Ol Provep
Pasin bilong trupela save.
9
1Trupela save i bin wokim haus bilong em; *
em i sapim 7-pela pos bilong em.
2Em i kilim na redim ol abus bilong em,
na em i tanim na redim wain bilong em,
na em i setim na redim tebol bilong em.
3Em i salim ol yangpela wokmeri bilong em i go singaut,
long taun, long ples i antap tumas, ol i singaut olsem,
4“Husat man i no gat save, em i mas kam long haus bilong mi!”
Long man i sot long gutpela tingting, em i tok olsem,
5“Kam na kaikaim bret bilong mi
na dringim ol wain mi bin tanim na redim i stap.
6Lusim longlong wei bilong yu, na kisim laip,
na wokabaut long rot bilong klia tingting.”
7Sapos yu krosim man i save tok bilas, em bai sutim tok nogut long yu.
Na sapos yu stretim man i mekim pasin nogut, em bai bagarapim yu.
8Yu no ken i stretim man i save tok bilas, nogut em i hetim yu.
Stretim man i gat trupela save, na em bai lavim yu.
9Givim skul long man i gat trupela save, na trupela save bilong em bai kamap moa.
Givim tisim long wanpela stretpela man, na save bilong em bai hip i go antap.
10Pasin bilong pret long BIKPELA em i stat bilong trupela save;
kisim save long MAN i Holi, na tok i dip tumas bai kamap ples klia.
11Long rot bilong mi, bai yu i stap longpela taim,
na mi bai joinim planti yia long laip bilong yu.
12Sapos yu kisim trupela save, orait trupela save bilong yu bai helpim yu.
Sapos yu mekim tok bilas, orait yu yet yu bai safa.
Pasin bilong ol ful.
13Wanpela meri, nem bilong em Ful, em i bikmaus meri;
em i pulap long tok gris na em i no gat save.
14Em i sindaun long haus dua bilong em;
long taun, long ples i antap tumas, em i sindaun,
15na em i singaut long husat i wokabaut i go,
long ol manmeri i wokabaut stret long rot bilong ol, em i singaut olsem,
16“Husat man i no gat save, em i mas kam long haus bilong mi!”
Long man i sot long gutpela tingting, em i tok olsem,
17“Wara yu stilim em i swit,
na bret yu kaikai long ples hait em i naispela tru.”
18Tasol dispela man, em i no save olsem, ol daiman i stap long haus bilong dispela meri,
na ol visita bilong em i stap daunbilo long hel.
* Long Tok Pisin “em” i ken i makim man o meri. Long tok ples Hibru, taim Buk Provep i diskraibim trupela save, “em” i makim meri.
