Ol Provep
1Pikinini man i gat trupela save, em i harim tok bilong papa bilong em,
tasol man bilong tok bilas, em i no save harim tok bilong stretim em.
2Long frut bilong maus bilong em, man bai kaikaim gutpela samting,
tasol man bilong giaman, em i laik kros pait tumas.
3Man i lukautim tok bilong maus bilong em, em i lukautim laip;
man i no tingting na i mekim planti toktok, em bai bagarap.
4Man i les, em i mangalim planti samting, tasol em i no kisim wanpela samting,
na man i strong bilong mekim wok em i save kisim gutpela samting tumas.
5Ol stretpela man ol i hetim olgeta giaman,
tasol ol man nogut ol i save kisim sem na trabel i kam.
6Stretpela pasin i lukautim man i wokabaut long stretpela pasin,
tasol sin i save kapsaitim na daunim ol man nogut.
7Sampela man i giaman na i tok, “Mi mani man”, tasol em i no gat wanpela samting;
na sampela man i giaman na i tok, “Mi rabisman”, tasol em i gat planti samting.
8Mani man i ken i baim laip bilong em long mani bilong em,
tasol man i no gat mani em i no inap lukim dispela kain trabel.
9Lam bilong ol stretpela man em i gat gutpela lait tru i stap,
tasol lam bilong ol man nogut bai i dai olgeta.
10Man i apim em yet, pasin bilong em i save kisim trabel i kam,
tasol trupela save i stap wantaim man i orait long wanpela man i stretim em.
11Mani i kamap long rot nogut bai lus nating,
tasol man i wok na i kisim mani isi isi, mani bilong em bai kamap moa.
12Man i gat hop long kisim sampela samting na em i no save kisim, orait dispela bai givim bikpela bel hevi long em,
tasol man i lukim pinis hop bilong em, orait dispela i olsem frut bilong diwai bilong laip.
13Man i bikhet long tok, em i kisim bagarap i kam long em yet,
tasol man i rispektim ol wanwan lo, em bai lukim ol gutpela samting.
14Skul bilong ol man i gat trupela save i olsem wara bilong laip
bai yumi tanim na lusim ol samting i laik banisim yumi long i dai.
15Klia tingting i save kisim wanbel bilong ol man,
tasol rot bilong ol man bilong giaman i bagarapim ol.
16Man i gat save na i skelim gut tru olgeta samting long laip bilong em, long olgeta samting em i wokabaut long trupela save,
tasol ol ful i save soim longlong bilong ol.
17Man nogut i autim tok em i save painim trabel,
tasol man i feitful man bilong autim tok em i save oraitim manmeri.
18Man i pasim bel bilong em long stia tok, em i kisim hangre na sem i kam long em,
tasol man i harim tok bilong man i laik stretim em, ol man bai rispektim em.
19Man i lukim pinis hop bilong em, dispela i swit long laip bilong em,
tasol ol ful i les tru long tanim na lusim ol pasin nogut bilong ol.
20Husat man i wokabaut wantaim man i gat trupela save, em tu bai kamap man i gat trupela save,
tasol man i prenim ol ful bai kisim bagarap.
21Bagarap na trabel i save bihainim ol man nogut,
tasol ol stretpela man bai lukim ol gutpela samting.
22Gutpela man, taim em i dai, em bai putim ol samting bilong em i go long han bilong pikinini na bubu bilong em,
tasol kago ol man nogut i bungim bai go long han bilong ol stretpela manmeri.
23Liklik graun bilong rabisman i ken i karim hevi kaikai,
tasol long pasin i no stret na fea ol i karim ol samting bilong em i go nating.
24Sapos papa i no givim kanda long pikinini man bilong em, orait em i no lavim pikinini bilong em,
tasol papa i lavim pikinini man bilong em, em i save strong long stretim pikinini.
25Ol stretpela manmeri, ol i gat kaikai inap long hangre bilong ol,
tasol bel bilong ol manmeri nogut i hangre long kisim moa.
