Moning.
Yu olsem wanem? Yu gutpela man o yu man nogut? Yu gutpela meri o yu meri nogut? Yu gat sin i stap long laip bilong yu, a? Yu sem long laip bilong yu, a? Yu sem long pasin bilong yu, a? Long wokabaut bilong yu na long sindaun bilong yu i gat planti rong na planti mistek i stap, a? Yu lukim planti sin na feil i stap long laip bilong yu, a?
Sapos yu tingim olsem, “Tru tumas, mi no gutpela na mi no stretpela long ai bilong God,” orait harim, yu no i stap wanpis. Nogat. Planti manmeri i stap olsem yu na i kisim wankain tingting olsem yu. Na Aposel Pol i stap olsem yu na i kisim wankain tingting olsem yu. Long Rom 3:9-12 Aposel Pol i mekim tok olsem,
Yumi klia olsem sin i karamapim yumi olgeta, yumi ol lain Juda na ol lain Jentail wantaim. Dispela kain tok i stap pinis long Buk bilong God na i tok,
“I no gat wanpela manmeri i stretpela, nogat tru.
I no gat wanpela manmeri i gat gutpela tingting,
na i no gat wanpela manmeri i save bihainim God.
Olgeta manmeri ol i bin givim baksait long God,
olsem na, olgeta i kamap manmeri nogut.
I no gat wanpela manmeri i save mekim gutpela pasin.
Tru, i no gat wanpela.”
Taim Pol i makim ol Juda manmeri, orait em i makim manmeri i save lotu long God. Ol Juda ol i lotu lain. Na taim Pol i makim ol Jentail manmeri, orait em i makim ol haiden manmeri. Em olsem na, Pol i tok olsem, ol manmeri i save lotu long God wantaim ol haiden manmeri, olgeta ol i sin manmeri na ol i no stretpela na gutpela manmeri. Tupela kain manmeri i stap wankain long ai bilong God. Olgeta i sin manmeri. I no gat wanpela bilong ol i stap stretpela na gutpela manmeri long ai bilong God. Tru, i no gat wanpela.
Long dispela tok Aposel Pol i makim em yet. Dispela tok i holim Pol wantaim yu na mi.
Em olsem na, sapos yu tingim olsem, “Yes, mi olsem Pol i tok. Tru tumas, mi gat planti sin i stap long laip bilong mi. Tru tumas, mi no gutpela na mi no stretpela,” orait plis harim, Jisas i bin kam bilong helpim kain manmeri olsem yu. Harim nek bilong Jisas yet,
Long wanem, Pikinini Bilong Man i kam bilong painim ol manmeri i lus na kisim bek ol. (Luk 19:10)
Pikinini Bilong Man Em i Jisas, na Em i kam bilong mekim wok bilong helpim kain manmeri olsem yu na olsem mi. Jisas i save fogivim manmeri i tanim bel na i kam bek long God na i bilipim na trastim feitful wok bilong Jisas long diwai kros. Jisas i stretim kot bilong ol na i mekim ol i stap orait long ai bilong God na ol i no ken i fesim hevi bilong sin bilong ol.
Harim ol wanwan nek bilong God yet,
God i bin salim Jisas i kam, na Jisas i kisim pe bilong sin na Em i dai, na blut bilong Em i kapsait bilong tekewe bel hat bilong God long sin bilong manmeri i bilipim na trastim Krais Jisas. Rom 3:25.
Krais yet i no save liklik long sin. Tasol, bilong helpim yumi, God i mekim Em i kamap sin samting. God i mekim olsem bai yumi, long wok bilong Krais, i ken i kamap stretpela manmeri bilong God. 2 Korin 5:21.
Krais yet i hangamap long diwai kros na Em i karim sin bilong yumi long bodi bilong Em. Em i mekim olsem bai yumi lusim wei bilong sin na yumi bihainim wei bilong stretpela pasin. Em i bin kisim bagarap bilong oraitim yumi. 1 Pita 2:24.
Yumi olgeta manmeri yumi sin manmeri na yumi no gutpela na yumi no stretpela. Tasol, tenkyu tru long God. God i salim Jisas i kam long dispela graun bilong mekim wok bilong tekewe pe bilong sin bilong yumi – yumi i lusim ol narapela kainkain rot (tanim bel) na i kam bek long God na i bilipim na trastim feitful wok bilong Jisas long diwai kros.
Glenn.
