Ol Provep

¹Ol man nogut ol i save ranawe, maski i no gat man i ranim ol,
tasol ol stretpela man ol i strong olsem wanpela laion.

²Taim kantri i bagarap na ol man i bihainim laik bilong ol yet, orait i gat planti man i laik kamap bosman.
Tasol kantri i gat lidaman i gat trupela save na i save long skelim ol samting long gutpela wei,
orait kantri bai i stap gut i go i go.
³Lidaman i daunim ol rabisman,
i olsem bikpela ren i bagarapim olgeta kaikai long gaden.
⁴Ol man i lusim lo, ol bai apim ol man nogut,
tasol ol man i bihainim lo bai egensim ol man nogut.
⁵Ol man nogut, ol i no klia long pasin i stret na fea,
tasol ol man i bihainim BIKPELA, ol i klia olgeta.
⁶Rabisman i wokabaut long pasin i stret na tru,
i winim maniman i wokabaut long pasin nogut.

⁷Man i bihainim lo em i pikinini i gat save,
tasol man i poroman wantaim ol man nogut em i givim sem long papa bilong em.
⁸Man i kamap maniman moa long rot bilong sasim intres long dinau bilong ol rabisman,
em i bungim mani bilong em, bai narapela man i holim na helpim ol rabisman.
⁹Sapos man i pasim ia bilong em na em i les long harim na bihainim lo,
orait prea bilong em bai i stap samting nogut tru.
¹⁰Man i giamanim gutpela man na i kisim em i go long rot nogut,
em bai pundaun long trep bilong em yet,
tasol manmeri i wokabaut long stretpela pasin bai kisim ol gutpela samting bilong bihain.
¹¹Ol maniman, long ai bilong ol yet, ol i tingim olsem ol i man i gat trupela save;
man i no gat mani na i save long skelim ol samting, em i klia olsem, ol maniman i giamanim ol yet.

¹²Taim ol stretpela man i win, bikpela amamas i stap,
tasol taim ol man nogut i kisim gavman, ol manmeri bai hait.

¹³Man i karamapim ol sin bilong em, em i no inap i stap gut,
tasol man i konfesim na lusim ol sin bilong em bai lukim marimari.
¹⁴Blesim i stap long man i pret long BIKPELA olgeta taim,
tasol man i bel strong bai pundaun insait long trabel.
¹⁵Man nogut i lidaman bilong manmeri i nogat strong,
i olsem laion i bikmaus na bea i bel nogut.
¹⁶Lidaman i no gat klia tingting, em bai yusim fos na giaman bilong kisim mani,
tasol lidaman i hetim mani i kamap long pasin nogut, em bai holim sia bilong em longpela taim.
¹⁷Man i kilim narapela man i dai na tingting bilong em i kilim em,
em bai karim dispela hevi i go long matmat bilong em;
na wanpela man no ken i helpim em.
¹⁸Man i wokabaut long stretpela pasin bai kisim helpim,
tasol man i wokabaut long pasin nogut bai pundaun insait long hul.

¹⁹Man i wok long graun bilong em, em bai i gat planti kaikai,
tasol man i bisi long ol samting nating, em bai pulap long nating.
²⁰Man i feitful bai lukim planti blesim,
tasol man i hangre long kisim planti mani, em i no inap eskepim pe nogut.
²¹Wantok sistem em i no gutpela,
na bilong liklik kaikai tasol, sampela man bai mekim pasin nogut.
²²Ol man i gat tingting nogut, ol i hangre long kamap maniman,
na ol i no save olsem, ol bai kamap rabis tru.
²³Man i stretim narapela man, bihain em bai lukim wanbel,
tasol man i mekim naispela toktok nating, nogat.
²⁴Man i stilim ol samting bilong papa o mama bilong em,
na em i tok, “Dispela pasin em i no rong,”
em i stap wanpela bilong ol man bilong bagarapim ol samting.

²⁵Ol man i mangal long mani, ol bai sikrapim trabel,
tasol ol manmeri i trastim BIKPELA bai i stap gut.
²⁶Man i save trastim strong bilong em yet, em i wanpela ful,
tasol manmeri i wokabaut long trupela save, ol bai kisim helpim.
²⁷Manmeri i helpim ol rabisman, ol i no inap sot long sampela samting,
tasol manmeri i pasim ai bilong ol long ol rabisman, ol bai bagarap.

²⁸Taim ol man nogut i kisim gavman, ol manmeri bai hait,
tasol taim ol man nogut i lus olgeta, ol stretpela manmeri bai i stap gut tru na kamap moa.