Ol Provep

¹Man i kisim planti toktok bilong stretim em na em i bel strong na em no senis,
wantu em bai bagarap na sanis bilong em i pinis olgeta.

²Taim ol stretpela manmeri i stap gut tru na kamap moa, olgeta manmeri i amamas,
tasol taim ol man nogut i kisim gavman, olgeta manmeri i bel hevi.

³Man i lavim trupela save, em i givim amamas long papa bilong em,
tasol man i raun long ol 2-kina meri, em i pinisim mani bilong papa.
⁴Long pasin i stret na fea king i strongim kantri bilong em,
tasol ol man i mangal long mani na braibim ol man, ol i bagarapim na pundaunim kantri.
⁵Man i grisim neba bilong em,
em i wokim trep bilong holim lek bilong neba.
⁶Man nogut, sin bilong em i banisim na holim em yet,
tasol stretpela man i amamas na singim song.

⁷Stretpela man em i save long ol lo i stap bilong lukautim ol rabisman,
tasol man nogut em i no save liklik long dispela samting.

⁸Ol man bilong tok bilas, ol i save sikrapim ol manmeri bilong siti,
tasol ol stretpela man, ol i save slekim belhat.
⁹Sapos man i gat trupela save i kotim wanpela ful,
orait ful bai tok kros o lap, na i no gat kwait i stap.
¹⁰Ol man bilong kilim man i dai, ol i hetim man i wokabaut long stretpela tingting,
na ol i laik pinisim laip bilong gutpela man.
¹¹Ol ful ol i no save sotim belhat na tok kros bilong ol,
tasol man i gat trupela save, isi isi em bai slekim belhat na kros bilong ol.
¹²Sapos lidaman i harim na bihainim giaman tok,
orait ol man bilong helpim em, ol bai kamap man nogut.
¹³Rabisman na man i daunim ol rabisman, tupela i stap long wanpela mak tasol;
BIKPELA i bin wokim ai bilong tupela wantaim bai ol i lukim ol samting.
¹⁴Sapos king i feitful long skelim stret kot bilong ol rabisman,
orait sia bilong em bai i stap long femili bilong em oltaim oltaim.
¹⁵Kanda na toktok bilong stretim bai kamapim trupela save,
tasol pikinini ol i larim bai kisim sem i kam long mama bilong em.

¹⁶Taim ol man nogut i stap gut tru na kamap moa, sin tu bai kamap moa,
tasol ol stretpela man bai lukim pundaun bilong ol.

¹⁷Stretim pikinini man bilong yu na em bai kamapim bel isi long yu;
em bai kamapim gutpela amamas long laip bilong yu.
¹⁸Sapos trupela save bilong BIKPELA em i no i stap ples klia, orait ol manmeri bai bihainim laik bilong ol yet,
tasol blesim i stap long manmeri i bihainim tok bilong Em.
¹⁹Toktok tasol i no inap stretim ol wokboi;
ol i ken i harim tok, tasol ol i no bihainim.
²⁰Yu lukim wanpela man bilong hariap tumas bilong mekim toktok, a?
Sanis bilong stretim ol ful i winim sanis bilong stretim dispela kain man.
²¹Sapos yu no stretim wokboi bilong yu taim em i stap yangpela yet,
orait taim em i kamap bikpela em bai bikhet.

²²Man bilong belhat hariap, em i save kirapim trabel,
na man bilong belhat olgeta taim em save wokim planti sin.
²³Pasin bilong apim em yet i kisim man i go daun,
tasol man i daunim em yet bai kisim ona.
²⁴Man i helpim ol stilman, em i hetim laip bilong em yet;
em i klia olsem pe nogut i stap, tasol em i no tokaut na stretim.
²⁵Sapos yu pret long ol man, orait dispela pret bai banisim na holim yu,
tasol man i trastim BIKPELA, em bai i stap seif.
²⁶Planti manmeri ol i laik kisim hevi bilong ol i kam long bikman,
tasol disisen i stret na fea bai yu kisim long BIKPELA tasol.

²⁷Ol stretpela man i hetim ol man i no mekim pasin i stret na fea,
na ol man nogut ol i hetim ol man i wokabaut long stretpela pasin.