Moning.
Yumi save pinis, i gat planti tok giaman i stap long ples bilong yumi. Tok giaman i no isi long maus bilong planti manmeri long ples na long taun tu. Sampela manmeri i tok giaman nating. Na sampela manmeri ol i wok long giamanim yumi bilong pulim yumi i go long ol samting bilong ol.
Long taun Efesus ating i gat manmeri bilong mekim tok giaman i stap tu. Lukim Efesus 5:3-7.
3Namel long yupela, pasin pamuk na olgeta kain pasin i doti na pasin bilong mangalim ol samting bilong narapela manmeri i no ken i kamap. Long wanem, dispela kain pasin i no rait pasin bilong holi manmeri bilong God. 4Na tu, yupela no ken i mekim doti toktok na stupit toktok na pilai toktok i doti. Dispela kain toktok i no gutpela long yumi i mekim. Mobeta yumi yusim toktok bilong yumi bilong tok tenkyu long God. 5Na yupela mas klia gut olsem, ol manmeri i mekim pasin pamuk na pasin i doti na mangal pasin, ol i save lotuim ol dispela pasin nogut bilong ol, na ol dispela kain manmeri i no inap lukim kingdom bilong Krais na God. 6Nogut sampela manmeri i giamanim yupela long tok gris. Long wanem, ol manmeri i sakim tok bilong God bai pilim bel hat bilong God. 7Olsem na, yupela no ken i poroman wantaim ol dispela kain manmeri.
Long lain 6 aposel Pol i tokim ol manmeri bilong sios i stap long taun Efesus olsem, “Nogut sampela manmeri i giamanim yupela long tok gris. Long wanem, ol manmeri i sakim tok bilong God bai pilim bel hat bilong God.”
Yu save, sampela manmeri i ken i tokim yumi olsem, “Sapos yu laik harim lotu, em i orait, em gutpela. Tasol nogut yu pas tumas long dispela samting na yu spoilim amamas na fan bilong yumi. Olsem na, yu kam na yumi pilai nabaut wantaim ol yangpela meri na em i orait, Sarere na Sande yu ken i harim lotu.” Yu save, ol i ken i grisim yumi long mekim pasin nogut na yumi ken i tingting, “Mi save harim lotu, bai mi i stap orait.”
Ol planti manmeri ol i ken i tokim yumi olsem, “Sapos yu harim lotu na kisim baptais na Lordsapa, em inap, yu no ken i tingting planti – yu no ken i senisim laip bilong yu tumas.” Yu save, sampela manmeri i ken i grisim yumi long larim pasin nogut i stap long laip bilong yumi na ol i ken i tokim yumi olsem, “No ken i wari, bai yu go.”
Yu save long pasin bilong sampela lotu manmeri – ol i tingim olsem ol i ken i holimpas ol pasin nogut na kisim heven tu – ol i tingim olsem, ol i ken i stap olsem ol haiden manmeri na kisim heven wantaim. Tasol ol i giamanim ol yet. Ol i paul. Na ol i ken i paulim tingting bilong yumi tu.
Ol manmeri i les long senisim laip bilong ol, ol bai lus.
Pol i givim bikpela woning long ol manmeri bilong sios Efesus. Em i tok klia olsem, “Ol manmeri i sakim tok bilong God bai pilim bel hat bilong God” – ol i no inap lukim kingdom bilong heven – ol bai lus.
Aposel Pol i mekim strongpela toktok long yumi. Yumi no ken i tingim olsem, yumi ken i holim pipia pasin na pipia toktok na pas long Krais wantaim. Nogat tru. Olsem na, yumi mas lusim ol rabis pasin na yumi bihainim ol pasin i holi na stretpela.
Pasin i holi na stretpela em i mak bilong manmeri bilong bilong God. Manmeri i bilip tru, ol bai wok hat long lusim ol kainkain pasin nogut. Tasol ol manmeri i pas yet long ol kainkain pasin nogut, dispela i soim olsem, ol i giaman na ol i no bilip tru na ol i stap yet aninit long bel hat bilong God – ol i no bilong Em.
Long dispela as aposel Pol i givim bikpela woning long ol manmeri long sios Efesus na long yumi tu. Sapos yu strong na yu no laik senis na lusim ol kainkain pasin nogut, orait dispela i soim olsem yu no bilip tru – yu giaman tasol – na bai yu fesim bel hat bilong God – yu no inap lukim heven.
Nogut sampela manmeri i giamanim yupela long dispela samting….Yupela no ken i paul na yupela tingim olsem yupela ken i pas wantaim Krais na mekim ol kain pasin nogut wantaim.
Yumi no ken i pilai pilai long senisim laip bilong yumi na yumi bihainim na wokabaut long pasin i stretpela na holi.
Senisim laip na bihainim pasin i stretpela na holi em i no samting yumi ken i tingim olsem, “Bai mi mekim o nogat, mi no save.” Nogat. Yumi save olsem, God i kisim bek yumi long feitful wok bilong Jisas tasol. Em olsem na sapos Holi Spirit i bin opim ai na ia na bel bilong yumi na Em i tanim bel bilong yumi pinis na Em i givim bilip long yumi na yumi bilipim na trastim wok Krais i bin mekim bilong mekim yumi klin long ai bilong God, orait yumi bai lusim wei bilong ol haiden manmeri long ples na yumi bai kisim pasin God i save laikim.
Dispela gutpela pasin God i save laikim i no save karim yumi i go long heven. Nogat. Tasol, sapos yumi kisim tingting na yumi strong long senisim laip bilong yumi na yumi trai hat long wokabaut long dispela gutpela pasin God i save laikim, orait dispela i soim olsem, Holi Spirit i bin opim ai na ia na bel bilong yumi na yumi tanim bel tru na yumi bilip tru na yumi pas tru long Krais na yumi insait tru long femili bilong God.
As bilong dispela toktok.
Taim yumi senisim tingting bilong yumi na yumi senisim pasin bilong yumi na yumi wok long lusim ol kainkain pasin nogut olsem Pol i tok, orait yumi stat nau na yumi wokabaut long rot bilong lavim.
Ol sampela manmeri i save tok olsem, “Mipela lain bilong lavim ol manmeri.” Tasol, ol i paulim ol sampela meri, na ol i mekim ol kainkain pasin i doti, na ol i mangalim ol samting bilong narapela manmeri, na ol i mekim ol doti toktok na stupit toktok na pilai toktok i doti. Ol dispela kain pasin i bagarapim ol narapela manmeri – ol dispela kain pasin i bagarapim ol brata na sista. Harim. Sapos ol i mekim olsem, orait ol i no manmeri bilong lavim. Ol i wokabaut yet long pasin bilong ol haiden manmeri. Na ol i no inap lukim kingdom bilong God. Pasin bilong ol i soim olsem, Holi Spirit Em i no opim ai na ia na bel bilong ol na ol i no tanim bel trutru na ol i wokabaut yet long haiden pasin bilong ol.
Tasol yumi i bilipim na trastim God long kisim bek yumi long feitful wok bilong Jisas long diwai kros, na yumi bilipim na trastim na bihainim Jisas, orait yumi no haiden manmeri. Nogat. Holi Spirit i opim ai na ia na bel bilong yumi pinis na feitful wok bilong Jisas i kisim yumi i kam pinis long femili bilong God. Olsem na, yumi bilong God na yumi laik bihainim ol gutpela bilong God, Papa bilong yumi.
Glenn.
