Moning.
Mi laik askim wanpela askim pastaim na yumi skelim. God i save blesim olgeta manmeri long dispela graun o Em i save blesim manmeri i bilipim na trastim God long kisim bek ol long feitful wok bilong Jisas tasol? Yu gat wanem tingting?
Yu save, taim God i salim gutpela ren, orait dispela ren i save pundaun long gaden bilong ol manmeri i bilipim na trastim God long kisim bek ol long feitful wok bilong Jisas, na em i pundaun long gaden bilong ol manmeri i givim baksait long Jisas tu. Ren em i wanpela gutpela blesim bilong God, na God i ken i tilim dispela blesim long olgeta manmeri maski ol i givim baksait long Em o nogat.
Na God i bin givim planti gutpela blesim bilong Em long yumi olgeta manmeri bilong PNG. Yu tingim. God i givim gutpela graun long yumi, na gutpela kaikai long yumi, na gutpela san long yumi, na gutpela bus long yumi. Na Em i bin givim kopi long yumi bilong kamapim sop mani na mani bilong helpim ol femili bilong yumi. Yu save, ol dispela samting em i gutpela blesim bilong God, na God i bin tilim ol dispela kain blesim long olgeta manmeri bilong PNG maski ol i bilipim na trastim God long kisim bek ol long feitful wok bilong Jisas o nogat. God i bin tilim ol dispela kain blesim long olgeta manmeri wantaim.
Tasol, dispela i no minim olsem God i save givim olgeta blesim bilong Em long olgeta manmeri. Nogat. I gat sampela blesim God i no inap givim ol manmeri i givim baksait long Em na i givim baksait long Pikinini bilong Em.
Buk Efesus em i wanpela pas aposel Pol i bin raitim na i salim i go long ol manmeri bilong God i stap long taun Efesus. Na long dispela pas Pol i tok olsem, God i save givim olgeta blesim bilong heven long yumi i bilong Krais. God i no givim olgeta blesim bilong heven long olgeta manmeri. Nogat. Em i givim olgeta blesim bilong heven long manmeri i pas long Krais – em ol manmeri i bilipim na trastim God long kisim bek ol long feitful wok bilong Jisas long diwai kros tasol (na ol i no tingting long God i ken i kisim bek ol long ol narapela samting olsem baptais na Sabat na ol gutpela pasin na ol kain samting olsem). Lukim Efesus 1:1-3.
1Mi Pol mi raitim dispela pas. Na mi aposel bilong Krais Jisas. Long laik bilong God mi stap aposel. Mi salim dispela pas long yupela, ol manmeri bilong God i stap long taun Efesus. Yupela manmeri i bihainim tru Krais Jisas. 2God, Papa bilong yumi, wantaim BIKPELA Jisas Krais i ken i mekim grasia long yupela na mekim bel isi long yupela.
3Litimapim nem bilong God, Papa bilong BIKPELA bilong yumi Jisas Krais. Em i bin givim olgeta blesim bilong heven long yumi i bilong Krais.
Yumi tok pinis olsem, God i ken i tilim ren na san na ol kainkain samting olsem long olgeta manmeri. Dispela em i tru. Tasol Em i no inap givim olgeta blesim bilong heven long olgeta manmeri. Em i givim olgeta blesim bilong heven long ol manmeri i pas long Krais tasol. Em i givim olgeta blesim bilong heven long ol manmeri i bilipim na trastim God long kisim bek ol long feitful wok bilong Jisas.
Ating sampela manmeri i save tingim olsem, “Sapos mi harim lotu na mi bihainim ol misin pasin na mi baptais na mi kisim Lordsapa na mi stap gutpela man na mi lavim ol manmeri, orait bai mi lukim olgeta blesim bilong heven.” Na sampela manmeri i tingim olsem, “Sapos mi pas long sios bilong waitman, orait bai mi lukim ol blesim bilong heven.”
Tasol ol i rong. Olgeta blesim bilong heven i no bilong dispela manmeri. Nogat tru. Olgeta blesim bilong heven em bilong manmeri i pas long Krais. Em bilong manmeri i bilipim na trastim God long kisim bek ol long feitful wok bilong Krais tasol na i bihainim Krais tasol.
Lukim Rom 8:17….
17Na sapos yumi pikinini bilong God, orait ol samting God i laik givim Krais yumi tu bai kisim.
Olgeta samting God i laik givim Krais, orait yumi i pas long Krais – yumi i bilipim na trastim God long kisim bek yumi long feitful wok bilong Jisas tasol – orait yumi tu bai kisim. Olgeta samting Krais i kisim, yumi tu bai kisim – olgeta samting!
Long Efesus 1:3 God i no tok olsem, Sampela blesim bilong heven em bilong ol manmeri i pas long Jisas. Nogat. Em i tok, Olgeta blesim bilong heven em bilong ol manmeri i pas long Jisas. Olgeta blesim bilong heven em bilong ol.
Olgeta blesim bilong heven, olgeta samting bilong heven, olgeta samting long sait bilong heven, olgeta blesim bilong heven em bilong yumi i pas long Jisas. Olgeta samting Jisas i kisim, orait yumi tu bai kisim.
Samting bilong dispela graun i no stap long wanpela level.
Tingim. Long dispela graun yumi no kisim ol samting long wanpela level. Nogat. Sampela manmeri i gat planti mani, narapela manmeri nogat. Sampela manmeri i gat gutpela gris long graun bilong ol, narapela manmeri nogat. Sampela manmeri i slip long gutpela haus, narapela manmeri nogat. Sampela manmeri i gat ka, narapela manmeri nogat. Yu save, long ol wanwan liklik blesim long dispela graun yumi no kisim long wanpela level. Nogat.
Tasol, bilong yumi i pas long Krais, yumi wanwan, maski yu blek skin o yu wait skin, maski yu saveman o yu no saveman, maski yu wanem kain man, sapos yu pas long Krais, orait olgeta blesim bilong heven em bilong yu.
Yumi no save long wanem as God i givim planti kago bilong dispela graun long sampela manmeri na Em i givim liklik kago long narapela manmeri. Tasol wanpela samting yumi klia long em, long sait bilong ol blesim bilong heven, God i givim olgeta blesim bilong heven long yu (sapos yu pas tru long Krais) na Em i givim olgeta blesim bilong heven long mi (sapos mi pas tru long Krais).
Litimapim nem bilong God!
Ating yumi save komplen tumas. Olgeta taim yumi gat sampela komplen long sampela samting. Na jelas tu i save stap namel long yumi. Long wanem, yumi tingting tumas long olgeta samting bilong dispela graun na yumi no holim tingting long olgeta blesim bilong heven God i givim yumi. God i givim olgeta blesim bilong heven long yumi olgeta i pas tru long Krais, olsem na, i no gat as long yumi komplen na i no gat as long yumi jelas long narapela manmeri.
Mobeta yumi stap olsem aposel Pol na yumi litimapim nem bilong God tasol, na yumi amamas tasol long God, na yumi tok tenkyu long God (Efesus 1:3).
Glenn.
