Moning.
Yu gat wanem tingting – Jisas i kam bilong mekim wanem?
- Sampela manmeri i tok olsem, Jisas i kam tasol bilong soim yumi stretpela pasin na hau yumi ken i mekim stretpela pasin long wokabaut na sindaun bilong yumi.
- Na sampela manmeri tingim olsem, Jisas i soim yumi ol gutpela pasin yumi ken i mekim bai God i amamas long yumi na kisim bek yumi.
- Sampela manmeri i pilim olsem, Jisas i kam bilong autim tok bilong God tasol, Em i wanpela prisa man tasol.
- Na sampela manmeri i bilip olsem, Jisas i kam tasol bilong stretim sik bilong ol manmeri na bilong soim lavim bilong Em long ol manmeri.
Jisas yet i tok wanem?
Orait, tasol yumi skelim toktok bilong Jisas yet – Jisas i tok wanem long as na minim bilong kam bilong Em.
Planti taim Jisas i tokim ol disaipel olsem, “Bai Mi safa na dai.” Long Mak 10:32-33 na 45 Jisas i putim as bilong safa na dai bilong Em long ples klia.
….Na Jisas i tok olsem, “Yumi bai go antap long Jerusalem, na ol bai putim Pikinini Bilong Man i go long han bilong ol hetpris wantaim ol tisa bilong lo. Ol bai kotim Em na makim Em bilong Em i ken i dai. Ol bai givim Em i go long han bilong ol Jentail, na ol bai tok bilas long Em, na spet long Em, na wipim Em, na kilim Em i dai. Na long 3-pela de bihain Em bai kirap bek gen.”
….“Pikinini Bilong Man Em i no kam bilong mekim ol manmeri i stap wokboi bilong Em. Nogat. Em i kam bilong mekim wok bilong helpim ol na bilong givim laip bilong Em yet bilong baim bek ol dispela planti manmeri.”
Pikinini Bilong Man i kam bilong i dai. Na as bilong dai bilong Pikinini bilong Man, as bilong dai bilong Jisas i olsem, Jisas i lusim laip bilong Em bilong baim bek laip bilong ol planti manmeri.
Na Jisas i no tok “kisim bek”. Nogat. Em i tok “baim bek”. Laip bilong Jisas yet i olsem pe bilong baim fridom bilong ol planti manmeri bai ol i stap fri long pe bilong sin.
Tok bilong God i toksave long pe bilong ol rong bilong yumi.
God i toksave olsem, pe bilong sin em i dai. Na yumi no inap tru long mekim na wokim ol sampela samting bilong rausim yumi yet long pe bilong sin. Nogat. Yumi mekim sin pinis. Na Bikpela Mejistret i toksave pinis. Lukim Rom 1:28-32 na Rom 6:23.
Sampela manmeri i tingim olsem, “Bihain God bai skelim pasin bilong yumi na wokim disisen bilong Em.” Tasol nogat. God i skelim pasin bilong yumi pinis na Em i toksave pinis olsem, “Pe bilong sin em i dai.” Em olsem na, yumi save pinis long disisen bilong God long sin bilong yumi – pe bilong sin bilong yumi em i dai.
Tok dai em i narapela rot bilong tokaut long yumi lus long God. Yumi sin manmeri pinis, olsem na, yumi lus pinis long God, na bihain, taim yumi lusim dispela graun, orait yumi bai lus long God oltaim oltaim long kalabus hel.
Pe bilong sin i holim yumi pinis, na long dispela as yu no fit long baim bek mi, na mi no fit long baim bek yu. Yu no fit long baim bek yu yet, na mi no fit long baim bek mi yet. Long wanem, yumi wantaim yumi lus long God, na bihain, yumi wantaim yumi lus long God oltaim long kalabus hel.
Husat i ken i baim bek yumi long kalabus bilong i dai?
Pikinini Bilong Man tasol i ken i baim bek yumi long kalabus bilong i dai. Long wanem, Pikinini Bilong Man Em i no mekim sin na Em i no lus long God na Em i no i stap long kalabus bilong i dai.
Pikinini Bilong Man bilong visin bilong Daniel Em i lusim laip bilong Em yet bilong baim bek laip bilong ol planti manmeri. Dai bilong Jisas Em i pe bilong rausim sinmanmeri long kalabus bilong i dai. Pe bilong sin em i dai, na Jisas Em i dai bilong baimaut pe bilong sin bilong sinmanmeri, bai ol sinmanmeri i bilipim na trastim feitful baim bek wok bilong Jisas long diwai kros ol i stap fri long kalabus bilong i dai na ol i no ken i lus long God.
Mobeta yumi i stap aninit long Jisas.
Sapos nau em i fes taim yu bin skelim ol dispela samting na yu klia olsem, Jisas i kam long dispela graun bilong lusim laip bilong Em bilong baim bek laip bilong sinmanmeri, na yu klia olsem yu wanpela sin manmeri, orait mobeta nau yu tanim bel na yu putim yu yet aninit long Jisas. Mobeta yu putim yu yet long han bilong Jisas, na yu bilipim na trastim Em long baim bek laip bilong yu.
Ol sampela manmeri ol i harim lotu tasol na ol i no bilipim na trastim feitful wok bilong Jisas i baim bek ol. Sapos yu stap olsem, orait ating nau em i gutpela taim bilong yu senisim tingting bilong yu, senisim bilipim na trastim bilong yu, na yu tanim i kam na yu bilipim na trastim dai bilong Jisas i baim bek yu long kalabus bilong sin na dai.
Planti taim tumas yumi save trastim save bilong yumi yet long ol samting bilong kingdom bilong God. Nau yumi mas senisim tingting bilong yumi na yumi putim bilipim na trastim bilong yumi long feitful baim bek wok bilong Jisas long diwai kros. Trastim God long kisim bek yu long feitful baim bek wok bilong Jisas.
Glenn.
