Rom
Pol i no lusim tingting long wan wan manmeri.
16
1Mi laik mekim tok bilong sapotim Fibi, susa bilong yumi. Em i wokmeri nating bilong sios i stap long Senkria. 2Fibi em i bilong BIKPELA, na long pasin i fit bilong ol lain bilong God yupela mas kisim em. Na sapos em i nidim sampela helpim bilong yupela, orait yupela helpim em. Long wanem, planti manmeri i bin kisim helpim bilong Fibi na mi tu mi bin kisim helpim bilong em.
3Na tokim Prisila wantaim Akwila olsem mi no lusim tingting long tupela. Tupela i wanwok bilong mi long wok bilong Jisas Krais. 4Na taim tupela i bin helpim mi tupela i no bin tingting long laip bilong tupela yet. Nogat. Tupela i helpim tasol. Na em i no mi tasol i ken i tok tenkyu long tupela. Nogat. Ol sios bilong ol Jentail ol i ken i tok tenkyu na amamas long tupela. 5Na tokim sios i save bung long haus bilong Prisila wantaim Akwila olsem mi no lusim tingting long ol. Na tokim gutpela pren bilong mi Epainetus olsem mi no lusim tingting long em. Em i fes man long provins Esia i bin lusim olpela bilip bilong em na i bihainim Krais. 6Na tokim Maria olsem mi no lusim tingting long em. Em i bin mekim bikpela wok bilong helpim yupela. 7Na tokim Andronikus wantaim Junias olsem mi no lusim tingting long tupela. Tupela i wan blut bilong mi na tupela i bin i stap long kalabus wantaim mi. Namel long ol aposel tupela i kamap bikpela. Na tupela i bin pas long Krais paslain long mi. 8Na tokim Ampliatus olsem mi no lusim tingting long em. Em i bilong BIKPELA na mi laikim em tumas. 9Na tokim Urbanus olsem mi no lusim tingting long em. Em i wanwok bilong mi long wok bilong Krais. Na tu, tokim gutpela pren bilong mi Stakis olsem mi no lusim tingting long em. 10Na tokim Apeles olsem mi no lusim tingting long em. Em i bin fesim planti hevi na em i no givap. Olsem na, dispela i soim olsem em i trupela man bilong Krais. Na tokim ol manmeri i stap long haus bilong Aristobulus olsem mi no lusim tingting long ol. 11Na tokim Herodion olsem mi no lusim tingting long em. Em i wanblut bilong mi. Na tokim ol manmeri i pas long BIKPELA na i stap long haus bilong Narsisus olsem mi no lusim tingting long ol. 12Na tokim Trifina wantaim Trifosa olsem mi no lusim tingting long tupela. Dispela tupela meri i save wokhat long bihainim BIKPELA. Na tokim gutpela pren bilong mi Persis olsem mi no lusim tingting long em. Em tu em i meri i bin mekim bikpela wok long bihainim BIKPELA. 13Na tokim Rufus olsem mi no lusim tingting long em. Krais i bin makim em na em i pas long Krais. Na tu, tokim mama bilong em olsem mi no lusim tingting long em. Em i bin i stap olsem mama bilong mi tu. 14Na tokim Asinkritus, Flegon, Hermes, Patrobas, Hermas wantaim ol brata na susa i stap wantaim ol olsem mi no lusim tingting long ol. 15Na tokim Filologus, Julia, Nereus wantaim susa bilong em, na Olimpas wantaim olgeta lain bilong God i stap wantaim ol olsem mi no lusim tingting long ol. 16Na taim yupela bungim narapela brata o susa yupela ken i givim kis i holi long ol. Na mi ken i tokim yupela olsem, ol wan wan sios bilong Krais ol i no lusim tingting long yupela.
Las stia tok bilong Pol.
17Ol brata, mi laik tokim yupela olsem, yupela mas lukaut long ol lain i save mekim pasin bilong brukim sios bilong yupela. Yupela kisim gutpela skul pinis long tok bilong God, tasol sampela manmeri bai kisim dispela tok i go long narapela sait olgeta. Yupela mas i stap longwe long ol dispela kain manmeri. 18Long wanem, ol i no mekim wok bilong Krais, BIKPELA bilong yumi. Nogat. Ol i mekim wok bilong bihainim laik bilong ol yet. Olsem na, ol i save mekim tok giaman na tok gris bilong giamanim tingting bilong ol manmeri i no yusim het. 19Olgeta taim yupela bihainim gut ol tok bilong God na olgeta manmeri nabaut ol i harim pinis dispela stori bilong pasin bilong yupela. Olsem na, taim mi tingting long yupela mi amamas. Tasol, yupela mas yusim het na save gut long ol samting i gutpela, na yupela lusim tingting long ol samting i nogut.
20Klostu nau dispela God bilong pasin bel isi, Em bai krungutim Satan aninit long lek bilong yupela.
Na Jisas, BIKPELA bilong yumi, i ken i mekim grasia long yupela.
21Timoti, wanwok bilong mi, em i salim tok olsem, “Mi no lusim tingting long yupela.” Na Lusius na Jeson na Sosipater, ol i wan blut bilong mi, na ol tu i salim tok olsem, “Mipela no lusim tingting long yupela.”
22Mi, Tertius, mi bin raitim dispela pas bilong Pol, na mi tu mi no lusim tingting long yupela bilong BIKPELA.
23-24Na Gaius em i salim tok olsem, “Mi no lusim tingting long yupela.” Em i bin amamas na mekim gutpela wok bilong lukautim mi wantaim olgeta manmeri bilong sios bilong hia.
Erastus na Kwartus, tupela i salim tok olsem, “Mitupela no lusim tingting long yupela.” Erastus em i wokman bilong gavman na em i mekim wok bilong bosim ol Pablik Wok bilong taun.
Litimapim nem bilong God.
25-27Orait, litimapim nem bilong God. Em yet Em inap mekim yupela strong. Mi bin autim gutnius bilong mi na tokim yupela long wok bilong Jisas Krais. Na God bai yusim dispela gutnius bilong strongim yupela. Pastaim sampela samting bilong God i hait. Tasol, dispela God bilong i stap oltaim Em i bin tokaut olsem, “Dispela samting i hait i mas kamap ples klia na olgeta manmeri long olgeta hap ol i ken i bilipim na bihainim Mi.” Olsem na, God i givim Tok bilong Em i kam long yumi na long dispela tok God i mekim hait samting bilong Em i kamap ples klia. Litimapim nem bilong God. Dispela wanpela God i gat save tru. Na long dispela wok God i mekim long han bilong Jisas Krais, God i mas kisim bikpela bikpela nem oltaim oltaim. Tru tumas.
