Moning.
Las wik long Sande Baibel Toktok yumi bin skelim namba wan nem Jisas i yusim bilong makim Em yet, na dispela nem em i “Pikinini Bilong Man.”
Long Olpela Testament, long buk Daniel, Daniel em i stori long wanpela visin em i bin lukim. Em i lukim God Bilong Oltaim Oltaim na Em i sindaun long sia king long heven na ol tausen tausen tausen manmeri ol i sanap na ol i lukluk i stap. Na Pikinini Bilong Man i kam long Em.…
Na God Bilong Oltaim Oltaim i givim namba long Em bilong bosim olgeta samting, na i givim glori long Em, na i givim kingdom long Em,
bai olgeta manmeri bilong olgeta kantri na bilong olgeta tok ples bai i stap aninit long Em.
Na Em bai bosim olgeta samting oltaim oltaim; namba bilong em i no inap pinis,
na kingdom bilong Em i no inap lus. (Daniel 7:14.)
Taim Jisas i yusim nem “Pikinini Bilong Man” bilong makim Em yet, orait i olsem Jisas i tok, “Mi dispela man. Mi gat namba bilong bosim olgeta samting bilong olgeta hap. Kingdom bilong God em bilong Mi. Mi king na oana na bos bilong kingdom bilong God.”
Jisas i mekim trupela tok o nogat?
Na Jisas i tok tru o Em i tok nating tasol? Jisas i mekim trupela tok o Em i bikhet tasol na Em i toktok? Yu gat wanem tingting? Orait, yumi skelim ol evidens Mak i putim ples klia bilong yumi. Yumi skelim toktok bilong ol sampela ai witnis, em ol manmeri i lukim na ai witnisim wokabaut na sindaun bilong Jisas.
- Jisas i gat namba na pawa bilong autim tok. > (Lukim Mak 1:17 na Mak 1:21-21 na Mak 2:25-27 na Mak 3:20-30, 30-15 na Mak 4:1-34 na Mak 7:14.)
- Jisas i gat namba na pawa bilong rausim ol kainkain sik. (Lukim Mak 1:29-31 na Mak 1:40-42 na Mak 2:1-12 na Mak 3:1-6 na Mak 5:25-34 na Mak 6:53-56 na Mak 7:31-37 na Mak 8:22-26.)
- Jisas i gat namba na pawa bilong bosim ol samting bilong dispela graun. (Lukim Mak 4:35-41 na Mak 6:45-52.)
- Jisas i gat namba na pawa bilong bosim kaikai. (Lukim Mak 6:30-44 na Mak 8:10.)
- Jisas i gat namba na pawa bilong bosim na kontrolim ol spirit nogut. (Lukim Mak 1:21-28 na Mak 3:7-12 na Mak 5:1-13 na Mak 7:24-30.)
- Jisas i gat namba na pawa bilong rausim na fogivim sin. (Lukim Mak 2:1-12.)
- Jisas i gat namba na pawa bilong bosim laip na dai. (Lukim Mak 5:35-42.)
Ol manmeri i lukim na ai witnisim Jisas ol i save olsem wanpela bikpela bikpela samting stret i kamap namel long ol. Olsem na…
“Ol manmeri bilong olgeta hap i kam long Jisas.” (Mak 1:45.)
“Ol i tok olsem, ‘Bipo, yumi no bin lukim dispela kain samting, nogat tru.’” (Mak 2:12.)
“Na ol manmeri i gat sik ol i resis na ol i laik i go klostu long Jisas na tasim Em.” (Mak 3:10.)
“Dispela man em i husat tru na win na wara i save harim tok bilong Em.” (Mak 4:41.)
“Na olgeta manmeri i tanim het long ol dispela samting.” (Mak 5:20.)
“Na ol manmeri i lukim dispela samting na ol i kirap nogut tru.” (Mak 5:42.)
“Na ol sik manmeri i tokim Jisas olsem, ‘Plis, larim mipela i ken i tasim liklik hap bilong klos bilong Yu.’ (Mak 6:56.)
“Na planti manmeri i kirap nogut na tanim het long ol dispela samting.” (Mak 7:37.)
Yumi mas klia olsem, Jisas i wokim ol planti kainkain samting bai ol manmeri ol i ken i save olsem, Jisas Em i Pikinini Bilong Man bilong visin bilong Daniel. Yumi no ken i paul long as bilong ol mirakel bilong Jisas. Yumi mas klia olsem, Jisas i wokim ol mirakel bilong soim olgeta manmeri Em i Pikinini Bilong Man olsem Em i tok. Ol mirakel bilong Jisas em i evidens bilong soim olsem, Jisas Em i Pikinini Bilong Man Daniel i lukim long visin bilong em.
Na planti taim Jisas i bin tokim ol disaipel olsem,
“Pikinini Bilong Man i mas kisim kainkain hevi, na ol bikman na ol hetpris na ol tisa bilong lo ol bai givim baksait long Em, na ol bai kilim Em i dai na Em bai i kirap bek gen long 3-pela de.” (Mak 8:31.)
Na ol dispela samting i kamap olsem Jisas i tok. Long wanem? Jisas Em i Pikinini Bilong Man. Olgeta samting bilong God em bilong Jisas. Glori bilong God em i glori bilong Jisas. Namba bilong God em i namba bilong Jisas. Pawa bilong God em i pawa bilong Jisas. Kingdom bilong God em i kingdom bilong Jisas. Olgeta ai witnis na olgeta evidens i sapotim na i putim ples klia olsem, Jisas Em i Pikinini Bilong Man.
Yumi no ken i givim baksait long evidens bilong ai witnis.
Tingim. Sapos wanpela mejistret bilong kot i givim baksait long ol ai witnis na long ol evidens na em i kamapim disisen bilong em nating, orait dispela i no gutpela na ol manmeri bai komplen. Na wankain olsem, i no gutpela long yumi i givim baksait long ol ai witnis na long ol evidens. Sapos yu givim baksait long ol ai witnis na long ol evidens, orait yu wokim wanpela bikpela mistek bilong laip bilong yu.
Em olsem na yumi mas skelim ol ai witnis na ol evidens God i givim yumi, na yumi wokim disisen bilong yumi – Jisas i tok nating o tru tumas Jisas Em i Pikinini Bilong Man olsem Em i tok?
Sapos Jisas Em i Pikinini Bilong Man olsem Em i tok, orait yumi mas harim tok bilong Em tasol na bihainim Em tasol. Waitman bilong yu em i no Pikinini bilong Man. Misineri bilong yu em i no Pikinini Bilong Man. Misin bilong yu em i no Pikinini Bilong Man. Pasta bilong yu em i no Pikinini Bilong Man. Nogat. Jisas wanpela Em i Pikinini Bilong Man na yumi mas pas long Em tasol na yumi bilipim na trastim Em tasol na yumi bihainim tok bilong Em tasol.
Glenn.
