Moning.
Pikinini Bilong Man Em i wanem kain man? Jisas Em i wanem kain man? Yumi ken i save olsem, pasin bilong Jisas, pasin bilong Pikinini Bilong Man, Em i no olsem pasin bilong yumi na Em i no olsem pasin bilong ol manmeri bilong dispela graun. Jisas Em i man olsem yumi i man, tasol pasin bilong Em i no olsem pasin bilong yumi ol manmeri. Nogat. Pasin bilong Jisas Em i oposit long pasin yumi.
Oposit pasin.
Na yu save long dispela tok “oposit”. Blek em i oposit long wait. Wet em i oposit long drai. Longpela em i oposit long sotpela. Antap em i oposit long daunbilo. Pasin bilong Jisas Em i oposit long pasin bilong yu na mi. Pasin bilong Jisas Em i narapela kain pasin na i no olsem pasin bilong ol manmeri bilong dispela graun.
Yumi skelim toktok i stap long Mak 10:35-45. Pasin bilong Jems na Jon na pasin bilong ol narapela disaipel i soim pasin bilong yumi manmeri bilong dispela graun. Tasol pasin bilong Jisas em i oposit long pasin bilong Jems na Jon na ol narapela disaipel. Skelim toktok na tingim.
35Jems na Jon, tupela pikinini bilong Sebedi, tupela i kam klostu long Jisas na tokim Em olsem, “Tisa, mitupela laik askim Yu long wanpela samting, na mitupela laikim Yu mas mekim dispela samting bilong mitupela.”
36Na Jisas i tok, “Yutupela i laikim Mi mekim wanem samting bilong yutupela?”
37Na tupela i bekim olsem, “Taim Yu kamap bikpela king pinis, orait larim wanpela bilong mitupela i sindaun long han sut bilong Yu na narapela i sindaun long han kais.”
38Na Jisas i tokim tupela olsem, “Yutupela no save long wanem samting yutupela i askim Mi. Yutupela inap dring long dispela kap Mi bai dring long em, a? Na yutupela inap kisim dispela baptais Mi bai kisim, a?”
39Na tupela i bekim olsem, “Mitupela inap.”
Na Jisas i tokim tupela olsem, “Yes, yutupela bai dring long dispela kap Mi bai dring long em, na yutupela bai kisim dispela baptais Mi bai kisim. 40Tasol, dispela samting bilong sindaun long han sut na han kais wantaim Mi, dispela i no samting Mi ken i makim na givim yutupela. Nogat. God i bin redim dispela samting bilong manmeri Em i bin makim bilong kisim.”
41Taim narapela 10-pela disaipel i harim dispela tok, orait ol i bel nogut long Jems na Jon.
42Na Jisas i singautim olgeta i kam klostu na Em i tokim ol olsem, “Yupela save pinis, ol lida bilong ol lain Jentail ol i bikhet na bosim ol manmeri, na ol bikman bilong ol i save bosim ol strong. 43Tasol yupela no ken i mekim olsem. Nogat. Sapos wanpela bilong yupela i laik kamap bikman, orait em i mas mekim wok olsem em i wanpela wokboi bilong yupela. 44Na sapos wanpela bilong yupela i laik kamap nambawan, orait em i mas mekim wok olsem em i wokboi nating bilong yupela olgeta. 45Pikinini Bilong Man Em i no kam bilong mekim ol manmeri i stap wokboi bilong Em. Nogat. Em i kam bilong mekim wok bilong helpim ol na bilong givim laip bilong Em yet bilong baim bek ol dispela planti manmeri.”
Pasin bilong ol manmeri bilong dispela graun.
Taim Jems na Jon i askim Jisas long sindaun long han sut na han kais long Jisas insait long kingdom bilong Em, orait dispela askim i putim tupela long ples klia. Em olsem na i klia olsem tupela i laik kamap bikpela na tupela i laik kisim biknem na tupela i laik kisim posisen na tupela i laik winim ol narapela disaipel. Tupela i laik i stap paslain long ol narapela disaipel na paslain long olgeta manmeri bilong kingdom bilong God.
