Moning.
Lotu bilong yumi i gutpela lotu o nogat? Yumi skelim lotu bilong ol 3000 manmeri i bin tanim bel na ol i bilipim na trastim rot God i makim bilong kisim bek ol – yumi skelim ol dispela manmeri i bilipim na trastim God long kisim bek ol long feitful wok bilong Jisas tasol long diwai kros. Lukim Aposel 2:42-47….
42Na ol manmeri i bilip ol i givim ol yet bilong kisim tisim bilong ol aposel na long felosip, na ol i brukim bret na kaikai wantaim na ol i beten wantaim. 43Na gutpela pret i kamap long ol, na God i wokim planti mirakel long han bilong ol aposel. 44Ol manmeri i bilip ol i stap wantaim na ol i tingim, “Samting bilong mi em i samting bilong olgeta bilip manmeri.” 45Na ol i salim sampela graun na kago bilong ol na kisim mani, na ol i yusim dispela mani bilong helpim ol manmeri i nidim sampela helpim. 46Em olsem na long olgeta de na wik ol i bung wantaim long tempel, na ol i brukim bret na kaikai wantaim long wanwan haus bilong ol. Ol i gat gutpela tingting wantaim na ol i amamas na kaikai 47na ol i litimapim nem bilong God, na olgeta narapela manmeri i mekim gutpela long ol. Long olgeta de na wik BIKPELA i kisim bek ol sampela manmeri moa na long dispela pasin Em i mekim namba bilong ol i bilip i kamap planti moa.
Lotu bilong ol i olsem wanem? Taim ol i lotu ol i mekim wanem kain pasin? Yumi skelim 4-pela samting….
1. Ol i pas olgeta long tisim bilong ol aposel.
Lukim lain 42. Ol aposel ol i tisim (skulim) ol manmeri long olgeta gutpela wok bilong God long feitful wok bilong Jisas. Na ol manmeri bilong God ol i givim ol yet bilong kisim dispela tisim (skul) bilong ol aposel. Olgeta tok ol aposel i autim long ol, orait ol manmeri bilong God ol i lainim na ol i kisim na ol i pas long en na ol i bihainim. Ol i kisim olgeta tok ol aposel i skulim ol long en, na ol i larim dispela tok i stiaim laip bilong ol. Bipo ol narapela tisim i bin stiaim bilip bilong ol dispela 3000 manmeri, tasol nau, ol i kisim na lainim tok bilong ol aposel, na em i dispela tok i stiaim bilip bilong ol na i stiaim laip bilong ol.
Sapos yumi kam pinis long Jisas na yumi bilong Em olsem ol dispela 3000 manmeri i bilong Em, orait yumi tu yumi mas givim yumi yet bilong kisim tisim bilong ol aposel. Bilong yumi tisim bilong ol aposel i stap long Nupela Testamen long Baibel. Maski yumi lainim na bihainim toktok i go long ol narapela samting. Yumi lainim na yumi kisim na yumi bihainim tok bilong ol aposel tasol.
2. Ol i pas olgeta long felosip.
Lukim lain 42 gen. Tok “felosip” i minim olsem “holimpas samting wantaim” o “samting i stap na ol i holimpas wantaim” o “ol i wokabaut (sindaun) wantaim long wanpela samting”. Ol manmeri i tanim bel na ol i bilipim na trastim na bihainim Jisas, ol i bilipim na trastim God long kisim bek ol long feitful wok bilong Jisas tasol na ol i bihainim Em. Em olsem na ol i wokabaut (sindaun) wantaim long dispela wanpela tingting na wanpela bilip. Long wanpela rot tasol God Em i fogivim sin bilong ol na Em i adoptim ol na kisim bek ol na Em i mekim ol i stap femili bilong Em. Long nupela femili ol i bung wantaim na kaikai wantaim, na wantaim ol i litimapim nem bilong God. Long laip bilong ol, ol i bilipim na trastim na bihainim wanpela bilip na wanpela rot wantaim.
Na ol i holimpas na serim ol samting bilong ol wantaim. Lukim lain 44-45. Ol i yusim ol samting bilong ol bilong helpim ol nupela brata na sista bilong ol long nupela femili. Ol i tingim olsem, ol “samting bilong mi em i samting bilong olgeta manmeri i bilip” na dispela tingting i stiaim pasin bilong ol. Em olsem na, sampela brata na sista ol i salim sampela graun bilong ol na kisim mani, na sampela brata na sista ol i salim ol sampela kago bilong ol na kisim mani, na ol i yusim dispela mani bilong helpim ol brata na sista bilong ol long nupela femili na klen bilong ol.
