Rom
Yumi mas rispektim ol brata.
14
1Sampela brata i stap na ol i no strong long tingting bilong ol. Yupela mas welkamim ol long sios, tasol yupela no ken i tok pait wantaim ol long ol liklik samting yupela no wanbel long en. 2Sampela manmeri i klia olsem i orait long kaikaim olgeta kain kaikai. Tasol tingting bilong sampela manmeri i no strong, olsem na ol i kaikaim kaikai bilong gaden tasol. 3Manmeri i save kaikaim olgeta kain kaikai em i no ken i tingting nogut long ol narapela manmeri i save kaikaim kaikai bilong gaden tasol. Na tu, manmeri i save kaikaim kaikai bilong gaden tasol, em i no ken i daunim ol narapela manmeri i save kaikaim olgeta kain kaikai. Long wanem, God Em i orait long ol dispela manmeri. 4Yu husat na yu skelim pasin bilong wokboi bilong narapela man? Em i sanap gutpela o em i pundaun, dispela em i samting bilong bos bilong em. Tasol em bai sanap gutpela. Long wanem, BIKPELA bai mekim em i sanap gutpela.
5Sampela manmeri i tingim olsem wanpela de em i holi na i winim ol narapela de bilong wik. Na narapela manmeri i tingim olsem olgeta de i wankain tasol. Em i orait, tasol yu yet yu mas klia long tingting bilong yu. 6Na manmeri i tingim olsem wanpela de em i spesol, em i orait. Long wanem, em i mekim olsem bilong litimapim nem bilong BIKPELA. Na manmeri i kaikaim mit, em i orait. Long wanem, em i save tok tenkyu long God na long dispela pasin em i litimapim nem bilong BIKPELA na em i kaikai. Na manmeri i tambu long kaikaim mit, em i orait tu. Long wanem, em tu i litimapim nem bilong BIKPELA taim em i tok tenkyu long God na em i kaikai. 7Long wanem, nau yumi no tingim laip bilong yumi em i samting bilong yumi yet, na yumi no tingim dai bilong yumi em i samting bilong yumi yet. Nogat. 8Sapos yumi i stap laip, orait laip bilong yumi em bilong BIKPELA. Na sapos yumi i dai, orait dai bilong yumi em bilong BIKPELA. Olsem na, maski yumi stap laip o yumi dai, yumi bilong BIKPELA tasol. 9Bilong dispela as stret Jisas Em i dai na Em i kirap gen, bilong Em i ken i stap BIKPELA bilong manmeri i dai na bilong manmeri i stap laip.
10Long wanem as yu save skelim brata bilong yu? Long wanem as yu tingting nogut long brata bilong yu? Yu save, yumi olgeta bai sanap long kot bilong God na Em bai skelim yumi olgeta. 11Buk bilong God i gat tok olsem,
“BIKPELA i tok, Tru tumas Mi stap na olgeta manmeri bai brukim skru long Mi
na olgeta bai tokaut klia long God long pasin ol i bin mekim.”
(Aisaia 45:23)
12Olsem na, yumi olgeta wan wan bai sanap long ai bilong God na tokaut klia long as bilong olgeta pasin yumi bin mekim.
Pasin yumi mekim i no ken i pundaunim brata bilong yumi.
13Long dispela as yumi ken i lusim pasin bilong daunim brata bilong yumi. Na yumi ken i wokim disisen bilong yumi bilong lusim olgeta samting i save mekim brata bilong yumi i pundaun long sin. 14Mi pas pinis long BIKPELA Jisas. Olsem na, mi bin skelim na mi klia pinis olsem, wanpela kaikai yet em i no doti. Nogat. Tasol, sapos wanpela manmeri i pilim olsem wanpela kaikai i doti, orait bilong dispela manmeri tasol dispela kaikai i doti. 15Sapos kaikai yu kaikaim i mekim brata bilong yu i pundaun long sin, orait yu no mekim pasin bilong lavim em. Nogat. Jisas i bin dai long dispela brata na yu no ken i larim dispela kaikai bilong yu i bagarapim em. 16Olsem na, yumi no ken i larim ol samting yumi tingim i gutpela samting i kamap nogut samting long ai bilong ol man. 17Long wanem, kingdom bilong God em i no samting bilong kaikai na dring. Nogat. Em i samting bilong stretpela pasin, na samting bilong pasin bel isi, na samting bilong amamas Holi Spirit i save kamapim. 18Manmeri i bihainim Krais long dispela gutpela wei God i amamas long ol, na ol manmeri nabaut bai rispektim ol. 19Em olsem na, yumi taitim bun bilong kamapim pasin bilong wanbel na bilong strongim tingting bilong yumi olgeta wantaim.
20Yu no ken i larim kaikai i bagarapim wok bilong God. Tru, olgeta kaikai i klin. Tasol, sapos yu kaikaim sampela kaikai na dispela i mekim wanpela brata i pundaun, orait yu wokim rong. 21Sapos pasin bilong yumi bilong kaikaim mit o bilong dring wain o bilong mekim narapela samting, i mekim brata bilong yumi i pundaun, orait em i gutpela yumi lusim ol dispela samting. 22Tingting bilong yu bilong ol dispela samting bilong kaikai na dring na ol narapela samting, em i samting bilong yu na God. Sapos wanpela manmeri i sakim tingting bilong em yet, orait em i daunim em yet. Tasol God i blesim manmeri i no mekim olsem. 23Sapos wanpela manmeri i tubel long sampela kaikai na em i go kaikaim dispela kaikai, orait em i daunim em yet. Long wanem, pasin bilong em i no pas wantaim bilip bilong em. Na pasin i no pas wantaim bilip em i sin pasin.
