Moning.
Nau mi laik tokaut long prea pasin yumi ken i mekim taim yumi bung wantaim ol narapela manmeri i bilipim na trastim God long kisim bek ol long feitful baim bek wok bilong Jisas long diwai kros.
Na toktok mi laik mekim bai i go stret long wanpela prea pasin ol sampela manmeri i save mekim. Pasin ol i mekim i olsem, ol i save mekim prea bilong ol yet long seim taim na ol i no save harim prea bilong man ol i makim bilong mekim prea.
Tok bilong God i mas bosim bilip bilong yumi, na Tok bilong God i mas bosim pasin bilong yumi olgeta manmeri bilong sios bilong Krais. Em olsem na bai yumi skelim tok bilong God na yumi ken i save long wanem prea pasin i gutpela pasin bilong sios bilong Krais.
Sios i olsem bodi, na Krais Em i het bilong bodi.
Lukim 3-pela tok – Efesus 1:22-23 na Efesus 4:15-16 na Rom 12:4-5.
22God i putim olgeta samting aninit long lek bilong Krais, na Em i mekim Krais i stap het tru bilong olgeta samting, na Em i mekim dispela hetman het bilong sios, 23na sios em i bodi bilong Krais.
15…Krais Em i Het bilong yumi. 16Na long Krais tasol olgeta hap bilong bodi i kisim strong. Na taim olgeta hap bilong bodi i pas gut na i wok gut, orait bodi bai i gro na kamap strong na i stap gut long pasin bilong lavim.
4Yumi gat wanpela bodi, tasol planti hap bodi i stap long dispela wanpela bodi. Na olgeta hap bodi i no bilong mekim wanpela kain wok. Nogat. Ol i gat kainkain wok i stap. 5Na wankain olsem yumi manmeri i pas long Krais, yumi planti i stap tasol yumi olsem wanpela bodi. Na wanpela hap bilong dispela bodi em bilong ol narapela hap bilong dispela bodi.
Sios bilong Krais i olsem bodi bilong yumi. Bodi bilong yumi i gat planti hap bodi i stap. I gat han i stap na lek i stap na pinga i stap, na ai na ia na nus na bel na bun na ol masel na ol kainkain hap olsem i stap. Tasol het i save bosim na kontrolim olgeta wanwan hap bilong bodi. Lek i no ken i bihainim laik bilong em yet na mekim ol sampela wok long laik bilong em yet. Nogat. Na han tu i no ken i mekim wok inap long laik bilong em yet. Nogat. Het i save kontrolim olgeta hap bilong bodi. Het i save kontrolim olgeta wanwan hap bilong bodi bai olgeta wanwan hap bilong bodi i wok wantaim.
Tingting long hau bodi bilong yu i wok taim yu wokabaut. Taim yu wokabaut 2-pela lek i wok wantaim, na 2-pela han i go kam wantaim na yu wokabaut. Na tu, ai bilong yu i save wok wantaim na i was gut long rot, nogut yu bamim wanpela diwai o yu putim lek long graun nogut na yu pundaun. Na tu, ia bilong yu i save harim ol nois, na taim yu harim wanpela nois, orait yu ken i tanim na lukluk long wanpela man i bihainim yu.
Na sapos yu putim han bilong yu long baksait na yu wokabaut – bai yu pilim masel i go kam. Long lek na han tu olgeta masel i taitim na slekim i go kam olsem. Na pam bilong yu em tu i wok wantaim. Pam i pamim blut bilong yu raun long lek han na masel bilong yu bilong strongim wokabaut bilong yu.
Olsem na, taim yumi wokabaut olgeta wanwan hap bodi bilong yumi i wok wantaim. I no gat wanpela hap bilong bodi i save mekim narapela wok long laik bilong em yet. Nogat. Olgeta hap bilong bodi i wok wantaim na yumi wokabaut.
Na wankain olsem long bodi bilong Krais – wankain olsem long sios bilong Krais. Taim yumi bung yumi mas pas wantaim na wok wantaim. Yumi mas kisim wanpela tingting, na wanpela bel, na wanpela pasin, na yumi wok wantaim bilong litimapim gutpela nem bilong God bilong yumi.
Skelim pasin bilong ol nupela sios i kamap taim Pita i autim Tok bilong God long De Pentikos. Lukim ol wanwan Baibel ves long buk Aposel – Aposel 2:44 na Aposel 4:24 na Aposel 4:32-33.
44Olgeta manmeri i bilip, ol i stap wantaim na ol i tingim, “Samting bilong mi em i samting bilong olgeta bilip manmeri.”
24… ol i wanbel na ol i beten wantaim long God olsem, “BIKPELA Bilong Bosim Olgeta Samting, Yu bin wokim skai na graun na solwara na olgeta samting i stap long em.”
32Olgeta manmeri i bilip ol i stap wanbel na ol i gat wanpela tingting tasol. Na i no gat wanpela man bilong ol i tok, “Samting bilong mi, em bilong mi tasol.” Nogat. Olgeta samting bilong ol, em i bilong olgeta wantaim. 33Olgeta taim ol aposel i tokaut long BIKPELA Jisas i kirap bek long matmat. Tok bilong ol i gat bikpela strong. Na grasia bilong God i pulap long ol olgeta.
Ol manmeri bilong nupela sios ol i narapela narapela manmeri, tasol ol i stap wanpela bodi na ol i pas wantaim long wanpela bilip na long wanpela tingting na long wanpela pasin. Na taim ol i prea ol i kisim wanpela tok tasol na tok bilong man i mekim prea em i olsem tok bilong olgeta wantaim. Ol wanwan ol i no kisim tingting na toktok na mekim prea bilong ol yet. Nogat. Ol i kisim wanpela tingting na wanpela tok tasol.
Em olsem na, taim yumi bung wantaim long bodi bilong Krais na yumi laik prea, orait yumi kisim wanpela tingting na wanpela tok tasol na yumi wanbel na yumi prea – prea bilong man i mekim prea em i prea bilong yumi tu.
Sapos yumi olgeta yumi mekim prea long laik bilong yumi yet, orait dispela i olsem lek na han bilong yumi i sakim tok bilong het na i mekim wok long laik bilong ol yet. Na yu save olsem, dispela i no gutpela. Nogat. Han na lek i mas bihainim laik bilong het na i mas wok wantaim olgeta narapela hap bilong bodi bilong mekim wanpela wok tasol.
Tingim. Taim yumi singim song, orait yumi makim wanpela song na yumi singim dispela song wantaim. Taim yumi laik harim tok bilong God, orait yumi makim wanpela man na em i autim wanpela toktok na yumi olgeta yumi putim ia i go long dispela wanpela toktok na yumi harim wantaim. Na wankain olsem taim yumi laik prea. Yumi makim wanpela man o meri na em i mekim prea na yumi olgeta i harim na wanbel wantaim long dispela wanpela prea.
Long haus bilong yu yet yu ken i mekim prea long laik bilong yu. Tasol long sios bilong Krais, yumi makim wanpela man o meri yumi save trastim long kisim gutpela tingting na mekim gutpela toktok na em tasol i mekim prea, na yumi olgeta i harim na wanbel na bihainim dispela wanpela prea olsem dispela prea em i prea bilong yumi yet. Yumi bodi bilong Krais na i gutpela long yumi i pas wantaim long wanpela toktok long prea insait long sios miting bilong yumi, na wantaim yumi litimapim nem bilong gutpela God bilong yumi.
Glenn.