Ol dispela pasin, pasin bilong sindaun (wokabaut) wantaim long wanpela bilipim na trastim na bihainim wanpela rot wantaim, na pasin bilong holimpas na serim laip wantaim, ol dispela em i pasin bilong felosip.
Ating planti manmeri long ples na long taun ol i tingim olsem, taim ol i harim lotu, orait ol i felosip. Tasol ol i no pas long wanpela bilip bilong feitful wok bilong Jisas, na ol i no pas long tisim bilong ol aposel tasol, na ol i no litimapim nem bilong God tasol. Ol i no pas wantaim na serim laip bilong ol wantaim. Nogat. Ating planti lotu manmeri ol i pas tumas long ol olpela klen femili bilong ol, na ol i pas long ol tisim i no tisim bilong ol aposel, na ol i save litimapim nem bilong ol yet.
Taim ol 3000 manmeri i pas olgeta long felosip, orait ol i pas olgeta long wanpela bilip, na ol i bilipim na trastim wanpela rot God i makim bilong kisim bek ol, ol i bilipim na trastim God long kisim bek ol long feitful wok bilong Jisas long diwai kros tasol, na wantaim ol i bihainim Jisas, na wantaim ol i stap nupela femili bilong God, na wantaim ol i serim laip bilong ol wantaim – ol i pas olgeta long felosip.
3. Ol i pas olgeta long “brukim bret na kaikai wantaim”.
Lukim lain 42 gen wantaim lain 46. Yumi stori pinis liklik long ol femili bilong God ol i serim na ol i kaikai wantaim. Tasol yumi skelim dispela tok moa.
Ol sampela saveman i tingim olsem, taim ol i kaikai wantaim, orait dispela i minim olsem, ol i kaikaim Lordsapa wantaim. Em olsem na, dispela i minim olsem, ol i kaikai wantaim, na long namel long ol i kaikai, orait ol i kisim sampela bret na wain na ol i serim wantaim ol brata na sista i sindaun i stap wantaim, na ol i holim tingting long Jisas na long dai bilong Em long diwai kros. Taim ol i brukim bret na skelim wain na ol i givim (tilim) long ol brata na sista, orait ol i tingim olsem, God i givim Jisas long mipela wanwan brata na sista bilong sevim laip bilong mipela. Em olsem na ol i tingim feitful wok bilong Jisas long diwai kros na ol i amamas wantaim.
4. Ol i pas olgeta long prea.
Lukim lain 42 gen wantaim lain 47. Taim ol i prea, orait ol i no tingim ol samting bilong ol yet na ol i no apim nem bilong ol yet. Nogat. Ol i tingim olgeta gutpela wok bilong God long feitful wok bilong Jisas long diwai kros bilong sevim laip bilong ol, na ol i litimapim nem bilong God tasol. Taim ol i bung ol i prea long God na ol i givim biknem long God tasol. God na gutpela wok bilong God long wok bilong Jisas i pulimapim tingting bilong ol na i nambawan samting bilong ol, na long dispela as, God na gutpela wok bilong Em long wok bilong Jisas i pulap long prea bilong ol.
Lotu bilong yumi i gutpela lotu o nogat?
Tisim (tok) bilong ol aposel i pulap long ol gutpela wok bilong God long feitful wok bilong Jisas na ol manmeri bilong God ol i pas long olgeta tisim bilong ol aposel. Na felosip bilong ol i pulap long ol gutpela wok bilong God long feitful wok bilong Jisas. Na pasin bilong kaikai wantaim i pulap long ol gutpela wok bilong God long feitful wok bilong Jisas. Na prea bilong ol i pulap long ol gutpela wok bilong God long feitful wok bilong Jisas. God i stap nambawan samting bilong ol, na long dispela as ol i litimapim nem bilong God tasol. Sapos lotu bilong yumi i stap olsem, orait em i gutpela lotu.
Glenn.
Sapos yu laik save moa long dispela tok, orait yu lukim Aposel 2:42-47 long Autim Tok long pngbibleresources.org.
