapos yu no mekim pasin i stret, em nau, sin i stap klostu tru long yu. Sin em i laik winim yu olgeta, tasol yu mas winim em.”
8Na Kein em i tokim Abel, brata bilong em, na em i tok, “Yumi go long bus.” Na taim tupela i go long bus, Kein em i paitim Abel, brata bilong em, na kilim em i dai.
9Orait na, BIKPELA Em i askim Kein na Em i tok, “Abel, brata bilong yu, em i stap we?”
Kein em i tok, “Mi no save. Mi wasman bilong em, a?”
10Na BIKPELA Em i tok, “Yu bin mekim wanem? Harim, blut bilong brata bilong yu em i kapsait pinis long graun na em i krai long Mi. 11Nau yu bai kisim bagarap. Long han bilong yu yet, yu bin mekim em i dai na blut bilong em i kapsait long graun. Na long dispela as, nau Mi bai rausim yu long dispela gutpela hap graun bilong yu. 12Na taim yu wokim gaden long sampela hap, gutpela kaikai em i no inap kamap bilong yu. Yu no inap i stap gut long wanpela hap, nogat. Olgeta taim yu bai raun raun tasol.”
13Kein em i tokim BIKPELA olsem na em i tok, “Dispela pe bilong rong bilong mi em bai givim bikpela hevi stret long mi. 14Nau Yu rausim mi long gutpela hap graun bilong mi, na Yu lusim mi long aninit long lek bilong yu. Mi no inap i stap gut long wanpela hap, nogat. Olgeta taim mi bai raun raun tasol. Na ol man i lukim mi, bai ol i kilim mi tasol.”
15Tasol, BIKPELA Em tokim Kein, “Nogat. Sapos wanpela man em i kilim Kein, orait dispela man bai kisim bagarap moa moa yet.” Na BIKPELA Em i makim Kein long wanpela mak, na ol man i lukim Kein bai save na ol i no inap kilim Kein. 16Olsem na, Kein em i lusim BIKPELA na em i go raun nabaut long wanpela hap nem bilong em Nod. Nod em i stap long hap sait bilong ples Iden, long sait bilong san i kamap.
17Kein em i slip wantaim meri bilong em na meri bilong em i kisim bel. Na meri em i karim wanpela pikinini man nem bilong em Enok. Long dispela taim Kein em i wok long kamapim wanpela taun, na em i givim nem Enok long dispela taun, wan nem olsem pikinini bilong em. 18Na Enok em i karim wanpela pikinini man nem bilong em Irat. Irat em i papa bilong Mehujael. Na Mehujael em i papa bilong Metusael, na Metusael em i papa bilong Lamek.
19Lamek em maritim 2-pela meri. Ada em i nem bilong wanpela na Sila em i nem bilong narapela. 20Ada em i karim wanpela pikinini man nem bilong em Jabal. Jabal em i papa bilong ol dispela lain i save stap long haus sel na ol i save lukautim ol animal kain olsem ol bulmakau na sipsip na meme. 21Brata bilong Jabal em i Jubal, na Jubal em i papa bilong ol dispela lain ol i save mekim musik long harp na long flut. 22Sila em tu em i karim wanpela pikinini man nem bilong em Tubal-Kein. Na Tubal-Kein em i save wokim ol kainkain tuls long brons na long ain. Susa bilong Tubal-Kein em i Nama.
23Lamek em i tokim tupela meri bilong em olsem na em i tok,
“Ada na Sila yutupela harim tok bilong mi.
Tupela meri bilong Lamek harim dispela tok bilong mi.
Wanpela man em i paitim mi na long dispela as mi kilim em i dai.
Em i wanpela yangpela man.
24Na sapos wanpela man em i kilim Kein, na em i kisim bagarap moa moa yet,
orait, husat man i paitim mi, em bai kisim bagarap moa moa moa moa yet.”
25Adam em i slip gen wantaim meri bilong em na meri em i karim wanpela pikinini man nem bilong em Set. Na meri bilong Adam em i tok olsem, “Kein em i kilim Abel, tasol God Em i givim mi narapela pikinini man na em i senis bilong Abel.” 26Na Set em tu em i karim wanpela pikinini man nem bilong em Enos.
Long dispela taim sampela lain ol i tingting planti long BIKPELA na ol i krai long Em.
