Moning.
Yu gat wanem tingting…. Sapos Jisas i kam lukim yumi long sios bilong yumi, orait Em bai amamas long lukim wanem samting?
Jisas i laik lukim bikpela haus lotu i gat kapa i stap, a? Jisas i laik lukim sios bilong yumi i kamap bikpela na i winim ol narapela sios, a? Jisas i laik lukim yumi i putim ol naispela klos na mekim gras bilong yumi i kamap bikpela na yumi harim lotu, a? Ating mi mas tok klia olsem, Jisas Em i no save tingim ol dispela kain samting – Em i no intres long ol dispela kain samting.
Na mi no minim olsem ol dispela samting em i samting nogut na i tambu, nogat. Haus lotu em i gutpela samting. Na sapos planti manmeri i kam harim Tok bilong God wantaim yumi, orait dispela tu em i gutpela samting. Na sapos yumi laik waswas na putim gutpela klos na kam harim lotu, orait em i no gat samting.
Tasol, ol dispela samting em i no nambawan samting – i no gat tambu long ol dispela samting – tasol ol dispela samting i no bikpela samting. Ol dispela samting i no nambawan samting.
Orait, wanem samting em i nambawan samting bilong sios? Wanem samting em i bikpela samting bilong sios femili komyuniti bilong God? Lukim Efesus 1:15-16.
15Mi bin harim stori bilong bilip bilong yupela long BIKPELA Jisas na hau yupela save lavim olgeta manmeri bilong God. 16Olsem na, olgeta taim mi tok tenkyu long God long yupela, na taim mi prea mi save holim tingting long yupela na mi prea.
Aposel Pol i harim stori long 2-pela samting long ol manmeri bilong sios femili bilong God long taun Efesus…
- Em i harim stori long bilip bilong ol long BIKPELA Jisas.
- Em i harim stori long hau ol i lavim olgeta manmeri bilong God.
Taim aposel Pol i harim stori bilong dispela 2-pela samting, orait Em i tok tenkyu long God! Em i amamas long harim dispela 2-pela samting i kamap long ol na em i tok tenkyu long God!
Yu save, dispela 2-pela samting em i bikpela samting long trupela sios femili komyuniti bilong God. Dispela tupela samting em i nambawan samting bilong trupela sios femili bilong God, na taim Pol i harim stori long dispela samting i kamap namel long ol, orait em i amamas na tok tenkyu long God.
Orait yumi skelim dispela 2-pela samting na bai yumi klia long wanem samting i mas i stap nambawan samting bilong sios femili bilong yumi.
1. Long sios, ol manmeri bilong God ol i save holim trupela bilip long BIKPELA Jisas.
Yumi save pinis, long Papua Niugini i gat planti kainkain grup nabaut i stap, na ol i tokaut olsem, “Mipela sios”. Hau na bai yumi ken i klia olsem, husat i sios bilong God na husat i no sios bilong God? Yumi ken i save, long wanem, long trupela sios bilong God – ol trupela manmeri bilong God – ol bai holim trupela bilip.
Ol manmeri God i pasim long sios femili komyuniti bilong Em, ol i save bilipim na trastim trupela gutnius i tokaut long wok God i mekim long dai bilong Krais bilong kisim bek ol. Trupela gutnius i tokaut olsem, God i kisim bek sin manmeri long feitful wok bilong Jisas long diwai kros tasol, na Em i no kisim bek wanpela sin manmeri long ol gutpela wok bilong ol, na Em i no kisim bek ol long baptais bilong ol o Sabat na Sande samting bilong ol.
Long trupela sios, ol trupela manmeri bilong God, ol i bilipim na trastim na lavim na bihainim trupela gutnius. Ol i bilipim na trastim God long kisim bek ol long feitful wok bilong Jisas long diwai kros tasol, na ol i tanim bel long ol narapela kainkain bilip bilong ol na ol i bihainim Jisas tasol.
Taim aposel Pol i harim stori bilong trupela bilip bilong ol manmeri i stap long sios long taun Efesus, em i amamas na em i tok tenkyu long God. Long wanem? Em save olsem, sios bilong taun Efesus em i kamap long trupela wok bilong God. Sios femili i kamap long trupela wok bilong God bikos ol i bilipim na trastim na bihainim trupela gutnius bilong God. Ol i gat trupela bilip long feitful wok bilong Jisas long diwai kros.
2. Long sios, ol manmeri bilong God ol i save lavim ol narapela manmeri bilong God.
Yumi tok pinis olsem, trupela sios femili bilong God ol i bilipim na trastim trupela gutnius bilong God. Tasol tu, ol manmeri bilong God long trupela sios femili bilong Em, ol bai lavim ol narapela manmeri bilong God, em ol manmeri i bilipim na trastim trupela gutnius bilong God. Dispela em i wanpela bikpela mak bilong ol trupela lain bilong Jisas. (Yu ken i lukim na skelim Jon 13:34-35 na Jon 15:13 wantaim Efesus 1:7-8. Na tu yu ken i lukim na skelim 1 Korin 13:4-7).
Tingim na skelim….
- Yumi ken i lavim ol narapela manmeri bilong God bikos yumi save long lavim bilong God.
God i bin lavim yumi na Em i bin mekim olgeta wok bilong kisim yumi i kam insait long nupela femili komyuniti bilong Em. Yumi no gutpela manmeri na God i bringim yumi i kam insait. Nogat tru. Yumi manmeri nogut na yumi bin mekim pasin God i save hetim. Tasol, Em i bin lavim yumi na Em i mekim olgeta wok pinis long dai bilong Jisas long diwai kros bilong kisim yumi i kam insait long femili bilong Em na insait long olgeta blesim bilong heven.
- Na yumi ken i lavim ol narapela manmeri bilong God bikos nau yumi save olsem, ol dispela manmeri ol i brata na susa trutru bilong yumi.
Yumi save long plen bilong God. God i wok long kamapim wanpela nupela komyuniti nau na bihain dispela nupela komyuniti tasol bai i stap na olgeta olpela komyuniti bai pinis. Olsem na, brata na susa trutru bilong yumi ol i no ol sampela hauslain bilong dispela graun. Nogat. Ol trupela lain bilong yumi em olgeta manmeri i tanim bel na i bilipim na trastim God long kisim bek ol long feitful wok bilong Jisas long diwai kros tasol, em ol manmeri i bihainim trupela gutnius bilong God. Ol trupela lain bilong yumi em ol manmeri God i save kisim i kam insait long nupela femili komyuniti bilong Em na long olgeta blesim bilong heven wantaim Jisas.
Wanem samting i nambawan samting bilong yu?
Bikpela haus lotu, a? Pulim planti manmeri na lotu bilong yu i mas winim ol narapela lotu, a? Harim. Trupela bilip wantaim pasin bilong lavim tru ol manmeri bilong God, dispela em i nambawan. Yumi mas askim God long helpim yumi holim trupela bilip na bihainim wei bilong lavim ol brata na susa i bilip tru long Krais.
Glenn.
