Moning.
Long P.N.G. ol planti man i tingim olsem ol meri mas i stap aninit long man. Ol i tingim olsem ol man i stap antap tumas na ol meri i daun tumas long ol. Ol i tingim olsem man i bikpela samting na meri i liklik samting tumas. Ol i tingim olsem man em i nambawan samting na meri nogat.
Long marit bilong ol sios femili komyuniti bilong God, em ol manmeri i bilipim na trastim God long kisim bek ol long feitful wok bilong Jisas long diwai kros na ol i bihainim Jisas, long sios femili man em i het bilong meri bilong em wankain olsem Krais Em i Het bilong sios. Em olsem na man i mas lavim meri bilong em wankain olsem Jisas i lavim sios bilong Em, na meri i amamas long i stap aninit long dispela kain lavim.
Long sios femili bilong God tupela marit i no ken i stap olsem ol marit manmeri bilong ples na bihainim pasin bilong marit manmeri bilong ples. Nogat. Long sios femili bilong God man bai lavim meri bilong em olsem Jisas i lavim sios na i lusim laip bilong Em bilong baim bek laip bilong manmeri bilong sios, na meri bai amamas bilong i stap aninit long dispela kain lavim bilong man bilong em. Lukim Efesus 5:22-25.
22Yupela meri i laik bihainim Bikpela, yupela mas i stap aninit long man bilong yupela. 23Long wanem, man em i het bilong meri bilong em kain olsem Krais Em i het bilong sios. Sios em i bodi bilong Krais na Krais i bin mekim wok na sevim sios. 24Na wankain olsem sios i save stap aninit long Krais, orait meri i mas i stap aninit long man bilong em long olgeta samting. 25Na yupela man, yupela mas lavim meri bilong yupela olsem Krais i bin lavim sios. Em i bin lusim laip bilong Em yet bilong sevim sios.
Mi laik stretim sampela rong tingting….
Pol i no tok, olgeta meri mas i stap aninit long olgeta man.
Yumi no ken i tingim olsem, dispela tok long lain 22-25 i minim olsem, olgeta meri mas i stap aninit long olgeta man. Nogat. Pol i tok tasol, meri mas i stap aninit long man bilong em yet long marit bilong em. Narapela man em i no het bilong narapela meri. Nogat. Man em i het bilong meri bilong em tasol. Yupela meri, yupela i stap aninit long man bilong yupela yet na em tasol.
Olsem na, yu tingim. Papa bilong yu em i no het bilong yu. Brata bilong yu em i no het bilong yu. Smolpapa bilong yu em i no het bilong yu. Nogat. God i tok, yu mas i stap aninit long man bilong yu. Man bilong yu em i het bilong yu.
Pol i no tok, man em i winim meri.
Dispela tok long lain 22-25 i no tok olsem, man em i bikpela samting na meri em i pipia samting i mas i stap aninit long lek bilong man tasol. Nogat tru!
“Man em i het bilong meri bilong em kain olsem Krais Em i het bilong sios.” Na Krais Em i het bilong sios femili olsem wanem? “Sios em i bodi bilong Krais na Krais i bin mekim wok na sevim sios.” Krais Em i het bilong sios femili bikos Em i bin mekim wok bilong sevim sios femili. Krais Em i het bilong sios bikos Em i dai bilong mekim sios klin long ai bilong God. Em olsem na Krais Em i het bilong sios bikos God i bin makim Krais bilong lukautim sios.
Man em i het bilong meri wankain olsem Krais Em i het bilong sios femili. Man em i het bilong meri bikos God i makim man bilong lukautim meri. Long dispela as tasol man em i het bilong meri. Man em i het bilong meri bikos God yet i bin makim em bilong lukautim meri.
Man i no het bilong meri bikos man em i bikpela samting na meri i samting nating tumas. Nogat tru! Man i no het bilong meri bikos man i winim meri. Nogat tru! Man em i het bilong meri bikos God i bin makim man bilong lukautim meri, na dispela lukautim bai soim lukautim bilong Krais. Taim man i lavim meri bilong em olsem Jisas i lavim sios, orait em i soim lukautim pasin bilong Jisas.
Krais i bin putim sios femili paslain long Em yet na Em i lusim laip bilong Em bilong sevim laip bilong sios femili. Dispela em i pasin bilong lavim. Na wankain olsem, yumi man, yumi mas putim meri bilong yumi paslain long yumi yet, na long dispela pasin yumi lavim em olsem Jisas i lavim sios.
Pol i no tok, meri i mas bihainim tok nogut bilong man bilong em.
Lukluk gen long lain 22. Pol i tok wanem? “Yupela meri i laik bihainim BIKPELA…..” Yumi mas save, meri i stap aninit long BIKPELA – BIKPELA i winim man bilong em na i paslain long man bilong em. Nambawan toktok meri i mas harim na bihainim em i tok bilong BIKPELA, trupela Het bilong em. (Na man i mas holim tingting olsem, BIKPELA Em i het bilong man tu!)
Em olsem na, sampela taim meri i ken i sakim tok bilong man bilong em. Long wanem? BIKPELA tru bilong meri em i no man bilong em, nogat, BIKPELA tru bilong meri em i Krais. Na sapos man i tokim meri long mekim sampela pasin Krais i hetim na Krais i tok “Yu no ken i mekim”, orait meri i mas harim na bihainim tok bilong Krais tasol na sakim tok bilong man bilong em.
Na tingim. Sapos man bilong meri i askim em long mekim sampela pasin i no holi na i no stretpela na i no pas long wei bilong Krais, orait man em i no lavim meri bilong em olsem Jisas i lavim sios femili. Nogat. Man i mas bihainim wei bilong Krais na meri i bihainim man bilong em long olgeta samting i gutpela na i pas long lavim bilong Krais.
Pol i no tok, meri em i wokboi nating bilong man bilong em.
Tingim Adam na Ivi. God i bin givim wok long Adam pastaim (Jenesis 2:15) na bihain God i kamapim Ivi bilong helpim Adam long wok bilong em (Jenesis 2:18). Harim. God i bin givim wok long Adam bilong mekim. Na Em i givim Ivi bilong helpim em long dispela wok. Em i no givim Ivi bai Adam i ken i sindaun nating na meri i kisim na mekim olgeta wok bilong man. Nogat tru! Adam i save gohet long wok God i givim em long mekim na Ivi i bihainim Adam na helpim em long wok God i bin givim em.
Harim. Krais Em i het bilong sios femili komyuniti bilong Em. Krais Em i lida bilong sios femili. Krais i bin gohet long wok bilong soim yumi wei bilong God. Wanem pasin Krais i mekim, yumi sios femili yumi mas bihainim na mekim tu. Krais Em i lida bilong sios femili na Em i soim yumi long rait wei – Em i lidim yumi i go long rait wei bilong God.
Na wankain olsem, man em i het bilong meri – man em i lida bilong meri. Man i mas gohet long wok God i givim em long mekim na meri i mas i stap aninit long man na helpim em long dispela wok. Lida i save go paslain bilong soim wei. Olsem na, man i mas go paslain na soim wei. Dispela em i pasin bilong lavim – man i go paslain na soim wei, na meri bai amamas long i stap aninit long dispela kain lavim.
Glenn.
