Jenesis
1BIKPELA Em i tokim Noa olsem na Em i tok, “Insait long ol lain manmeri yu wanpela tasol, yu stretpela man long ai bilong mi. Olsem na yu mas go insait long sip, yu wantaim ol femili bilong yu. 2-3Yu mas kisim 7-pela man na meri bilong olgeta kain animal i klin long ai bilong Mi. Na kisim 2-pela man na meri bilong olgeta kain animal i no klin long ai bilong Mi. Na kisim 7-pela man na meri bilong olgeta kain pisin. Yu mas kisim ol, na ol bai stap wantaim yu, na bihain ol dispela kain lain ol bai stap yet long dispela graun. 4Taim 7-pela de em i kam i go pinis Mi bai salim ren na ren bai pundaun inap long 40 de na long 40 nait. Na olgeta samting Mi bin wokim na ol i gat laip i stap, em nau, Mi bai rausim ol long dispela graun.”
5Orait, Noa em i bihainim olgeta tok God Em i mekim long em.
6Taim bikpela tait i kamap long graun Noa em i stap 600 yia pinis. 7Noa, na ol pikinini man bilong em, na meri bilong em, na ol meri bilong ol pikinini man bilong em, olgeta ol i go insait long sip, bai ol i no ken i lus long bikpela tait. 82-pela bilong olgeta kain animal i klin long ai bilong God, na 2-pela bilong olgeta kain animal i no klin long ai bilong God, na 2-pela bilong ol kain pisin, na 2-pela bilong olgeta liklik animal i save raun long graun, olgeta i kam long Noa. 9Olsem na man na meri bilong olgeta samting ol i kam long Noa na ol i go insait long sip. God Em i bin tokim Noa pinis na ol i mekim olsem. 10Na bihain, taim 7-pela de em i kam i go pinis bikpela tait em i kamap long graun.
11Noa em i stap 600 yia pinis, na long de 17 long 2 mun – long dispela de stret, graun em i bruk nabaut, na wara i stap aninit long graun em boil i kam antap long graun. Na skai tu em i bruk na bikpela ren stret em i pundaun long graun. 12Na ren em i pundaun long graun inap long 40 de na 40 nait.
13Na long dispela de stret, Noa na 3-pela pikinini man bilong em, Siem na Ham na Jafet, na meri bilong em, na ol meri bilong ol pikinini man bilong em, ol i go insait long sip. 14Olsem na olgeta animal inap long lain bilong ol yet, na olgeta animal i stap long ples inap long lain bilong ol yet, na ol liklik animal i save raun long graun inap long lain bilong ol yet, na ol pisin inap long lain bilong ol yet, olgeta i stap wantaim ol lain bilong Noa. 152-pela bilong olgeta samting i gat laip i stap ol i kam long Noa na ol i go insait pinis long sip. 16Na ol dispela lain ol i man na meri bilong olgeta samting i gat laip, na ol i go insait pinis long sip. God Em i bin tokim Noa pinis na ol i mekim olsem. Orait, God em i pasim dua bilong sip.
17Orait na, bikpela tait em i wok long kamap long graun inap long 40 de, na taim wara em i kamap planti em i apim sip i go antap stret. 18Wara em i kamap planti stret long graun na sip em i go kam antap long wara. 19Na wara em i kamap moa yet na em i karamapim olgeta maunten bilong olgeta hap bilong dispela graun. 20Na wara em i wok long kamap moa moa yet na em i winim olgeta maunten inap long 7-pela mita.
21Olgeta samting i gat laip i stap long dispela graun, ol i dai. Olgeta pisin, olgeta animal i stap long ples, olgeta animal i stap long bus, olgeta liklik animal i save raun long graun na pulap long graun, na olgeta lain manmeri, ol i dai. 22Olgeta samting i gat laip i stap long dispela graun ol i dai pinis. 23Olgeta samting i gat laip i stap long em, olgeta samting long olgeta hap ol i lus pinis. Olgeta manmeri, wantaim olgeta animal, wantaim olgeta liklik animal i save raun long graun, wantaim olgeta pisin i save raun long skai, olgeta ol i lus pinis. Tasol Noa, em tasol em i stap – em wantaim ol lain i stap long sip.
24Na wara em i tait long graun inap long 150 de.
