Moning.
Nau olpela yia bilong 2018 i pinis na nupela yia 2019 i kamap. Na long dispela kain taim, taim bilong nupela yia i kamap, orait i gutpela long yumi skelim olpela pasin bilong yumi long yia 2018, na long yia 2019 yumi lusim ol sampela olpela pasin bilong yumi na yumi strongim bel bilong yumi na yumi bihainim nupela pasin i gutpela na i winim ol olpela pasin yumi save mekim.
Yumi save bilipim na trastim God long kisim bek yumi long feitful wok bilong Jisas long diwai kros tasol. Na dispela kain bilip i gutpela tru na i pas olgeta long olgeta tok bilong God. Em olsem na yumi no ken i lusim dispela kain samting. Nogat. Yumi strongim bel bilong yumi bilong bihainim dispela bilipim na trastim i go moa yet.
Tasol yumi mas tingim olsem, “Long wanem as God i kisim bek yumi.” Baibel i tokaut long God i kisim bek yumi bilong senisim yumi, bai yumi kisim na bihainim pasin bilong Jisas. God i kisim bek yumi, bai yumi senis na yumi kamap kain man olsem Jisas – bai tingting bilong yumi na wokabaut bilong yumi i kamap wankain olsem tingting na wokabaut bilong Jisas. Lukim Rom 8:28-29….
28Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em. 29Bipo tru God i save tru long lain bilong Em, na Em i bin makim ol bilong mekim ol i kamap wankain olsem Pikinini bilong Em na bai dispela Pikinini i stap fesbon bilong planti brata.
Bipo tru God i bin makim ol wanwan manmeri na Em i pasim ol long Jisas, na Jisas i mekim wok long diwai kros bilong rausim pe bilong sin bilong ol, bai God i kisim bek ol (Efesus 1:4-8). Holi Spirit i opim ai ia bel bilong ol na ol i tanim bel na ol i bilipim na trastim feitful wok bilong Jisas – ol i bilipim na trastim God long kisim bek ol long feitful wok Jisas tasol. Ol i save olsem, ol yet ol i no fit long wokim wanpela stretpela samting na kamap stretpela manmeri long ai bilong God na God i kisim bek ol. Nogat. Ol i save long rot God yet i kamapim bilong stretim ol na kisim bek ol, na ol i amamas long Em na ol i lavim Em na ol i tok tenkyu long Em long feitful wok bilong Jisas long diwai kros. Em olsem na manmeri God i singautim long laik na plen bilong Em (lain 28), em i ol dispela manmeri.
Gutpela samting na ol hevi i kamap bilong senisim yumi.
Na lain 29 i mekim klia olsem, God i kisim bek ol bilong senisim ol, bai ol i senis na kamap kain man olsem Jisas yet – bai ol i lainim na bihainim olgeta pasin bilong Jisas. God i save bosim na kontrolim olgeta samting long dispela graun bilong senisim ol, na moa na moa ol i senis na kamap olsem Jisas long laip bilong ol long hia long dispela graun. Na dispela i gutpela tru – olgeta samting God i kisim i kam long laip bilong yumi em bilong givim tingting long yumi, bai yumi senisim pasin bilong yumi na yumi lusim pasin bilong ples na yumi kisim nupela pasin i wankain olsem pasin bilong Jisas.
Em olsem na maski gutpela samting i kamap long laip bilong yumi o hevi i kamap long laip bilong yumi, orait ol dispela samting God i bosim na kontrolim bilong senisim yumi – bilong mekim yumi senis na yumi kisim ol pasin bilong Jisas long sindaun na wokabaut bilong yumi. Na dispela i gutpela gutpela samting tru.
Ating planti taim tumas yumi tingim olsem, God i amamas long yumi na Em i kamapim ol gutpela samting long laip bilong yumi. Na planti taim tumas yumi tingim olsem, God i belhat long yumi na Em i kamapim ol hevi long laip bilong yumi. Tasol dispela 2-pela kain tingting i paul olgeta. God i no amamas long yumi na Em i kamapim gutpela samting long yumi, na God i no belhat long yumi na Em i kamapim hevi long laip bilong yumi. Nogat! God i kamapim ol gutpela samting long laip bilong yumi bilong senisim yumi. Na wankain olsem, God i kamapim hevi long laip bilong yumi bilong senisim yumi. God i bosim na kontrolim olgeta samting – ol gutpela samting na ol hevi samting wantaim – bilong senisim yumi, bai yumi wok long kisim tingting na pasin bilong Jisas long laip bilong yumi.
Habakuk i trastim bosim na kontrolim bilong God.
Profet Habakuk i save long dispela samting. God i bin tokim Habakuk long wanpela bikpela hevi bai kamap long ol lain Israel, tasol tingting bilong Habakuk i no paul long wok bilong God long laip bilong Em. Lukim tok bilong Habakuk long Habakuk 3:16-19….
16Mi harim pinis tok bilong BIKPELA na lewa bilong mi em i pam,
na maus bilong mi em i guria.
Ol bun bilong mi i lus na mi no gat strong,
na lek bilong mi em i guria.
Tasol, mi bai stap na wetim dispela samting nogut i laik kamap long ol i laik bagarapim mipela.
17Sapos ol diwai fik i no karim pikinini,
na ol diwai wain i no karim prut.
Na sapos ol diwai oliv i no karim gut ol kaikai,
na ol gaden i no kamapim kaikai.
Na sapos mipela i no gat sipsip i stap,
na mipela i no gat bulmakau i stap.
18Em i orait, mi bai amamas long BIKPELA.
Na mi bai amamas long dispela God bilong helpim mi.
19BIKPELA Bilong Bosim Olgeta Samting Em bai strongim mi.
Em save mekim lek bilong mi i stap strong na mi no ken i pundaun.
Em save strongim mi na litimapim mi.
Habakuk em i man tasol olsem yumi. Olsem na, em i pret long dispela hevi God bai bringim long Em wantaim ol lain bilong em. Tasol, em i no ranawe na em i no givap, nogat. Em i trastim God tasol.
Na Habakuk i tok olsem, maski ol samting bilong sindaun bilong mipela i no kamap, orait em inap. Mi bai trastim God i go yet. Sapos ol birua i kam na bagarapim olgeta samting bilong sindaun bilong mi, em i orait, stil mi bai trastim God na amamas long Em.
Habakuk i kisim trupela bilip long God. Em i trastim God trutru. Olsem na, maski wanem samting i laik kamap long em, orait stil em bai trastim God na bihainim Em. Yu save, God bai strongim em na lukautim Habakuk na Habakuk i trastim God long ol dispela samting. Habakuk i lavim God trutru na em i aninit long God trutru.
Bai yumi trastim God olsem Habakuk i bin trastim God, a? Long yia 2019 bai yumi trastim bosim na kontrolim bilong God – maski Em i kamapim gutpela samting long yumi o Em i kamapim hevi long yumi – bai yumi trastim God long yusim ol dispela samting bilong senisim yumi na moa na moa yumi kisim tingting na pasin bilong Jisas?
Glenn.