Na ol narapela disaipel ol i kros long Jems na Jon. Long wanem, ol yet ol i laik i kamap bikpela na i kisim biknem na i holim posisen na i winim ol narapela manmeri na i stap paslain. Yu save, dispela kain pasin em i pasin bilong yumi manmeri bilong dispela graun.
Na Jisas i putim pasin bilong ol lidaman bilong dispela graun long ples klia. Jisas i tok olsem, ol lidaman bilong dispela graun ol i bikhet na bosim ol manmeri, na ol i bosim ol strong tumas. Em olsem na Jems na Jon wantaim olgeta disaipel ol i laik kamap lidaman long kingdom bilong Jisas na ol i laik bosim ol manmeri olsem. Ol disaipel i stap olsem ol manmeri bilong dispela graun na ol i laik bihainim wankain pasin bilong bosim na winim ol narapela manmeri.
Pasin bilong Jisas em i oposit long pasin bilong ol manmeri.
Na Jisas i tokaut long narapela kain pasin. Em i tokaut long pasin bilong Em yet. Na dispela pasin bilong Jisas em i oposit long pasin bilong ol disaipel na long olgeta manmeri bilong dispela graun. Jisas i tok, “Pikinini Bilong Man Em i no kam bilong mekim ol manmeri i stap wokboi bilong Em. Nogat. Em i kam bilong mekim wok bilong helpim ol na bilong givim laip bilong Em yet bilong baim bek ol dispela planti manmeri.”
Jisas Em i no tingim Em yet, na Em i no tingim gutpela nem bilong Em yet, na Em no tingim posisen bilong Em yet, na Em i no tingim namba bilong Em yet. Nogat. Em i tingim ol planti manmeri na Em i daunim Em yet na Em i lusim laip bilong Em bilong baim bek laip bilong ol. Yu save, pasin bilong Jisas Em i oposit long pasin bilong yumi manmeri bilong dispela graun.
Oposit pasin bilong Jisas em i pasin bilong kingdom bilong God.
Em olsem na, yumi i tanim bel na i kam long Jisas na yumi bilipim na trastim God long kisim bek yumi long feitful baim bek wok bilong Jisas long diwai kros, orait yumi mas save olsem, yumi kam nau long nupela pasin long laip bilong yumi. Yumi i laik bihainim Jisas, orait yumi kam long pasin i oposit long pasin bilong ol manmeri bilong dispela graun.
Lukim na skelim Efesus 4:17-32.
Yumi no ken i paul.
Harim. Yumi i bilipim na trastim na bihainim Jisas, orait yumi no wok long mekim ol oposit pasin bai God i laikim pasin bilong yumi na kisim bek yumi. Nogat tru! God i kisim bek yumi pinis long feitful baim bek wok bilong Jisas, na long dispela as yumi laik bihainim Jisas na yumi laik bihainim oposit pasin bilong Jisas. Em olsem na, yumi laik bihainim ol oposit pasin bilong Jisas bilong rispektim Jisas. Yumi laik bihainim ol oposit pasin bilong Jisas bilong soim tenkyu bilong yumi long feitful baim bek wok bilong Jisas. Yumi laik bihainim ol oposit pasin bilong Jisas bikos God i kisim bek yumi pinis long feitful wok bilong Jisas na kisim yumi i kam insait pinis long femili bilong Em.
Amamas long bihainim oposit pasin bilong Jisas.
Sapos yu amamas long feitful baim wok bilong Jisas long diwai kros na yu amamas long God i kisim bek yu long feitful baim bek wok bilong Jisas long diwai kros, orait yu mas amamas tu long bihainim ol oposit pasin bilong Jisas long wokabaut na long sindaun bilong yu. Long wanem, taim yu tanim bel na yu kam long Jisas na yu bilipim na trastim feitful baim bek wok bilong Em long diwai kros, orait dispela i minim olsem yu kam tu long ol oposit pasin bilong Jisas long olgeta samting long laip bilong yu.
Glenn.
