Moning.
Las wik long Sande Baibel Toktok (Pasin bilong bihainim Pikinini Bilong Man) yumi kisim save olsem, pasin bilong Jisas em i oposit long pasin bilong ol manmeri bilong dispela graun.
Dispela tok oposit em i nupela nek liklik long Tok Pisin bilong yumi. Yumi save olsem, waitpela samting em i narapela kain olgeta long blekpela samting, na samting i drai em i narapela kain olgeta long samting i wet, na samting i longpela em i narapela kain olgeta long samting i sotpela, na antap em i narapela kain olgeta long daunbilo. Em olsem na yumi ken i tok olsem, wait em i oposit long blek, na drai em i oposit long wet, na longpela em i oposit long sotpela, na antap em i oposit long daunbilo.
Taim yumi tok, “Pasin bilong Jisas Em i oposit long pasin bilong yumi”, orait yumi minim olsem, pasin bilong Jisas Em i narapela kain pasin na i no olsem pasin bilong yumi manmeri bilong dispela graun.
Oposit pasin bilong Jisas.
Tingim. Jisas Em i no tingim Em yet, na Em i no tingim gutpela nem bilong Em yet, na Em no tingim posisen bilong Em yet, na Em i no tingim namba bilong Em yet. Nogat. Em i tingim ol planti manmeri na Em i daunim Em yet na Em i lusim laip bilong Em bilong baim bek laip bilong ol. Yu save, pasin bilong Jisas Em i oposit long pasin bilong yumi manmeri bilong dispela graun.
Em olsem na, yumi i tanim bel na i kam long Jisas na yumi bilipim na trastim God long kisim bek yumi long feitful baim bek wok bilong Jisas long diwai kros, orait yumi save olsem, yumi kam nau long nupela pasin long laip bilong yumi. Yumi kam long pasin i oposit long pasin bilong ol manmeri bilong dispela graun. Taim yumi tanim bel na yumi kam long Jisas na yumi bilipim na trastim feitful baim bek wok bilong Em long diwai kros, orait dispela i minim olsem yumi kam tu long ol oposit pasin bilong Jisas long olgeta samting long laip bilong yumi.
Lidaman bilong of femili bilong God.
Long Mak 10:42-44 Jisas i tokim ol disaipel olsem, “Yupela save pinis, ol lida bilong ol lain Jentail ol i bikhet na bosim ol manmeri, na ol bikman bilong ol i save bosim ol strong. Tasol yupela no ken i mekim olsem. Nogat. Sapos wanpela bilong yupela i laik kamap bikman, orait em i mas mekim wok olsem em i wanpela wokboi bilong yupela. Na sapos wanpela bilong yupela i laik kamap nambawan, orait em i mas mekim wok olsem em i wokboi nating bilong yupela olgeta.”
Long dispela toktok Jisas i putim ples klia olsem, man i laik kamap bikman namel long ol lain manmeri bilong God, long sios femili bilong God, orait em i mas bihainim pasin i oposit long pasin bilong ol lidaman na ol bikman bilong dispela graun.
Jisas, long maus bilong aposel Pol, Em i mekim wankain toktok long Timoti. Long 1 Timoti 3:1-7 aposel Pol i putim ples klia olsem, man i laik kamap lida bilong sios em mas i stap man i bihainim pasin i oposit long pasin bilong ol manmeri bilong dispela graun na i oposit long pasin bilong ol lidaman bilong dispela graun. Lukim na skelim 1 Timoti 3:1-7.
1Wanpela tok i stap, na dispela tok yu ken i trastim. Na dispela tok i olsem, sapos wanpela man i laik kamap lida bilong sios, orait em i laikim gutpela wok.
2Orait na, man i ken i kamap lida bilong sios em mas i stap gutpela man na i no gat wanpela rong i stap we ol manmeri i tok baksait long em,
na em i man bilong wanpela meri tasol,
na em i man bilong sindaun isi,
na em i stiaim gut tingting na pasin bilong em yet,
na em i stap stret long olgeta samting,
na em i amamas long mekim gutpela long ol manmeri i no wantok bilong em,
na em i wanpela gutpela tisa,
3na em i no pas long ol strongpela dring bilong spak,
na em i no man bilong bel hat hariap na solapim narapela manmeri, nogat, em i man bilong bel isi na mekim gutpela long narapela manmeri,
na em i no tingting long mekim tok pait olgeta taim,
na em i no lavim mani.
4Em i bosim na lukautim femili bilong em gutpela, na pikinini bilong em i harim na bihainim tok bilong em, na ol i rispektim em. 5Yu save, sapos em i no bosim na lukautim femili bilong em gutpela, orait hau na bai em i lukautim sios bilong God gutpela?
6Nupela man bilong bilip i no ken i kamap lida bilong sios. Long wanem, nogut em i apim em yet long tingting bilong em yet na em i pundaun na kisim hevi olsem Satan bai kisim.
7Na man i laik kamap lida bilong sios em mas i gat gutpela nem namel long ol manmeri i stap autsait long sios. Long wanem, sapos em i no gat gutpela nem olsem, orait Satan bai yusim dispela samting bilong mekim sem long em.
Sapos wanpela man i laik kamap lida bilong sios, orait em i laikim gutpela wok. Tasol man i ken i kamap lidaman bilong sios, orait em mas i stap man i amamas long bihainim oposit pasin olsem Pikinini Bilong Man, Hetman na oana bilong sios, i bihainim. Pasin bilong lidaman bilong sios bilong Jisas em i oposit long pasin bilong ol lidaman bilong dispela graun.
Em olsem na yumi i laik i stap lidaman namel long ol manmeri long femili bilong God, orait yumi mas i stap man i wokabaut long pasin i oposit long pasin bilong ol manmeri bilong dispela graun na i oposit long ol lidaman bilong dispela graun. Long dispela rot tasol bai yumi helpim ol manmeri bilong Jisas i bihainim Em.
Glenn.
