Moning.
I gat planti kainkain posin sanguma puripuri pasin na marila pasin na mejik pasin na ol kainkain samting olsem i stap – yupela save long en o yupela harim stori long en pinis. Ol dispela samting Baibel i kolim “kastem pasin nogut”. God i hetim tru ol kainkain kastem pasin nogut.
Na yumi mas save olsem, ol samting bilong kastem pasin nogut em i samting bilong Satan wantaim ol wokboi bilong em. Lukim Aposel 13:6-12….aposel Pol wantaim Barnabas i raun long hap Saiprus na tupela i autim tok bilong God….
6Na taim tupela i bin raun long olgeta hap bilong Saiprus na i kamap long taun Pafos, tupela i mitim wanpela man bilong wokim mejik. Em i wanpela giaman profet bilong ol lain Juda, nem bilong em Bar-Jisas, 7na em i stap wantaim gavana Sergius Paulus. Na dispela gavana, em i gat gutpela save, na em i singautim Barnabas na Sol. Long wanem, em i laik harim tok bilong God. 8Tasol dispela man bilong wokim mejik, narapela nem bilong em Elimas, em i wok long daunim tupela, bai gavana i no ken i kisim bilip. 9Tasol Sol, em i gat narapela nem Pol, Holi Spirit i pulap long em na em i lukluk strong long Elimas, 10na em i tok, “Yu pikinini bilong Satan. Yu birua bilong olgeta stretpela pasin. Olgeta pasin bilong giaman na pasin nogut i pulap long yu. Yu no laik lusim dispela pasin we yu wok long brukim na tanim stretpela rot bilong BIKPELA. 11Harim. Han bilong BIKPELA i holim yu pinis na bai yu i stap aipas na longpela taim liklik yu no inap lukim san.” Na wantu ai bilong em i pas na tudak i kamap long em, na em i go nabaut na askim ol man long holim han bilong em bilong lidim em i go kam. 12Na taim gavana i lukim ol dispela samting, em i bilip. Long wanem, em i kirap nogut long tisim bilong BIKPELA.
Long lain 10 aposel Pol i makim man i mekim pasin mejik na Pol i kolim em “pikinini bilong Satan”. Dispela man i mekim mejik em i yusim pawa bilong Satan bilong strongim ol wok bilong Satan. Olsem Satan dispela man em i mekim ol kainkain giaman pasin bilong trikim ol manmeri. Olsem Satan dispela man em i birua bilong olgeta samting i gutpela samting na em i save strongim olgeta kainkain pasin nogut. Olsem Satan dispela man em i tanim nabaut tok bilong God bilong paulim ol manmeri na bagarapim ol (lukim lain 6 – em i wanpela giaman profet – na lukim lain 10 wantaim – em i laik paulim trupela rot bilong God). Em olsem na Pol i kolim em “pikinini bilong Satan” – em i mekim na bihainim pasin bilong “papa” bilong em.
Em olsem na yumi mas save na yumi mas klia olsem, man i mekim mejik em i no mekim samting nating na em i no mekim samting long strong na pawa bilong em yet. Nogat. Em i mekim samting long pawa na strong bilong Satan. Ol samting ol mejik posin sanguma puripuri marila manmeri i mekim ol i mekim long pawa na strong bilong Satan. Ol samting bilong kastem pasin nogut em i samting bilong Satan.
Yumi mas tingting na skelim gut.
Tingim. Husat i givim strong long ol manmeri i wokim ol mejik samting – ol i kisim pawa na strong bilong ol we? Taim wanpela man i kamap narapela kain na ai bilong em i tanim na raun, na wanpela spirit samting i mekim toktok long maus bilong dispela man, orait husat i toktok? Tingim. Husat tru i mekim tok? Taim ol lip na smok na stik samting i makim ol posin sanguma manmeri, orait husat i kontrolim dispela samting bilong makim ol? Smok na lip na stik i no gat strong na pawa bilong wokim dispela samting – olsem na husat i kontrolim smok na lip na stik na i makim ol posin man?
Yumi mas klia olsem, Satan wantaim ol wokboi bilong em i tokim ol na i givim pawa na strong long ol bilong wokim ol samting bilong kastem pasin nogut.
Sampela taim ol dispela manmeri bilong wokim ol mejik samting ol i save pinis long as bilong strong bilong ol na ol i haitim. Tasol sampela taim ol i wokim tasol na ol i no save long as bilong strong bilong ol – ol i tingim olsem ol i strong nating tasol o ol i tingim olsem ol spirit bilong tumbuna bilong ol i givim pawa long ol. Tasol nogat. Ol i kisim na yusim strong na pawa bilong Satan tasol.
Yumi mas holim tingting, Satan em i papa bilong olgeta tok giaman na olgeta samting giaman – yumi no ken i trastim em taim em i yusim lip na smok na stik bilong makim ol posin man. Em i man bilong giaman tasol. Em i ken i trikim yumi na yumi go bagarapim narapela man nating. Satan em i no tingting long kamapim gutpela samting. Nogat. Em i laik bagarapim yu na bagarapim olgeta manmeri. Em i no man bilong stretim ol samting. Nogat. Em i man bilong bagarapim ol samting.
Pawa na strong bilong God i winim pawa na strong bilong Satan.
Lukim lain 11. God yet i holimpas dispela man i wokim mejik na Em i mekim em i kamap aipas man. Aposel Pol i no mekim wanpela samting. Nogat. God i mekim, long wanem, pawa na strong bilong God i winim pawa na strong bilong Satan.
Na yumi i pas long Jisas – yumi i bilipim na trastim God long kisim bek yumi long feitful wok bilong Jisas long diwai kros – yumi i bihainim Jisas – yumi save olsem, God i yusim pawa na strong bilong Em bilong mekim ol gutpela gutpela samting long yumi. Lukim Rom 8:28….
28Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em.
Satan i yusim pawa na strong bilong em bilong stopim manmeri long bilipim na trastim na bihainim Jisas, tasol pawa na strong bilong God i winim pawa na strong bilong Satan, na God i yusim pawa na strong bilong Em bilong kisim yumi i kam insait long femili bilong Em. Long pawa bilong Em God i pasim yumi long Jisas bilong mekim yumi holi na i no gat asua long ai bilong Em. Long pawa bilong Em God i opim ai ia bel bilong yumi bai yumi tanim bel na yumi bilipim na trastim God long kisim bek yumi long feitful wok bilong Jisas long diwai kros. Long pawa bilong Em God i kirapim nupela laip long yumi bai yumi lusim ol samting bilong dispela graun na yumi bihainim Jisas tasol.
Harim. Sapos yumi harim tok bilong God na yumi pas long Jisas – yumi bilipim na trastim God long kisim bek yumi long feitful wok bilong Jisas long diwai kros na yumi pas long Em – orait yumi no ken i pret long wanpela samting bilong ol kastem pasin nogut bilong Satan – yumi mas i stap longwe long ol kastem pasin nogut na yumi no ken i lainim o bihainim ol kastem pasin nogut olsem God i tok – tasol yumi no ken i pret long pawa na strong bilong en. Long wanem, Jisas i winim Satan – pawa na strong bilong Jisas i winim pawa na strong bilong Satan – na Jisas i save yusim pawa na strong bilong Em bilong sevim laip bilong ol manmeri God i bin pasim long Em.
Glenn.
