Moning.
Wanpela pasin i makim yumi manmeri bilong dispela graun na i olsem, yumi laik i stap nambawan. Yumi laik kisim nem “bikman” o nem “hetman” o nem “bikmeri” o nem “hetmeri”. Yumi laik kisim biknem long ples o long politik o long lotu bilong yumi. Yumi laik bosim ol narapela manmeri. Yumi laik ol narapela manmeri i lukim yumi na apim yumi olsem yumi bikpela samting.
Tasol yumi samting nating tumas. God Em i BIKPELA na yumi nogat. Na God i makim Jisas bai Jisas i stap BIKPELA long olgeta samting – bai Jisas i stap Hetman long olgeta samting. Lukim Efesus 1:21-23….
21God i mekim Krais i stap antap tru long olgeta hetman na long olgeta man i gat namba bilong bosim ol sampela samting na long olgeta gavman na king na long olgeta man i gat nem. Krais i stap antap long olgeta nau na Em bai stap antap long olgeta long bihain taim tu. 22God i putim olgeta samting aninit long lek bilong Krais, na Em i mekim Krais i stap het tru bilong olgeta samting, na Em i mekim dispela hetman het bilong sios, 23na sios em i bodi bilong Krais. Na Krais Em i pulimapim sios na Em i pulimapim olgeta samting.
Long dispela toktok aposel Pol i makim 3-pela samting….
1. Jisas Em i hetman bilong olgeta samting nau na long olgeta samting long bihain.
God i givim olgeta pawa na strong long Jisas. Olsem na, wanpela man long dispela graun, o wanpela samting long antap, o wanpela samting daunbilo, wanpela samting i no inap winim Jisas Krais.
God i givim olgeta pawa na strong long Jisas na Jisas i stap bos bilong olgeta samting. Em i het na bos bilong olgeta hetman na olgeta bosman bilong dispela graun. Em i het na bos bilong olgeta gavman, na long olgeta king, na long olgeta man i gat namba, na long olgeta man i gat nem long dispela graun. Olgeta i stap aninit long lek bilong Jisas Krais nau, na olgeta bai i stap aninit long Jisas Krais long bihain tu.
Na yumi save olsem, i gat ol planti manmeri i stap na ol i no wokabaut olsem Jisas Em i bos bilong ol – ol i no tingim olsem Jisas Em i hetman na bosman na BIKPELA bilong ol. Tasol harim tok aposel Pol i mekim long Jisas long Filipai 2:9-11….
8Em i kamap wankain tru olsem wanpela man, na Em i daunim Em yet na Em i bihainim tru laik bilong God na Em i dai. Yes, Em i bihainim tru, maski Em i dai long diwai kros. 9Na long dispela as God i litimapim Em na putim Em i go antap tru long olgeta samting, na Em i givim Em nem i winim olgeta nem. 10God i mekim olsem, bai olgeta manmeri, taim ol i harim nem bilong Jisas, ol bai brukim skru long Em, olgeta i stap long heven na long dispela graun na olgeta i stap daunbilo tu, 11na olgeta bai tokaut klia olsem, Jisas Krais Em i BIKPELA. Na God, Papa, bai kisim biknem stret.
Ol manmeri i no laik brukim skru long Jisas nau, orait bihain ol bai brukim. Sapos nau ol i no laik klia olsem Jisas Krais Em i BIKPELA bilong olgeta samting, na ol i no laik tanim bel nau na bilipim na trastim na i stap aninit long Jisas na bihainim Em nau, orait bihain bai Jisas i fosim ol long tokaut olsem, “Jisas Krais Em i BIKPELA.” Bihain ol bai lukim olgeta pawa na strong bilong Em na ol bai tokaut olsem, “Yes, i tru, Jisas Krais Em i het na bos bilong olgeta samting.” Tasol, long dispela taim em i tuleit long ol i tanim bel, na ol bai lus.
