Ol Provep
Papa i gat trupela save i autim gutpela stia tok.
4
1Ol pikinini man, harim toktok bilong papa,
na yu skelim gut na bai yu kisim save i dip tumas.
2Long wanem, mi save givim gutpela toktok long yu.
Yu no ken i lusim tisim bilong mi.
3Taim mi stap pikinini yet wantaim papa bilong mi,
mi no save long wei bilong gutpela sindaun, na mama i no karim ol narapela pikinini yet,
4tasol papa i bin skulim mi na em i tokim mi,
“Larim bel bilong yu i holimpas toktok bilong mi,
harim tok bilong mi na bai yu i stap laip.
5Kisim trupela save, na kisim save i dip tumas.
Yu no ken i lusim tingting, na yu no ken i givim baksait long toktok mi mekim.
6Yu no ken i lusim trupela save na save i dip tumas,
em * bai lukautim yu,
yu lavim em, na em bai raunim na difenim yu.
7Trupela save i nambawan samting,
olsem na, kisim trupela save i dip tumas.
8Lukautim em gut, na em bai litimapim yu.
Sapos yu amamas long kisim na holim em, em bai onarim yu.
9Em bai putim naispela bilas long het bilong yu,
na em bai givim yu wanpela naispela kraun.”
10Pikinini man bilong mi, yu harim na kisim toktok mi mekim,
na bai yu lukim planti yia long laip bilong yu.
11Mi bin skulim yu long wei bilong trupela save,
na mi bin lidim yu i go long rot bilong ol stretpela pasin.
12Taim yu wokabaut, i no gat wanpela samting bai pasim lek bilong yu,
na sapos yu ran, yu no inap pundaun.
13Holimpas tisim yu bin kisim, yu no ken i lusim em,
yu raunim na difenim em, long wanem, em i laip bilong yu.
14Yu no ken i tromoi lek bilong yu long rot bilong man nogut,
yu no ken i wokabaut long wei bilong man i mekim pasin nogut.
15Abrusim rot bilong em, no ken i go long rot bilong em,
givim baksait long rot bilong em, yu abrusim na i go.
16Long wanem, sapos ol i no mekim sampela pasin nogut, orait ol i no amamas long slip,
sapos ol i no mekim wanpela man i pundaun, orait ol bai tanim tanim na ol i no inap slip gut.
17Kaikai bilong ol em i pasin nogut,
na dring bilong ol em i pasin bilong kros pait.
18Tasol rot bilong ol stretpela man i olsem san bilong moningtaim,
lait bilong em i wok long kamap inap long em i kamap strong olgeta.
19Wei bilong ol man i mekim pasin nogut i olsem biknait stret,
ol i no inap save long wanem samting i mekim ol i pundaun.
20Pikinini man bilong mi, harim gut ol toktok bilong mi,
putim ia bilong yu i kam long ol toktok mi mekim.
21Yu no ken i larim em i eskep long yu,
holimpas em long bel bilong yu.
22Long wanem, ol dispela toktok mi mekim em i laip bilong man i lukim,
na i mekim olgeta skin bilong em i kamap gutpela gen.
23Lukautim gut bel bilong yu,
long wanem, long bel bilong yu tasol, laip i save boil i kam antap.
24Rausim olgeta kranki toktok long maus bilong yu,
putim ol tok nogut i go longwe tru long yu.
25Larim ai bilong yu i lukim fran,
larim lukluk bilong yu i go stret tasol.
26Skelim gut rot bilong lek bilong yu,
na bai yu wokabaut gut.
27Yu no ken i sait sait long han sut o long han kais,
stiaim lek bilong yu bilong lusim pasin nogut.
* Long Tok Pisin “em” i ken i makim man o meri. Long tok ples Hibru, taim Buk Provep i diskraibim trupela save, “em” i makim meri.
