Jenesis

¹Tasol, God Em i tingting long Noa na long olgeta animal i stap wantaim Noa long sip, na Em i mekim win i go kam antap long wara na wara em i isi isi na em i slek i go daun. ²Na wara i stap aninit long graun na em boil i kam antap God Em i stopim pinis, na bikpela ren i pundaun long graun em tu God Em i stopim pinis. ³Olsem na wara em i isi isi na em i slek i go daun. Taim dispela 150 de em i kam i go pinis, wara em i slek moa yet. ⁴Na long de 17 long 7 mun, sip em i sindaun long wanpela maunten bilong ples Ararat. ⁵Na wara em i wok long slek yet inap long 10 mun. Na long de 1 long 10 mun, het bilong ol maunten i kamap ples klia.

⁶Taim 40 de em i kam i go pinis, Noa em i opim wanpela windo em i bin wokim long sip, ⁷na em i lusim wanpela pisin nem bilong em kotkot, na kotkot em i go nabaut. Kotkot em i go i kam inap long dispela taim we graun em i drai pinis. ⁸Orait, Noa em i laik save olsem wara em i go daun olgeta o nogat. Na olsem em i lusim narapela kain pisin nem bilong em balus, na balus em i go nabaut. ⁹Tasol, dispela balus em i no painim wanpela hap graun we em inap sindaun, nogat. Olsem na wara em i stap yet, na balus em i kam bek gen long Noa. Noa em i tromoi han bilong em na balus em i sindaun long han bilong em, na Noa em i kisim em i kam bek gen insait long sip. ¹⁰Noa em i wet i stap liklik, na taim 7-pela de em i kam i go pinis, em i lusim dispela balus long sip, na balus em i go nabaut. ¹¹Na long apinun stret dispela balus em i kam bek gen long Noa, na long maus bilong em, em i holim wanpela nupela lip bilong diwai oliv. Em nau, Noa em i save olsem wara em i pinis olgeta. ¹²Orait, Noa em i wet i stap liklik yet, na taim 7-pela de em i kam i go pinis em i lusim dispela balus gen, na balus em i go nabaut. Tasol, balus em i no kam bek moa, nogat.

¹³Noa em i stap 601 yia pinis, na long dispela yia bilong em, long de 1 long 1 mun wara em i pinis olgeta. Noa em i rausim rup bilong sip na em i lukim graun, na em i save olsem graun em i drai pinis. ¹⁴Taim de 27 long 2 mun em i kamap, graun em i drai olgeta.

¹⁵Na God Em i tokim Noa olsem na Em i tok, ¹⁶“Yu mas lusim sip na kam autsait. Yu na meri bilong yu na ol pikinini bilong yu na ol meri bilong ol pikinini bilong yu, yupela olgeta mas lusim sip na kam autsait. ¹⁷Kisim olgeta kain samting i gat laip i stap na ol i stap wantaim yu. Kisim olgeta pisin na olgeta kain animal na olgeta liklik animal i save raun long graun, yu mas kisim olgeta i kam autsait. Kisim ol i kam na ol i ken kamap planti long graun na ol bai karim planti pikinini bilong ol na ol bai kamap planti stret long dispela graun.”

¹⁸Olsem na Noa em i lusim sip na em i kam autsait. Noa na meri bilong em na ol pikinini bilong em na ol meri bilong ol pikinini bilong em, olgeta ol i lusim sip na ol i kam autsait. ¹⁹Na olgeta animal, na olgeta liklik animal i save raun long graun, na olgeta pisin – olgeta samting i gat laip i stap long dispela graun – ol i lusim sip i kam i kam inap olgeta ol i kam autsait pinis.

²⁰Noa em i wokim wanpela alta bilong BIKPELA. Em i kisim sampela bilong olgeta kain animal i klin long ai bilong BIKPELA, na em i kisim sampela bilong ol pisin i klin long ai bilong BIKPELA, na em i kukim ol na mekim ofa antap long alta. ²¹Na BIKPELA Em laikim dispela ofa bilong Noa, olsem na, long bel bilong Em yet BIKPELA Em i tok olsem, “Mi no inap bagarapim graun gen, nogat tru. Taim ol manmeri ol i stap pikinini yet, ol i statim ol pasin nogut na ol i mekim i go olsem. Olgeta taim long bel bilong ol, ol i tingting tasol long mekim ol pasin i no stret. Ol i save mekim olsem, tasol yet Mi no inap pinisim ol, kain olsem nau Mi bin pinisim ol. Na Mi no inap pinisim ol kain animal na ol samting i gat laip, kain olsem nau Mi bin pinisim olgeta, nogat tru.”

²²“Taim bilong plenim na taim bilong kaikai,
taim bilong kol na taim bilong hat,
taim bilong san na taim bilong ren,
taim bilong nait na taim bilong san,
olgeta dispela samting Mi no inap pasim gen,
inap long taim graun em bai pinis olgeta.”