Rom
Krais i soim yumi gutpela pasin.
15
1Yumi ol brata i gat strong, yumi gat wok bilong helpim ol brata i no gat strong long tingting bilong ol, na yumi no ken i tingim yumi yet tasol. 2Yumi wan wan yumi mas tingim brata bilong yumi na mekim wok i gutpela bilong em bilong strongim em. 3Long wanem, Krais i no tingim Em yet. Nogat. Buk bilong God i tok olsem, “Ol tok nogut ol manmeri i mekim long Yu, em Mi bin karim.” (Buk Song 69:9) 4Harim, olgeta samting ol man i bin raitim long Buk bilong God, ol i raitim bilong skulim yumi. Em olsem na Buk bilong God i stap bilong helpim yumi i stap strong long bihainim wei bilong God na bilong strongim tingting bilong yumi, bai yumi kisim gutpela tingting na wetim ol samting God i bin promisim. 5God i ken i helpim yupela i stap strong long bihainim wei bilong Em na Em i ken i strongim tingting bilong yupela. Na Em i ken i helpim yupela i stap wanbel wantaim na mekim wok long bihainim BIKPELA. 6Em olsem na, long wanpela tingting na long wanpela maus yupela ken i litimapim na givim biknem long God, Papa bilong BIKPELA bilong yumi Jisas Krais. 7Krais i bin welkamim yupela, na long dispela as yupela mas welkamim olgeta brata bilong yupela. Na sapos yupela mekim olsem yupela bai givim biknem long God.
Krais Em i helpim bilong ol Juda na ol Jentail wantaim.
8Mi tokim yupela, Krais i bin kamap wokboi nating bilong ol lain Juda, na dispela i soim olsem tok God i bin mekim i tru olgeta. Em olsem na God i kamapim tru olgeta promis Em i bin mekim long ol tumbuna papa bilong ol, 9 na Em i bin marimari long ol lain Jentail na ol i litimapim nem bilong Em. Buk bilong God i tok olsem,
“Long dispela as mi bai litimapim nem bilong Yu namel long ol lain Jentail.
Mi bai singim song bilong litimapim nem bilong Yu.”
(2 Samuel 22:50, Buk Song 18:49)
10Na gen Buk bilong God i tok olsem,
“Yupela ol lain Jentail, yupela amamas wantaim ol lain bilong God.”
(Lo 32:43)
11Na gen Buk bilong God i tok olsem,
“Yupela ol lain Jentail, yupela litimapim nem bilong BIKPELA.
Yupela olgeta lain manmeri,
yupela singim ol song bilong litimapim nem bilong Em.”
(Buk Song 117:1)
12Na gen Aisaia em i tok olsem,
“Rop bilong Jesi bai kamapim nupela kru,
na Em bai kirap bilong bosim olgeta lain manmeri.
Na ol lain Jentail bai putim laip bilong ol i go long han bilong Em.”
(Aisaia 11:10)
13God Em i as bilong laip i stap oltaim oltaim, na yupela save tingting strong na wetim dispela laip God i promisim yupela. Yupela save trastim Em, na Em i ken i pulimapim yupela long trupela amamas na trupela bel isi. Long strong bilong Holi Spirit yupela ken i bilip tru na tingting strong na wetim dispela laip God i promisim yupela.
Pol em i wok bilong helpim ol lain Jentail.
14Ol brata bilong mi, mi yet mi tingim olsem yupela i bin kisim ol gutpela tingting na yupela i save mekim ol gutpela pasin. Na mi tingim olsem yupela i gat gutpela save long tok bilong God na yupela inap long skulim ol yupela yet. 15-16God i mekim grasia long mi na Em i bin givim strong long mi bilong mekim wok bilong Krais Jisas bilong helpim ol lain Jentail. Em olsem na, mi mekim wok pris na mi autim gutnius bilong God long ol. Mi mekim olsem, bai ol lain Jentail i kamap olsem wanpela ofa God i laikim, na Holi Spirit i mekim ol i kamap stretpela long ai bilong God. Long dispela as tasol mi bin mekim sampela strongpela toktok long yupela insait long dispela pas bilong mi. Mi mekim olsem bilong kirapim tingting bilong yupela na yupela ken i skelim gen ol dispela tok bilong God.
