Mak

¹Long narapela taim Jisas i go insait long haus lotu bilong ol Juda na wanpela man han bilong em i dai pinis i stap. ²Na sampela manmeri i laik painim rong long Jisas. Olsem na, ol i was gut long Em na ol i tingim olsem, “Em bai stretim han bilong dispela man long de Sabat o nogat?” ³Na Jisas i tokim dispela man i gat han nogat olsem, “Yu sanap na stap long ai bilong olgeta manmeri.”

⁴Na Jisas i givim wanpela askim long ol olsem, “Wanem pasin i orait long yumi ken i mekim long de Sabat? Yumi ken i mekim gutpela pasin o yumi ken i mekim pasin nogut? Yumi ken i sevim laip bilong manmeri o yumi ken i kilim manmeri?” Jisas i askim ol olsem, tasol ol i no gat toktok.

⁵Na Jisas i lukim ol na Em i bel hat na pilim hevi long ol. Long wanem? Ol i pasim bel bilong ol. Olsem na, Jisas i tokim dispela man i gat han nogut olsem, “Putim han bilong yu long ples klia.” Orait, em i putim han bilong em long ples klia na han bilong em i kamap gutpela gen olgeta. ⁶Na kwiktaim ol Farisi i kirap na ol i go autsait. Na ol i bung wantaim ol lain i bihainim Herot, na ol i mekim toktok bilong painim wei bilong kilim Jisas i dai.

Planti manmeri i kam lukim Jisas.

^7-8Jisas wantaim ol disaipel bilong Em i go bek gen long nambis bilong raunwara. Na planti manmeri i bihainim Em. Planti manmeri bilong distrik Galili na bilong distrik Judia na bilong taun Jerusalem na bilong distrik Idumea, na planti manmeri bilong ol ples i stap long hap sait long wara Jordan na bilong taun Tair na bilong taun Saidon, ol i harim stori bilong planti samting Jisas i wokim na ol i kam long Em. ⁹Na Jisas i tokim ol disaipel bilong Em olsem, “Planti manmeri i stap na nogut ol i krungutim Mi. Olsem na, redim wanpela liklik sip bilong Mi na Mi ken i stap long em.” ¹⁰Long wanem? Em i bin oraitim sik bilong planti manmeri, na ol manmeri i gat sik ol i resis na ol i laik i go klostu long Jisas na tasim Em. ¹¹Na taim ol spirit nogut i lukim Jisas ol i pundaun long lek bilong Jisas na bikmaus olsem, “Yu Pikinini bilong God.” ¹²Tasol Jisas i tok strong long ol olsem, “Yupela save long Mi, tasol yupela no ken i tokim ol manmeri.”

Jisas i makim 12-pela aposel.

¹³Jisas i go antap long wanpela maunten. Em i laik makim sampela man. Olsem na, Em singautim ol dispela man na ol i kam long Em. ^14-15Jisas i makim 12-pela man na Em i givim nem aposel long ol. Na Em i makim ol inap ol i ken i stap wantaim Em na Em i ken i salim ol i go bilong autim tok na bilong rausim ol spirit nogut. ¹⁶Jisas i makim 12-pela aposel. Wanpela em i Saimon, na Jisas i givim narapela nem Pita long em. ¹⁷Em i makim Jems na Jon, tupela pikinini bilong Sebedi. Na Jisas i givim narapela nem Boanerges long tupela. Na as bilong dispela nem i olsem, “Tupela i olsem klaut i pairap.” ¹⁸Em i makim Andru na Filip na Bartolomyu na Matyu na Tomas. Na Em i makim Jems, pikinini bilong Alfius, na Tadius tu. Em i makim Saimon, em i wanpela man Selot. ¹⁹Na Em i makim Judas Iskariot, em i dispela man i givim Jisas i go long han bilong ol birua.

Ol tisa bilong lo i tok olsem, “Belsebul i holim Jisas.”

²⁰Na Jisas i go long wanpela haus. Na wankain olsem long bipo planti manmeri i kam bung na haus i pulap olgeta. Em olsem na Jisas wantaim ol disaipel bilong Em i no inap kaikai. ²¹Na taim ol wanblut bilong Jisas i harim olsem Jisas i stap long haus, orait ol i kam bilong kisim Em. Long wanem? Ol i tingim olsem Jisas i longlong pinis.

²²Na sampela tisa bilong lo i bin lusim Jerusalem na kam i stap. Na ol i tok olsem, “Belsebul i pulap long bel bilong Jisas. Em i yusim strong bilong dispela het man bilong ol spirit nogut bilong rausim ol spirit nogut.”

²³Olsem na, Jisas i singautim ol i kam klostu na Em i mekim tok bokis na tokim ol olsem, “Hau na Satan i ken i rausim Satan, a? ²⁴Tingim. Sapos wanpela lain manmeri i bruk, na ol i pait namel long ol yet, orait dispela lain manmeri bai pundaun olgeta. ²⁵Na sapos wanpela hauslain i bruk, na ol i pait namel long ol yet, orait dispela hauslain bai pundaun olgeta. ²⁶Na sapos Satan i birua long em yet na lain bilong em i bruk, orait em bai pundaun olgeta, na strong bilong em bai pinis olgeta. ²⁷Harim. Wanpela man i no inap i go insait long haus bilong wanpela strongpela man na stilim olgeta kago bilong em nating. Nogat. Pastaim em i mas winim dispela strongpela man na pasim em long rop. Em i mekim olsem pinis, orait nau em i ken i stilim olgeta kago bilong em. ²⁸Mi tok tru long yupela, God i ken i tekewe ol sin wantaim ol tok bilas ol manmeri i save mekim. ²⁹Tasol, ol manmeri i mekim tok bilas long Holi Spirit God i no inap tekewe dispela sin. Nogat. Dispela sin bai i stap oltaim oltaim na ol bai kisim hevi bilong dispela sin bilong ol.”

³⁰Ol tisa bilong lo i bin tok olsem, “Spirit nogut i holim Jisas.” Na long dispela as Jisas i bin mekim ol dispela toktok.

Mama na ol brata bilong Jisas i kam long Em.

³¹Orait, mama bilong Jisas wantaim ol brata bilong Em i kamap long haus, na ol i sanap autsait. Ol i salim wanpela man i go tokim Jisas bilong Jisas i ken i kam autsait. ³²Planti manmeri i sindaun na banisim Jisas. Na ol i tokim Jisas olsem, “Mama bilong Yu wantaim ol brata bilong Yu i stap autsait na ol i laik lukim Yu.”

³³Na Jisas i askim ol olsem, “Husat i mama na brata bilong Mi?

^34-35Na Jisas i lukluk long ol manmeri i sindaun na raunim Em na Em i tok olsem, “Lukim, mama na brata bilong Mi i stap long hia. Ol manmeri i bihainim laik bilong God ol i brata na susa na mama bilong Mi.”