Jisas Em i het na bos bilong olgeta samting na i no gat rot bilong wanpela manmeri i abrusim dispela samting. Jisas Em i het na bos nau, na i gat taim we olgeta manmeri long olgeta hap bai brukim skru long Jisas. Long dispela taim ol manmeri i bilipim na trastim God long kisim bek ol long feitful wok bilong Jisas tasol na ol i pas tru long Jisas, orait ol i amamas long brukim skru long Em – na ol narapela manmeri God bai fosim ol long brukim skru. Olgeta manmeri bai brukim skru long Jisas bikos Jisas Em i het na bos bilong olgeta samting.
Olsem na, mobeta nau yumi brukim skru long Jisas na yumi trastim feitful wok bilong Em tasol, na yumi stap aninit long Em na bihainim Em.
2. Jisas Em i hetman na bosman bilong sios femili nau na long bihain.
Em i no wanpela man nating Em i het bilong sios. Nogat tru. Em i dispela BIKMAN we olgeta manmeri bai brukim skru long Em na tokaut, “Jisas Krais Em i BIKPELA” – em i dispela BIKMAN Em i het na bos bilong sios.
Na yumi save long sios femili bilong God. Sios femili em ol manmeri God i bin makim long bipo na pasim long Krais, na Krais i dai bilong mekim ol i stap klin na stret long ai bilong God. Ol dispela manmeri God Em i adoptim na putim ol i stap insait long femili bilong Em. Na Holi Spirit Em i opim ai na ia na bel bilong ol na ol i tanim bel na bilipim na trastim Jisas Krais – ol i bilipim na trastim God long kisim bek ol long feitful wok bilong Jisas tasol – na ol i stap aninit tru long Em na bihainim Em. Ol dispela manmeri ol i sios bilong God.
Na sapos Holi Spirit i bin opim ai ia bel bilong yumi na yumi tanim bel na yumi bilipim na trastim feitful wok bilong Jisas na yumi bihainim Em, orait yumi mas save olsem, i gat wanpela bikman i hetman na bosman bilong yumi na Em i Jisas Krais tasol.
Em olsem na yumi sios femili bilong God yumi mas harim na bihainim tok bilong Jisas tasol. Planti manmeri i tingim olsem ol i lida (hetman) na bosman bilong sios. Tasol nogat. Jisas wanpela Em i hetman na bosman bilong sios – Jisas wanpela Em i BIKPELA bilong sios femili bilong God na yumi mas harim na bihainim tok bilong Em wanpela tasol.
3. Jisas Em i as bilong laip bilong sios femili bilong God.
Jisas Krais Em i as na minim bilong laip bilong sios na Em i as na minim bilong olgeta samting nau yumi stap long Em. God i bin kamapim olgeta samting, bai Krais i stap het bilong olgeta samting. Jisas Krais Em i as na minim bilong laip.
God i bin wokim yumi, bai yumi i stap aninit long Jisas Krais na bihainim Em – i no gat narapela samting i bikpela samting na yumi ken i bisi long mekim na bihainim. Nogat. Jisas Krais Em i as na minim bilong laip na Em i as na minim bilong laip bilong sios. Sios i stap tasol bilong Jisas Krais.
Olsem na olgeta sating bilong Jisas Krais i mas pulimapim tingting bilong yumi. Maski ol samting bilong taun na maski ol samting bilong ples na maski ol samting bilong waitman. Jisas Krais tasol Em i as bilong sios na as bilong olgeta samting. Olsem na, yumi mas tingim dispela na larim dispela i stiaim wokabaut bilong yumi – i no gat narapela samting i winim Jisas Krais. Olsem na, mobeta nau yumi tingting na nau yumi bihainim Em tru.
“Yu mas lavim BIKPELA, God bilong yu. Yu mas lavim Em long bel bilong yu olgeta, na long laip bilong yu olgeta, na long tingting bilong yu olgeta, na long strong bilong yu olgeta.” (Mak 12:28-31.)
Glenn.
