Ol Provep

¹Kwaitpela ensa i save slekim belhat,
tasol hatpela tok i save kirapim belhat.
²Tang bilong man i gat trupela save, em i mekim naispela tok,
tasol maus bilong ol ful i kapsaitim ol longlong tok.
³Ai bilong BIKPELA i lukim olgeta samting long olgeta hap,
Em i luksave long ol man nogut na ol gutpela man wantaim.
⁴Tang i tok isi isi em i olsem diwai bilong laip,
tasol tang i mekim kranki tok, em i save bagarapim bel.

⁵Ful i no inap rispektim skul bilong papa bilong em,
tasol man i harim tok bilong stretim em, em i gat save na i skelim gut tru olgeta samting long laip bilong em.
⁶Long haus bilong ol stretpela man i gat planti gutpela samting,
tasol mani bilong ol man nogut i kamapim trabel long ol yet.
⁷Maus bilong man i gat trupela save, em i tromoi gutpela save long ol manmeri,
tasol bel bilong ol ful i no inap tru.
⁸BIKPELA i hetim tru ol ofa bilong ol man nogut,
tasol Em i laikim prea bilong ol stretpela man.
⁹BIKPELA i hetim tru wei bilong ol manmeri nogut,
tasol Em i lavim man i taitim bun long bihainim stretpela pasin.
¹⁰Pe nogut tru i stap bilong man i lusim rot bilong laip;
man i les long harim tok bilong stretim em, em bai i dai.
¹¹Ples bilong daiman na tudak ples bilong bagarap, i stap ples klia olgeta long ai bilong BIKPELA;
hamas moa bel bilong ol pikinini bilong man i stap ples klia!
¹²Man bilong tok bilas, em i no laik wanpela man i stretim em;
em i no inap i go na askim man i gat trupela save.

¹³Amamas long bel bai mekim fes i amamas,
tasol pen na hevi bilong bel i save krungutim laip.
¹⁴Bel bilong man i gat klia tingting, em i wok long kisim save,
tasol maus bilong ol ful i pulimapim bel bilong ol long ol longlong.
¹⁵Ol manmeri i kisim hevi, olgeta de bilong ol i nogut,
tasol manmeri i gat amamas long bel, oltaim ol i sindaun gutpela tru.
¹⁶Man i pret long BIKPELA na i sot
i winim man i gat planti samting na i gat trabel wantaim.
¹⁷Femili i kaikaim kumu tasol na pasin bilong lavim i stap,
i winim ol lain i kaikaim bulmakau na pasin bilong hetim i stap namel long ol.
¹⁸Man bilong belhat hariap, em i save kirapim trabel,
tasol man i no belhat kwik, em i save slekim kros bilong ol man.
¹⁹Rot bilong lesman i olsem banis ol i wokim long flaua i gat nil,
tasol rot bilong man i wokabaut long stretpela pasin em i wanpela stretpela haiwe.

²⁰Sapos pikinini man i gat trupela save, orait papa bai amamas,
tasol sapos man em i wanpela ful, orait em bai rabisim mama bilong em.
²¹Man i sot long save, em i amamas long pasin bilong ol ful,
tasol man i gat klia tingting, em i wokabaut stret na em i no sait sait.
²²Sapos man i no kisim gutpela stia tok pastaim, orait ol plen bilong em i ken i feil,
tasol sapos planti man bilong givim gutpela stia tok i stap, orait plen bilong em bai orait.
²³Man i mekim raitpela ensa stret, em i ken i amamas,
na wanpela gutpela tok long rait taim, em i gutpela samting tru!

²⁴Man i gat trupela save, rot bilong laip i kisim em i go antap,
na em i no inap lukim rot i go daun long ples bilong daiman.

²⁵BIKPELA bai brukim na pundaunim haus bilong man i apim em yet,
tasol Em i putim na lukautim ol bodamak bilong ol wido meri.
²⁶BIKPELA i hetim tru tingting bilong ol man nogut,
tasol gutpela na naispela toktok i klin olgeta long ai bilong Em.
²⁷Man i mangal long mani na i mekim pasin i no stret bilong kisim, em i save kisim trabel i kam long hauslain bilong em,
tasol man i hetim ol kago bilong gris pasin, em bai i stap laip.
²⁸Ol stretpela man, long bel bilong ol, ol i tingting gut pastaim na ol i bekim askim,
tasol ol man nogut, maus bilong ol i save kapsaitim ol rabis toktok.
²⁹BIKPELA i stap longwe tru long ol man bilong mekim pasin nogut,
tasol Em i harim prea bilong ol stretpela manmeri.

³⁰Amamas bilong ai i ken i kamapim amamas long bel bilong manmeri i lukim,
na sampela gutpela nius i ken i kirapim strong long bodi bilong manmeri i harim.
³¹Tok bilong stretim manmeri em i samting bilong laip,
na man i putim ia bilong em long dispela tok bai sindaun wantaim ol man i gat trupela save.
³²Man i givim baksait long gutpela skul, em i hetim em yet,
tasol man i harim tok bilong stretim em, em i kisim klia tingting.
³³Pasin bilong pret long BIKPELA em i skulim manmeri long trupela save,
na man i daunim em yet, bihain em bai kisim ona.