Ol Provep

¹BIKPELA i hetim tru ol giaman skel,
tasol Em i amamas moa long skel i stretpela.
²Sem i save bihainim man i apim em yet,
tasol trupela save i stap wantaim man i sindaun kwait.
³Stretpela tingting bilong ol gutpela man i stiaim ol,
tasol giaman bilong ol man nogut i save distroim ol.
⁴Mani i no inap helpim man long de bilong belhat,
tasol stretpela pasin bai lukautim em.
⁵Stretpela pasin bilong manmeri i wokabaut long stretpela pasin em i lukautim ol,
tasol ol manmeri nogut ol i pundaun long pasin nogut bilong ol yet.
⁶Stretpela pasin bilong ol gutpela manmeri bai lukautim ol,
tasol ol manmeri nogut i kalabus long mangal bilong ol.
⁷Taim man nogut i dai pinis, orait hop bilong em i bagarap,
na tingting bilong em long kisim planti mani i pinis wantaim.
⁸Ol stretpela man bai abrusim trabel,
na ol man nogut bai fesim trabel tasol.

⁹Long maus, ol man nogut i laik distroim neba bilong ol,
tasol trupela save i lukautim ol stretpela manmeri.

¹⁰Taim stretpela man i stap gutpela, orait olgeta manmeri bilong siti i amamas,
na taim ol man nogut i lus, orait i gat bikpela amamas moa.
¹¹Long rot bilong blesim bilong ol gutpela manmeri siti bai kisim gutpela nem,
tasol long maus bilong manmeri nogut siti bai bagarap.
¹²Husat man i tok bilas long neba bilong em, em i no gat save,
tasol man i gat klia tingting i save pasim maus bilong em i stap.
¹³Man i save raun na stori nating long ol samting bilong ol narapela manmeri, em bai tromoi nabaut hait tok bilong pren bilong em,
tasol gutpela man yu ken i trastim em bai larim hait toktok i stap hait.
¹⁴Sapos i no gat gutpela stia tok i stap, orait hauslain bai pundaun,
tasol sapos i gat planti man i stap bilong givim gutpela stia tok, orait hauslain bai i stap seif.
¹⁵Man i mekim promis bilong sapotim wanpela man i kisim dinau, orait em bai lukim trabel,
tasol man i no mekim kain promis olsem, orait em bai i stap seif.

¹⁶Meri i mekim grasia long ol narapela manmeri, em i kisim gutpela nem,
na ol man bilong mekim trabel, ol i kisim mani tasol.
¹⁷Man i mekim gutpela pasin long ol narapela manmeri, em i helpim em yet,
tasol man i no sori liklik long narapela manmeri, em i bagarapim em yet.
¹⁸Man nogut, long wok bilong em, em i kisim samting nating,
tasol gutpela man i planim sit bilong stretpela pasin, em bai kisim gutpela samting tru.
¹⁹Man i feitful long bihainim pasin i stret bai kisim laip,
tasol man i wok long bihainim pasin nogut bai i dai.
²⁰BIKPELA i hetim moa ol manmeri i tingting nogut long bel bilong ol,
tasol Em i amamas long manmeri i wokabaut stret.
²¹Tru tumas, man nogut i no inap abrusim kot,
tasol pikinini bilong stretpela manmeri bai i stap fri.
²²Meri i luk naispela tru tasol em no ai klia na wokabaut long gutpela pasin na em i gat sem,
orait em i olsem naispela ring gol ol i putim long nus bilong pik.

²³Ol stretpela manmeri ol i gat hop, na ol bai lukim gutpela samting tru;
tasol ol manmeri nogut ol i tingim ol bai kisim gutpela samting, na ol bai lukim bel hat.
²⁴Wanpela man i yusim mani bilong em bilong helpim ol narapela manmeri, tasol mani bilong em i kamap moa;
na narapela man i holimpas olgeta mani bilong em, tasol mani bilong em i go sot.
²⁵Husat man i wok long blesim ol narapela manmeri, bai em i kisim blesim,
na man i wok long givim wara, em yet bai kisim wara.
²⁶Ol manmeri bai tok nogut long man i holimpas olgeta wit bilong em,
tasol blesim bai i stap wantaim man i maketim wit bilong em bilong helpim ol manmeri.
²⁷Man i wok strong long bihainim stretpela pasin, em bai lukim wanbel pasin,
tasol ol samting nogut bai kam long man i wok long painim pasin nogut.

²⁸Man i save trastim mani bilong em, bai em i pundaun,
tasol ol stretpela man bai gro olsem nupela kru bilong diwai.
²⁹Man i givim trabel long femili bilong em, em bai kisim win tasol,
na ol ful bai i stap aninit long manmeri i gat trupela save long bel long ol.
³⁰Frut bilong ol stretpela manmeri em i wanpela diwai bilong laip,
na man i soim gutpela rot long ol narapela manmeri em i man i gat trupela save.
³¹Sapos ol stretpela manmeri i kisim hevi bilong sin bilong ol hia long dispela graun,
orait hamas moa bai ol man nogut na ol sin manmeri i kisim hevi bilong sin bilong ol!