Ol Provep
Toktok bilong King Lemuel.
31
1Tok King Lemuel i save mekim. BIKPELA i givim dispela tok long mama bilong em na mama i lainim em.
2Pikinini man bilong mi, yu harim. Pikinini man mi i karim long bel bilong mi, yu harim.
Pikinini man i kamap long prea bilong mi, yu harim.
3Yu no ken i pinisim strong bilong yu long ol meri,
yu no ken givim strong bilong yu long ol meri i save pundaunim ol king.
4Lemuel, dispela i no samting ol king i ken i mekim,
pasin bilong dringim wain em i no samting king i ken i mekim,
pasin bilong dringim bia em i no samting lidaman i ken i mekim.
5Nogut ol i dring na lusim tingting long ol lo bilong ol,
na ol i bagarapim ol lo i stret na fea na i stap bilong lukautim ol manmeri i gat hevi.
6Larim ol man bilong bagarap i dringim bia,
larim ol man bilong tingting nogut i dringim wain.
7Larim ol na ol i ken i dringim na lusim tingting long bagarap bilong ol na ol i ken lusim tingting long bel nogut bilong ol.
8Yu mas opim maus bilong yu na difenim ol manmeri i no gat strong bilong difenim ol yet,
yu mas difenim ol lo i stret na fea bilong lukautim ol rabisman.
9Opim maus bilong yu na yu skelim kot long stretpela pasin;
difenim ol lo i stret na fea bilong lukautim ol rabisman na ol man i nidim helpim.
Meri i gutpela meri tru.
10Gutpela meri tru, bai yu painim we?
Tru tumas, gutpela meri em i winim ol ston i dia tumas.
11Man bilong em, em i trastim em long olgeta samting,
na man i gat gutpela meri, em i no sot long wanpela gutpela samting.
12Long olgeta de long laip bilong em, em i kisim gutpela i kam long man bilong em, em i no kisim nogut i kam.
13Em i skelim na kisim gras bilong sipsip na flax
na em i bisi na amamas long mekim wok long han bilong em.
14Em i olsem ol kontena sip;
em i kisim kaikai bilong em longwe na karim i kam.
15Taim em i tudak yet em i kirap,
na em i redim kaikai bilong femili bilong em,
na em i putim kaikai i stap bilong ol wokmeri bilong em.
16Em i yusim save bilong em na em i baim wanpela hap graun,
na long mani bilong wok bilong em, em i planim gaden wain.
17Em i strongim bel bilong em yet na em i mekim wok bilong em,
na han bilong em i gat strong bilong mekim wok.
18Em i save olsem ol samting em i maketim em i kamapim mani,
olsem na, em i no save pasim lam bilong em.
19Long han bilong em, em i holim gras bilong sipsip,
na long pinga bilong em, em i yusim spindel.
20Em i save welkamim ol rabis manmeri,
na long han bilong em, em i helpim manmeri i nidim helpim.
21Taim sno i pundaun long graun, em i no wari long femili bilong em,
long wanem, ol i gat gutpela gutpela kolsiot na ol i stap gut.
22Em i wokim ol naispela betsit na blanket bilong bet bilong em,
na klos bilong em, em i wokim long laplap i gutpela tumas.
23Man bilong em, ol i rispektim em, na long ples bung
em i kisim sia bilong em wantaim ol bikman bilong ples.
24Em i wokim klos long laplap i gutpela tumas na em i maketim,
na em i saplaim ol kampani na ol i salim.
25Em i strongpela meri na em i gat ona na dispela i karamapim em,
na em i redi bilong fesim ol samting bilong ol de bihain.
26Trupela save i stiaim tok bilong em,
long maus bilong em, em i tok isi na autim tok i stretpela na gutpela.
27Em i wok long lukautim olgeta samting bilong femili bilong em,
em i no save sindaun nating na les.
28Ol pikinini bilong em, ol i tok, “Mipela i kisim planti blesim long han bilong mama.”
Man bilong em i mekim wankain tok, na em i litimapim nem bilong em olsem,
29“Planti meri ol i wokim ol gutpela samting,
tasol yu winim ol.”
30Bilas em i no trupela samting, na yangpela skin bai i stap liklik taim tasol,
tasol meri i pret long BIKPELA, dispela meri yu ken i litimapim em.
31Givim ona long em long olgeta wok em i bin mekim long han bilong em,
na larim ol wok bilong em i litimapim nem bilong em long ples bung bilong ol bikman.
