Rom

Pol i bekim komplen bilong ol sampela man.

3

¹Orait, ol manmeri bilong Juda ol i kamap insait long gutpela samting o nogat? Na pasin bilong katim skin em i gutpela samting bilong ol o nogat? ²Yes, ol dispela samting em i gutpela samting bilong ol. Na nambawan samting i olsem, God i bin givim tok bilong Em long ol dispela lain Juda. ³Em inap, tasol sapos sampela manmeri bilong ol lain Juda i givim baksait long tok bilong God, orait dispela pasin i olsem wanem? Bai dispela pasin i mekim ol promis bilong God i kamap samting nating, a? ⁴Nogat tru! God i no man bilong giaman. Nogat. Ol manmeri tasol ol i lain bilong giaman. Dispela kain tok i stap pinis long Buk bilong God na i tok,

“Olsem na, taim Yu toktok Yu save mekim trupela tok olgeta,
na taim Yu skelim kot Yu save skelim stret.”

(Buk Song 51:4)

⁵Tasol sampela manmeri ol i gat tingting. Na ol i tingim sin pasin bilong yumi i save mekim stretpela pasin bilong God i kamap ples klia. Na long dispela as ol i tingim olsem God i no mekim stretpela pasin long yumi taim Em i bel hat na bekim pe nogut long sin bilong yumi. Yupela save, mi bihainim tingting bilong ol man na mi toktok. ⁶Harim, God i mekim stretpela pasin long yumi, na Em bai kotim olgeta manmeri bilong dispela graun. ⁷Na sampela manmeri i tingim tok giaman bilong ol i save mekim trupela tok bilong God i kamap ples klia. Na ol i tingim dispela pasin i save givim biknem long God. Na long dispela as ol i tingim olsem, “God i no ken i daunim yumi long dispela pasin.” ⁸Tasol dispela tingting bilong ol i paul wankain dispela tok, “Kam, yumi mekim pasin nogut bilong kamapim ol gutpela samting.” Na sampela manmeri i tingim mipela i save autim dispela kain toktok. Tasol nogat tru. Em olsem na God i ken daunim manmeri i mekim ol dispela paul toktok.

I no gat wanpela stretpela man i stap.

⁹Orait, bai mipela tok wanem? Mipela i winim ol narapela manmeri, a? Nogat tru! Yumi klia olsem sin i karamapim yumi olgeta, yumi ol lain Juda na ol lain Jentail wantaim. ¹⁰Dispela kain tok i stap pinis long Buk bilong God na i tok,

“I no gat wanpela manmeri i stretpela, nogat tru.
¹¹I no gat wanpela manmeri i gat gutpela tingting,
na i no gat wanpela manmeri i save bihainim God.
¹²Olgeta manmeri ol i bin givim baksait long God,
olsem na, olgeta i kamap manmeri nogut.
I no gat wanpela manmeri i save mekim gutpela pasin.
Tru, i no gat wanpela.”

(Buk Song 14:1-3, 53:1-3, Saveman 7:20)

¹³“Maus bilong ol i olsem matmat i op i stap,
na ol i save mekim tok giaman.”

(Buk Song 5:9)

“Long maus bilong ol, ol i save bagarapim ol manmeri.”

(Buk Song 140:3)

¹⁴“Tok kros na tok swea i pulap long maus bilong ol.”

(Buk Song 10:7)

¹⁵“Ol i hariap long bihainim pasin bilong kilim man i dai.
¹⁶Sindaun nogut na hevi em i mak bilong ol.
¹⁷Na ol i no save long pasin bilong bel isi.”

(Aisaia 59:7,8)

¹⁸“Ol i no save pret long God.”

(Buk Song 36:1)

¹⁹Yumi save pinis, olgeta tok lo i mekim em i mekim long ol manmeri i stap aninit long lo. Na tok bilong lo i stap bilong pasim maus bilong olgeta manmeri, bai olgeta manmeri bilong olgeta hap bilong dispela graun i sanap long kot bilong God. ²⁰Long wanem, i no gat wanpela manmeri bai i kamap stretpela manmeri long ai bilong God long rot bilong bihainim lo. Nogat. Long rot bilong bihainim lo ol manmeri bai klia long sin bilong ol yet na em tasol.

Stretpela pasin i kam long rot bilong bilip.

²¹Tasol nau, stretpela pasin God i givim manmeri em i kamap ples klia pinis. Na Buk Lo na Buk Profet i save tokaut long dispela stretpela pasin God i givim. Dispela stretpela pasin em i no kamap long rot bilong bihainim lo. Nogat. ²²Stretpela pasin God i givim manmeri em i kamap long feitful wok bilong Jisas Krais. God i save givim dispela stretpela pasin long ol manmeri i bilipim na trastim Jisas Krais. Olgeta manmeri ol i wankain tasol. ²³Ol i manmeri bilong mekim sin, na ol i kamap sot long glori bilong God. ²⁴Na God i ken i kolim ol “stretpela man” long wok Krais Jisas i bin mekim bilong baim bek manmeri. Dispela em i presen bilong God, na i kam long rot bilong grasia bilong God. ²⁵God i bin salim Krais Jisas i kam, na Krais Jisas i kisim pe bilong sin na Em i dai, na blut bilong Em i kapsait bilong tekewe bel hat bilong God long sin bilong manmeri i bilipim na trastim Krais Jisas. Na God i mekim ol dispela samting bilong soim olsem, pasin bilong Em i stret olgeta. Long wanem, long bipo ol lain bilong God i bin mekim sin na God i bin lukim, tasol Em i bin larim ol. ²⁶Em olsem na nau God i soim olsem, pasin Em i mekim i stret olgeta. God Em i stretpela God olgeta, na Em i givim stretpela pasin long manmeri i bilip na Em i kolim ol “stretpela man”.

²⁷Orait, husat i ken i apim em yet? Em i no gat wanpela manmeri i ken i apim em yet. Long wanem, dispela kain pasin i pinis. Na wanem samting i pinisim dispela kain pasin? Pasin bilong bihainim lo i no pinisim dispela pasin. Nogat. Pasin bilong bilip tasol i pinisim. ²⁸Long wanem, yumi klia olsem God i no inap kolim yumi “stretpela man” long wok bilong yumi long bihainim lo. Nogat tru. Long rot bilong bilip tasol God i givim stretpela pasin long yumi na kolim yumi “stretpela man”. ²⁹God Em i no God bilong ol lain Juda tasol. Nogat. God Em i God bilong ol lain Jentail tu. ³⁰Long wanem, God Em i wanpela tasol. Olsem na, ol manmeri i bilipim na trastim Jisas, dispela wanpela God bai givim stretpela pasin long ol na kolim ol “stretpela man”, maski ol i manmeri Juda o ol i manmeri Jentail. ³¹Orait, yumi ken i tok wanem, ol dispela samting i pundaunim lo, a? Nogat tru! Ol dispela samting i sapotim lo.