Moning.
Yumi no inap stori long ol samting yumi no save long en. Tasol, sapos yumi save gut long sampela samting orait yumi ken i stori i go i go long dispela samting. Na wankain olsem, sapos yumi save long God na yumi save gut long wok bilong God long feitful wok bilong Jisas long diwai kros bilong sevim yumi, orait taim yumi prea maus bilong yumi no inap hevi. Tingim….
- Bai yumi litimapim nem bilong God na bai yumi tok tenkyu long Em bikos yumi klia olsem God Em i gutpela God stret na Em i mekim bikpela na gutpela wok stret bilong helpim yumi. Lukim Efesus 1:3-5.
3Litimapim nem bilong God, Papa bilong BIKPELA bilong yumi Jisas Krais. Em i bin givim olgeta blesim bilong heven long yumi i bilong Krais. 4Long bipo, taim God i no kamapim dispela graun yet, Em i bin makim yumi na pasim yumi long Krais bai yumi i stap holi na i no gat asua long ai bilong Em. Em i bin lavim yumi. 5Na long dispela as Em bin i makim yumi bilong adoptim yumi na mekim yumi kamap pikinini bilong Em long wok Jisas Krais i mekim.
Aposel Pol i tok “Litimapim nem bilong God” na em i stat na tokaut long olgeta blesim God i mekim long ol lain manmeri bilong Em. Blesim bilong God i olsem: God i bin makim ol na pasim ol long Jisas, bai Jisas i mekim ol klin long ai bilong God. Long feitful wok bilong Em long diwai kros Jisas i mekim ol klin, bai God i adoptim ol, kisim bek ol, na mekim ol pikinini bilong Em.
Long rot bilong feitful wok bilong Jisas God Em i fogivim sin bilong ol. Na God i soim plen bilong Em long ol, na God i givim Holi Spirit long ol bilong opim ai na ia na bel bilong ol, bai ol i luksave na harim na bilipim na trastim olgeta wok God i bin mekim bilong ol long feitful wok bilong Jisas. (Efesus 1:6-14.)
Bel na tingting bilong Pol em i pulap long olgeta samting bilong God na em i stori i go i go i go – long dispela as Pol i tokaut “Litimapim nem bilong God” . Tru tumas, God i blesim yumi gutpela tru!
- Bai yumi tok tenkyu long God long wok Em yet i mekim insait long laip bilong yumi. Yumi bai mekim olsem bikos yumi klia olsem i no yumi yet i tanim bel na yumi bilip na yumi pas long wok bilong God, nogat. God tasol i givim bilip long yumi na bringim yumi i kam insait long femili bilong Em – na Em bai i wok yet na pinisim dispela gutpela wok Em i bin statim long laip bilong yumi. Lukim Filipai 1:3-6.
3Taim mi holim tingting long yupela mi save tok tenkyu long God bilong mi. 4Mi save amamas na prea taim mi mekim prea bilong yupela 5bikos long fes de i kam i kam long nau yupela poroman wantaim mipela long mekim wok bilong gutnius. 6Na mi klia olsem God i bin kirapim gutpela wok insait long laip bilong yupela na Em bai i mekim dispela wok i go i go inap long De bilong Krais Jisas.
- Bai yumi askim God long givim ol samting Em i bin promis long givim ol lain bilong Em bikos yumi klia olsem God Em i God bilong kamapim ol promis bilong Em. Na bai yumi amamas long kisim ol dispela samting bikos yumi save long God na yumi laik bihainim Em gut tru. Lukim Jems 1:5.
5Sapos wanpela bilong yupela i sot long gutpela save na tingting, orait ol i mas askim God na Em bai givim dispela samting long yupela. Long wanem, God i save amamas long givim ol gutpela samting long olgeta manmeri.
- Bai yumi putim trabel na hevi bilong yumi long han bilong God – bai yumi askim Em long helpim yumi bikos yumi klia olsem God Em i kea long yumi na Em i save lukautim ol lain bilong Em. Lukim ol wanwan lain long Buk Song 3.
1BIKPELA, ol birua bilong mi i kamap planti moa!
Planti manmeri i kirap na ol i egensim mi;
2planti ol i tok baksait long mi olsem,
“God i no inap sevim em.”
3Tasol Yu, BIKPELA, Yu save raunim mi,
5Mi sindaun long bet na mi slip,
na mi kirap gen bikos BIKPELA i save holim mi.
6Mi no inap pret long hamas tausen manmeri
i raunim mi na i laik egensim mi.
8BIKPELA i save sevim ol pipel bilong Em;
blesim bilong Em i stap wantaim ol pipel bilong Em.
Na lukim Buk Song 4:8.
8Taim mi laik slip, bai mi bel isi na slip;
mi bai bel isi na slip bikos BIKPELA Yu tasol Yu lukautim mi.
- Bai yumi toktok wantaim God olsem God Em i pren yumi ken i trastim. Long wanem, God wanpela i save lavim yumi tru na Em i kea long yumi na Em bai harim gut toktok na krai bilong yumi. Em i no inap lap long yumi olsem sampela manmeri long dispela graun i ken i lap long hevi na krai bilong yumi. God i ken i pilim dispela hevi bilong yumi na raunim yumi na lukautim yumi. Lukim Buk Song 6.
1BIKPELA, plis Yu no ken i krosim mi taim Yu belhat yet,
plis Yu no ken i stretim mi taim bel bilong Yu i paia yet.
2BIKPELA plis mekim marimari long mi, long wanem, klostu mi laik feint.
BIKPELA, plis oraitim mi, long wanem, mi pilim bikpela hevi long olgeta hap bodi bilong mi.
3Na dip insait long laip bilong mi tu, mi pilim bikpela hevi stret.
Hamas taim yet, BIKPELA, hamas taim yet?
4BIKPELA, plis kam na sevim mi.
Long rot bilong feitful lavim bilong Yu, plis sevim mi.
5Long wanem, taim man em i dai pinis em i no holim tingting long Yu.
Long matmat husat bai litimapim nem bilong Yu?
6Mi singaut singaut na strong bilong mi i pinis olgeta.
Olgeta nait aiwara bilong mi i wasim bet bilong mi.
Krai krai bilong mi i kamapim raunwara long metres bilong mi.
7Ai bilong mi i solap na mi no lukim gut wanpela samting,
long wanem, mi gat planti birua na mi karim bikpela hevi.
- Bai yumi tokaut klia long sin bilong yumi bikos yumi klia olsem God i save fogivim sin bilong manmeri i bilipim na trastim wok Jisas i bin mekim bilong mekim ol klin long ai bilong God. Lukim 1 Jon 1:9.
9Sapos yumi konfesim sin bilong yumi, God Em i feitful na tru na Em bai fogivim olgeta sin bilong yumi. Em bai rausim ol pasin nogut bilong yumi na mekim yumi klin.
Sapos yumi save gut tru long God na yumi save gut tru long wok Em i mekim long wok bilong Jisas, orait prea bilong yumi bai kamap narapela kain. Maus bilong yumi i no inap hevi.
Glenn.
