Moning.
Long Efesus 4:17 aposel Pol i tok pinis long olgeta manmeri bilong sios, em ol manmeri i bilipim na trastim God long kisim bek ol long feitful wok bilong Jisas na ol i tanim bel na ol i lavim na bihainim Jisas, Pol i tokim ol olsem, “Yupela no ken i wokabaut moa olsem ol haiden Jentail manmeri.” Na long Efesus 4:23 em i skruim dispela tok olsem, “Nau tingting bilong yupela mas kamap nupela, na laip bilong yupela mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela bai i stap stretpela na holi olgeta.”
Em olsem na, yumi olgeta, maski yumi pikinini o yumi papamama o yumi wokboi nating o yumi bosman, orait yumi olgeta bilong sios femili yumi no ken i stap olsem ol haiden manmeri. Nau tingting bilong yumi olgeta i mas kamap nupela, na laip bilong yumi olgeta i mas kamap nupela. Long wanem, God i bin mekim yumi olgeta i kamap nupela lain manmeri, bai yumi olgeta i stap olsem Em yet na laip bilong yumi olgeta i stap stretpela na holi olgeta. Lukim Efesus 6:1-9.
1Yupela pikinini i laik bihainim BIKPELA, yupela mas bihainim tok bilong papamama bilong yupela. Long wanem, Dispela pasin em i rait olgeta. 2 “Rispektim papa na mama bilong yu.” Dispela em i fes lo i gat promis i stap wantaim. 3 “Yu mas mekim olsem bai yu ken i stap gut na yu ken i stap laip longpela taim long dispela graun.” (Lo 5:16)
4Na yupela papa, yupela no ken i bagarapim tingting bilong pikinini bilong yupela na mekim ol i bel nogut. Nogat. Olgeta taim yupela mas trenim ol long bihainim BIKPELA na skulim ol long olgeta tok bilong Em.
5Yupela manmeri we ol man i fosim yupela long mekim wok na yupela kamap wokboi nating, yupela mas harim tok bilong bosman bilong yupela na rispektim em. Kisim gutpela tingting na wanbel tru long em. Yupela mas aninit long em olsem yupela aninit long Krais. 6Na yupela no ken i aninit long bosman taim em i was long yupela tasol, na yupela no ken i aninit long em bilong amamasim em tasol. Nogat. Yupela wokboi bilong Krais na yupela mas i stap gut aninit long bosman bilong yupela. God i laik yupela mekim olsem na yupela mas amamas long bihainim laik bilong God. 7Yupela mas belgut olgeta long mekim wok bilong bosman bilong yupela. Yupela mas tingting olsem, “Mi no mekim wok bilong wanpela man, nogat, mi mekim wok bilong BIKPELA.” 8Yupela ken i mekim olsem bikos yupela klia BIKPELA i save tilim gutpela samting long husat manmeri i mekim gutpela wok, maski ol wokboi nating o ol i stap fri.
9Na yupela ol bosman, yupela mas mekim wankain pasin long ol wokboi bilong yupela. Yupela no ken i tretim ol. Yupela holim tingting olsem, bosman bilong ol i stap long heven na Em i bosman bilong yu tu. Na dispela bosman i no save mekim pasin bilong wansait.
Ol pikinini.
Yu save long pasin bilong ples – planti pikinini i les long harim na bihainim papamama na ol i laik bihainim laik bilong ol yet. Em olsem na planti taim ol i kros na paitim papamama na ol i tromoi kaikai bilong ol long graun na ol i mekim ol kainkain hambak olsem long papamama. Insait long sios femili bilong God ol pikinini i laik bihainim BIKPELA ol i no ken i stap olsem. Nogat. Ol i mas harim tok bilong papamama bilong ol na i stap aninit long papamama bilong ol. Long dispela pasin ol i bihainim BIKPELA.
Na dispela i no nupela toktok. Long bipo tru God i mekim wankain toktok long ol pikinini bilong ol lain Israel (lain 3). God i laik ol pikinini bilong Israel ol i mas rispektim papamama bilong ol. Na sapos ol i les long rispektim papamama, na papamama i les long stretim ol na skulim ol gut long olgeta Tok bilong God, orait God bai rausim ol long graun Em i givim ol.
Na yumi no Israel na God i no promisim graun long yumi. Tasol yumi ken i save olsem, pasin bilong rispektim papamama em i bikpela samting long tingting bilong God. Yu save, pasin bilong sakim tok bilong papamama em i wankain pasin olsem pasin bilong sakim tok bilong God. Na dispela i no gutpela.
Em olsem na, sapos yu bilong Jisas na yu laik bihainim BIKPELA, orait bikpela samting stret i olsem, yu harim na bihainim tok bilong papamama bilong yu. Dispela i rait pasin bilong ol pikinini bilong sios femili komyuniti bilong God.
Ol papamama.
Papamama, yupela no ken i sikrapim bel bilong pikinini bilong yupela na mekim ol i bel hat long yupela. Yupela mas sindaun isi wantaim pikinini bilong yupela. Yes, sampela taim yu mas givim hatpela toktok long ol bilong stretim ol. Na yes, sampela taim yupela mas givim kanda long ol bilong stretim ol. Na dispela em i orait bikos pikinini i save olsem, ol i wokim rong na yupela laik stretim ol.
Tasol, yupela mas lukaut, nogut yupela krosim ol nating o yupela stikim ol nating. Sapos yu stikim ol nating, orait yu bai bagarapim bel bilong ol na ol bai bel hat long yu na ol bai hetim yu. Na dispela em i no gutpela na em i asua bilong papamama tasol.
Yu no ken i tok nogut long ol. Yu no ken i semim ol nating long ai bilong ol sampela manmeri. Yu no ken i kirapim bel hat bilong ol nating na sindaun na lap long ol na tok pilai long ol. Dispela em i no wei bilong lukautim pikinini bilong yu.
Yumi mas lavim pikinini bilong yumi na mekim gut long ol. Na long dispela wei pikinini bai rispektim papamama na sindaun isi aninit long papamama.
Ol wokboi nating.
Yumi i bilipim na trastim feitful wok bilong Jisas, orait yumi no ken i bihainim pasin bilong ol wok manmeri bilong dispela graun. Nogat. Yumi no ken i hambak long bosman bilong yumi. Yumi no ken i wok taim em i lukim yumi na yumi les taim em i no lukim yumi. Harim. Krais Em i trupela bosman bilong yumi. Olsem na, taim yumi wok, orait yumi mekim wok bilong Krais tasol. Yumi bilong Krais na yumi mas kisim nupela tingting na bihainim nupela pasin bilong Krais, maski yumi slev o yumi fri man.
Ol bosman.
Na sapos yu bosman o yu wanpela bosman bilong kampani na yu bilong Jisas, orait yu no ken i bihainim pasin bilong bosman bilong dispela graun. Nogat. Yu mas kisim nupela tingting na yu wokabaut long wei bilong Krais long bosman wok bilong yu.
Olgeta gutpela tingting ol slev i kisim na bihainim, orait yu tu yu mas kisim na bihainim. Na yu no ken i tretim ol wokman bilong yu – yu mas wokim gutpela pasin long wokman bilong yu na rispektim em. Na yu mas holim tingting olsem, ol wokman bilong yu ol i gat narapela bosman i winim yu, na Em i save lukim yu, na Em i Bosman bilong yu tu. Yu wantaim wokman bilong yu, yutupela i gat wanpela bosman na Em i Krais.
Glenn.
