Ol Provep
Toktok bilong Agur.
30
1Dispela tok em i tok bilong Agur, pikinini man bilong Jake. Tok bilong Agur i bin kam long BIKPELA.
Agur em i tokaut olsem, “God, mi tait olgeta;
God, mi tait na strong bilong mi i lus olgeta.”
2Ating mi no man na mi i stap olsem wanpela animal,
long wanem, mi no kisim save.
3Mi no kisim trupela save,
na mi no kisim save long MAN i Holi.
4Husat i go antap long heven na i kam daun?
Husat i holim win long han bilong em?
Husat i banisim wara long laplap bilong em?
Husat i wokim olgeta samting long olgeta 4-kona bilong graun?
Wanem nem bilong em? Na wanem nem bilong pikinini man bilong em?
Yu save o nogat?
5Olgeta wanwan tok bilong God i tru olgeta,
na Em i raunim na lukautim ol manmeri i trastim Em.
6Yu no ken i joinim tok bilong yu long tok bilong God;
nogut Em i krosim yu na ol manmeri i save yu man bilong giaman.
7Tupela samting mi laik askim Yu, BIKPELA.
Klostu mi dai, olsem na, plis, Yu no ken i tok nogat.
8Plis rausim olgeta giaman pasin na olgeta giaman tok i go longwe tru long mi.
Na plis, Yu no ken i larim mi i stap rabisman, na Yu no ken i givim planti mani long mi;
givim mi kaikai inap long ol wanwan de tasol.
9Long wanem, nogut mi kisim planti samting na mi givim baksait long Yu na mi tok, “BIKPELA Em i husat?”
Na nogut mi kamap rabisman na mi stil,
na pasin bilong mi i kisim sem i kam long nem bilong God bilong mi.
10Yu no ken i go long bosman na mekim giaman tok bilong daunim wokboi bilong em,
nogut em i singaut long God na yu kisim pe nogut.
11I gat manmeri i stap, na ol i tok nogut na daunim papa bilong ol,
na ol i no blesim mama bilong ol;
12I gat manmeri i stap, na ol i tingim olsem ol i stretpela manmeri,
tasol ol i no klinim na rausim ol pipia pasin long laip bilong ol.
13I gat manmeri i stap, na ol i tingim olsem ol i bikpela samting tru,
na ol i save lukdaun long ol narapela manmeri.
14I gat manmeri i stap, na tit bilong ol i olsem sod,
na i olsem maus bilong ol i pulap long planti sap naip.
Ol i laik kaikaim na pinisim ol rabisim man bilong dispela graun,
na ol i laik rausim ol man i sot na ol i no ken i stap moa namel long ol lain manmeri.
15Lits i gat tupela meri pikinini.
Tupela singaut wantaim, “Givim mi, givim mi.”
I gat 3-pela samting na hangre bilong ol i no inap pinis,
4-pela samting i no inap tok olsem, “Mi inap nau.”
16Ples bilong daiman,
mama i no karim wanpela pikinini,
gaden i sot tru long ren,
na paia i abrusim mak bilong em na i no laik pinis.
17Ai i rabisim papa,
na ai i lap long wait gras mama,
ol kotkot bai kamautim,
na ol bikpela tarangau bai kaikaim.
18I gat 3-pela samting i bikpela samting tumas long mi,
4-pela samting mi no save gut long em.
19Pasin bilong tarangau i flai long skai,
pasin bilong snek i wokabaut long bikpela ston,
pasin bilong sip i go kam long solwara,
na pasin bilong man i pas long klinpela meri bilong em yet.
20Pasin bilong pamuk meri i olsem;
em i kaikai pinis na em i klinim maus
na em i tok, “Mi no wokim wanpela rong.”
21I gat 3-pela samting i mekim ol lain manmeri i guria,
4-pela samting ol lain manmeri ol i no inap larim.
22Wokboi i kamap king,
ful i givim baksait long God na i kisim planti kaikai,
23meri nogut i maritim wanpela man,
na wokmeri i kisim ples bilong bosmeri bilong em.
24I gat 4-pela samting long dispela graun na ol i liklik tru,
tasol ol i gat bikpela save.
25Ol anis, strong bilong ol i liklik tru,
tasol long taim bilong haves ol i bisi long bungim kaikai bilong ol.
26Ol badsa bilong ples ston, ol i no gat strong,
tasol ol i yusim hul bilong ston bilong wokim haus bilong ol.
27Ol grasopa, ol i no gat king bilong ol i stap,
tasol ol i save wokabaut gut tru wantaim.
28Ol liklik palai, manmeri i ken banisim long tupela han,
tasol ol i save raun insait long haus bilong ol king.
29I gat 3-pela samting i wokabaut smat,
4-pela samting i wokabaut gut tru.
30Ol laion, strong bilong ol i winim olgeta animal, na ol i no save surik long wanpela samting,
31ol kakaruk man, na ol man meme,
na king i save olsem sia bilong em i seif olgeta.
32Sapos yu bihainim pasin bilong ol ful na yu apim yu yet,
o sapos yu pasim tok bilong wokim pasin nogut,
orait hariap yu karamapim maus bilong yu long han bilong yu!
33Long wanem, olsem pasin bilong sikrapim susu i kamapim gris,
na pasin bilong sikrapim nus i kamapim blut,
orait pasin bilong sikrapim belhat bai kamapim trabel.
