Ol Provep

¹Man i amamas long narapela man i stretim em, em i lavim trupela save,
tasol man i les tru long narapela man i stretim em, em i wanpela stupit man.
²BIKPELA Em i wanbel long gutpela man,
tasol Em i daunim man bilong plenim ol pasin nogut.
³Pasin nogut i no inap mekim wanpela man i stap strong na i stap olgeta,
tasol pasin bilong stretpela man i olsem rop bilong diwai i go daun dip tru na wanpela samting i no inap kamautim em.
⁴Meri i gutpela meri stret, em i kraun bilong man bilong em,
tasol meri i kisim sem i kam, em i olsem sik i mekim bun bilong man i sting.
⁵Ol stretpela manmeri ol i tingting long mekim pasin i stret na fea,
tasol stia tok bilong manmeri nogut em bilong giamanim ol manmeri.
⁶Toktok bilong ol man nogut i olsem man i hait bilong kapsaitim blut bilong wanpela man,
tasol maus bilong ol gutpela man i save sevim ol.
⁷Ol man nogut bai bagarap na ol i no inap i stap,
tasol hauslain bilong ol stretpela man bai i stap olgeta.
⁸Ol manmeri bai litimapim nem bilong man i gat gutpela tingting,
tasol man i gat kranki tingting, bai ol i rabisim nem bilong em.
⁹Man i stap man nating na em i gat wanpela wokboi bilong em i stap,
em i winim man i tingim em i bikman, na em i sot long kaikai.
¹⁰Stretpela man i save tingim na rispektim laip bilong ol animal bilong em,
tasol man nogut, long bel bilong em, em i no sori liklik.
¹¹Man i wok long graun bilong em, em bai i gat planti kaikai,
tasol man i bisi long ol samting nating, em i sot long save.
¹²Ol man nogut, ol i save mangalim kago bilong ol kriminal,
tasol rop bilong ol stretpela man em i save karim planti kaikai.
¹³Tok nogut bilong man nogut i save kalabusim em,
tasol ol stretpela man bai eskep long trabel.
¹⁴Planti gutpela samting i save kamap long tok bilong stretpela man,
na wok bilong han bilong em i tanim na blesim em.

¹⁵Long ai bilong ful pasin bilong em i orait,
tasol man i gat trupela save em i ken i harim stia tok.
¹⁶Ol ful bai belhat hariap long tok bilas ol man i mekim long ol,
tasol man i gat save na i skelim gut tru olgeta samting, em bai stap isi.
¹⁷Man bilong autim trupela tok bai i stap trupela witnis,
tasol man bilong mekim giaman tok bai i stap giaman witnis.
¹⁸Tok bilong man i no tingting gut pastaim i olsem wanpela naip i katim i go kam long bel,
Tasol tang bilong ol man i gat trupela save i mekim ol samting i stap orait.
¹⁹Trupela tok bai i stap oltaim oltaim,
tasol giaman tok bai i stap liklik taim tasol.
²⁰Giaman i stap long bel bilong ol man i plenim pasin nogut,
tasol amamas i stap long bel bilong man i strongim pis.
²¹Samting nogut i no inap kam long ol stretpela manmeri,
tasol ol man nogut, trabel bai pulap long ol.
²²BIKPELA i hetim manmeri i mekim tok giaman,
tasol Em i amamas long manmeri i mekim tok i stret na tru.
²³Man i gat save na i skelim gut tru olgeta samting long laip bilong em, em i no bikhet raun long save bilong em,
tasol ol ful i save autim ol stupit toktok bilong ol.
²⁴Man i strong long mekim wok, em bai i stap bosman,
na ol les man bai i stap wokboi nating tasol.
²⁵Wari i save givim hevi long bel bilong manmeri,
tasol gutpela tok bai givim amamas long em.
²⁶Man i stretpela em i gutpela man bilong soim rot long neba bilong em,
tasol laip bilong ol man nogut i paulim manmeri.
²⁷Man i les em i no inap kukim abus bilong em gut,
tasol man i strong long mekim wok em i rispektim samting em i kisim.
²⁸Long rot bilong stretpela pasin laip i stap;
long dispela rot trupela laip bilong oltaim oltaim i stap.