Jenesis
God Em i bihainim kontrak bilong Em.
9
1God Em i blesim Noa na ol pikinini man bilong em. Olsem na God Em i tokim ol olsem, “Yupela mas karim planti pikinini bilong yupela, na yupela mas pulap long dispela graun. 2Na olgeta kain animal, na olgeta kain pisin, na olgeta kain liklik animal i save raun long graun, na olgeta kain pis, ol bai pret nau long yupela. Mi givim olgeta i go long han bilong yupela. 3Na olgeta samting i gat laip i stap, Mi givim ol long kaikai bilong yu. Kain olsem long bipo Mi givim ol narapela bus samting long yu bilong kaikai, orait, nau Mi givim olgeta samting long yu bilong kaikai.
4Tasol, wanpela samting, blut em i samting bilong laip, olsem na, yu no ken i kaikaim mit i gat blut i stap yet long em, nogat. 5Tru, blut em i samting bilong laip, na sapos blut bilong wanpela manmeri em i lus, orait Mi bai mekim kot long dispela samting. Mi bai kotim animal i lusim laip bilong wanpela manmeri. Na tu, Mi bai kotim manmeri i pinisim laip bilong narapela manmeri.
6God Em i wokim ol lain manmeri wankain olsem Em yet,
na long dispela as,
manmeri i pinisim laip bilong wanpela manmeri,
orait, laip bilong em tu mas lus,
na em mas lus long han bilong manmeri.
7Tasol, yupela mas karim planti pikinini bilong yupela, na yupela mas kamap planti long dispela graun. Yupela mas karim planti lain bilong yupela na kamap planti long graun.”
8Na God Em i tokim Noa na ol pikinini man bilong em olsem na Em i tok, 9“Nau Mi bai mekim kontrak long yu, na long ol lain bilong yu i kamap bihain, 10 na long olgeta animal ol bin i stap wantaim yu – olgeta pisin, na olgeta animal i stap long ples, na olgeta animal i stap long bus, na long olgeta i kam autsait long sip wantaim yu – Mi bai mekim kontrak long olgeta samting i gat laip i stap long dispela graun. 11Na Mi bai mekim kontrak olsem – Mi no ken i pinisim olgeta laip gen long bikpela tait, nogat. Bikpela tait em i no inap kamap gen bilong pinisim olgeta samting bilong dispela graun.”
12Na God Em i tok, “Mi bai mekim wanpela mak, na dispela mak em i mak bilong kontrak nau Mi mekim long yu, na long olgeta lain i gat laip i stap wantaim yu, na long olgeta lain i kamap bihain. 13Mi bai putim renbo bilong Mi long klaut, na dispela renbo em i mak bilong kontrak nau Mi mekim long olgeta samting bilong dispela graun. 14Taim ol klaut ol i pas long skai na renbo em i kamap pinis, 15 orait Mi bai tingting long dispela kontrak Mi mekim pinis long yu na long olgeta lain i gat laip i stap long dispela graun. Na wara em i no inap tait gen olsem, na em i no inap pinisim olgeta samting bilong dispela graun. 16Taim renbo em i kamap long klaut Mi bai lukim em na Mi bai tingting long dispela kontrak i save stap oltaim oltaim. Mi bai tingting long dispela kontrak God Em i mekim long olgeta lain i gat laip i stap long dispela graun.”
17Olsem na God Em i tokim Noa olsem, “Dispela em i mak bilong dispela kontrak Mi bin mekim long olgeta lain i gat laip i stap long dispela graun.”
Ol pikinini bilong Noa.
18Nem bilong 3-pela pikinini man bilong Noa em i Siem na Ham na Jafet. Ol i bin i stap wantaim Noa long sip na ol i bin lusim sip wantaim Noa. (Ham em i papa bilong Kenan.) 19Dispela 3-pela lain bilong Noa ol i kamap tumbuna bilong olgeta lain manmeri i stap nabaut long dispela graun.
20Noa em i man bilong wokim gaden, na em i wokim wanpela gaden bilong kamapim ol samting bilong wokim dring wain. 21Wanpela taim em i dringim sampela wain na em i spak. Em i mekim olsem na em i go slip skin nating insait long haus sel bilong em. 22Ham em i papa bilong Kenan, na Ham em i lukim papa bilong em i slip skin nating long haus sel, na em i go mekim stori long dispela long 2-pela brata bilong em. 23Tasol, Siem na Jafet, tupela i kisim wanpela laplap na hangamapim em long sol bilong tupela yet. Tupela i tanim baksait i go long papa na tupela i wokabaut isi isi i go long papa na pundaunim dispela laplap bilong karamapim papa. Olsem na tupela i no tanim pes na lukim skin nating bilong papa, nogat.
24Taim Noa em i kirap na tingting bilong em i klia gen, em i harim stori bilong dispela samting namba 2 pikinini bilong em i bin mekim. 25Na Noa em i tok,
“Kenan em bai kisim bagarap.
Em bai aninit tru long ol brata bilong em.”
26Noa em i tok olsem,
“Litimapim nem bilong BIKPELA, Em i God bilong Siem.
Kenan bai aninit long Siem.
27God bai givim bikpela hap graun long Jafet,
na Jafet bai sindaun gutpela wantaim Siem,
na Kenan bai aninit tru long Siem.”
28Bihain long bikpela tait, Noa em i stap 350 yia moa. 29 Noa em i stap 950 yia olgeta na em i dai.