17Olsem na, mi save amamas long Krais Jisas na mi amamas long dispela wok God i givim mi. 18-19Mi no ken i toktok long ol samting mi bin mekim. Nogat. Mi bai tokaut long ol samting Krais i bin mekim. Krais i bin givim strong bilong Holi Spirit long mi bilong mekim sampela kain mirakel na bilong strongim tok mi autim na bilong strongim wok mi mekim. Olsem na, Krais i bin yusim mi bilong kisim ol lain Jentail i kam na ol i bihainim God. Em olsem na mi bin autim olgeta gutnius bilong Krais long Jerusalem na i go olgeta long provins Ilirikum. 20Olgeta taim mi bin tingting strong long autim gutnius long hap we ol i no save long Krais. Long wanem, nogut mi mekim wok antap long wok bilong narapela wokman bilong God. 21Em olsem na Buk bilong God i mekim dispela tok,
“Manmeri i no bin kisim tok bilong Em, bai ol i save,
na manmeri i no bin harim tok bilong Em, bai ol i klia.”
(Aisaia 52:15)
Pol i laik go long Rom.
22Olsem na, long dispela as, planti taim sampela samting i bin stopim mi long kam long yupela. 23Tasol nau mi no gat wok moa long ol dispela hap. Na tu, planti yia nau mi save tingting long kam lukim yupela. 24Olsem na, plen bilong mi i olsem, taim mi laik i go long Spen mi bai kam lukim yupela. Ples bilong yupela i stap long rot i go long Spen. Olsem na, taim mi laik i go long Spen mi bai kam na sindaun wantaim yupela liklik na amamas wantaim yupela. Na bihain yupela ken i helpim mi na mi bai lusim yupela na i go olgeta long Spen. 25Tasol nau mi mas i go long Jerusalem bilong givim helpim long ol manmeri bilong God i stap long dispela hap. 26Long wanem, ol manmeri bilong Masedonia na Akaia ol i bin bungim sampela mani bilong helpim ol manmeri bilong God i stap rabis long Jerusalem. 27Ol i amamas long bungim mani bilong helpim ol. Na dispela em i gutpela. Long wanem, ol lain Juda i amamas long givim gutnius bilong God long ol lain Jentail, na ol lain Jentail i ken amamas long givim hap mani long ol lain Juda. 28Em olsem na mi laik mekim dispela wok pastaim na karim mani i go long ol lain bilong God i stap long Jerusalem. Na bihain, taim mi laik i go long Spen, mi bai kam lukim yupela. 29Na mi klia olsem taim mi kam long yupela mi no inap i kam nating. Nogat. Mi bai karim ol gutpela blesim bilong Krais wantaim mi.
30Ol brata na susa, yupela klia pinis long wok bilong BIKPELA Jisas Krais bilong yumi, na yupela save long pasin bilong Holi Spirit bilong lavim manmeri. Yupela tingim dispela na yupela pas wantaim mi long dispela hat wok mi save mekim. Olsem na, yupela mas prea long mi long God. 31Prea olsem God i ken i lukautim mi na ol man bilong ples Juda i no bilip ol i no ken i bagarapim mi. Na tu, prea olsem ol lain bilong God i stap long Jerusalem ol bai orait long wok bilong mi bilong helpim ol. 32Yupela i mas mekim dispela kain prea, na sapos God i laik, mi ken i kisim amamas na kam long yupela na kisim win wantaim yupela. 33Na bel isi bilong God i ken i stap wantaim yupela. Tru tumas.
