Rom
God i givim stretpela pasin long Abraham.
4
1Orait, Abraham, tumbuna bilong yumi, em olsem wanem? 2Sapos Abraham i mekim stretpela pasin na long dispela as God i kolim em “stretpela man”, orait Abraham em i ken i apim em yet long ai bilong God. Tasol em i no mekim olsem. 3Tok bilong God i tok wanem? Em i tok, “Abraham i bilipim God na God i givim nating na givim stretpela pasin long em.” (Jenesis 15:6) 4Taim wanpela man i mekim wok bilong kisim pe, orait dispela pe em i no presen. Nogat. Dispela pe em i bekim bilong wok bilong em. 5God Em i God bilong givim stretpela pasin long ol nogut manmeri na kolim ol “stretpela man”. Em olsem na taim wanpela man i no mekim stretpela pasin, tasol em i bilipim na trastim dispela God, orait God bai givim nating na givim stretpela pasin long em. 6Devit i bin tokaut long dispela samting tu. Em i tokaut long manmeri i no bin mekim stretpela pasin, tasol God i bin givim stretpela pasin long ol. Olsem na, ol dispela manmeri i gat bikpela amamas. Devit i mekim dispela tok,
7“Manmeri i kisim amamas tru,
ol i manmeri God i fogivim olgeta rong bilong ol
na Em i karamapim olgeta sin bilong ol.
8Man i kisim amamas tru,
em i man BIKPELA i no tingting moa
long sin bilong em.”
(Buk Song 32:1,2)
9Na dispela blesim bilong God, em bilong ol manmeri i katim skin tasol o em bilong ol narapela manmeri tu, a? Yumi save pinis, Abraham i bilipim na trastim God na God i givim nating na givim stretpela pasin long em. 10Orait, em olsem wanem? Abraham i katim skin pastaim na God i givim stretpela pasin long em, a? Nogat. God i givim stretpela pasin long Abraham pastaim na bihain Abraham i katim skin. 11Em olsem na bihain Abraham i katim skin bilong soim olsem em i kisim pinis stretpela pasin God i givim em. I klia olsem, taim Abraham i no katim skin yet em i kamap “stretpela man” pinis long ai bilong God. Long dispela as Abraham em i papa bilong ol manmeri i bilip na i no katim skin. God bai givim nating na givim stretpela pasin long ol. 12Na tu Abraham em i papa bilong ol manmeri i katim skin na i holim wankain bilip Abraham i holim taim em i no katim skin yet.
Kaikai bilong promis i kam long rot bilong bilip.
13God i bin givim promis long Abraham na long ol pikinini bilong em. God i promis long givim olgeta samting long Abraham na long ol pikinini bilong em. Abraham i no bihainim sampela kain lo na God i mekim dispela promis. Nogat. Abraham i bilipim God, na God i givim stretpela pasin na kolim em “stretpela man”, na long dispela rot promis bilong God i kam long Abraham. 14Olsem na, sapos promis i kam long ol manmeri i bihainim lo, orait bilip i no gat wok na promis em i samting nating. 15Long wanem, God i save bel hat na bekim pe nogut long manmeri i sakim lo. Tasol, sapos lo i no stap, orait manmeri i no inap sakim lo.
16God i mekim grasia na Em i givim promis. Em olsem na promis em i kam long rot bilong bilip. Long dispela as i tru tumas, God bai givim olgeta samting bilong promis long ol pikinini bilong Abraham. Olgeta manmeri i bilip wankain olsem Abraham i bilip, ol bai kisim ol samting bilong promis, maski ol i lain bilong lo o ol i narapela lain. Olsem na, Abraham em i papa bilong olgeta manmeri i bilip. 17Dispela kain tok i stap pinis long Buk bilong God na i tok, “Mi mekim yu papa bilong planti lain manmeri.” (Jenesis 17:5) Long ai bilong God Abraham em i papa bilong yumi. Na dispela God Abraham i bilipim na trastim Em i God bilong givim laip long man i no gat laip, na Em i God bilong kamapim ol kain kain samting i no kamap yet. 18Pastaim i luk olsem Abraham i no inap kamap papa bilong wanpela pikinini na i no inap kamap papa bilong planti manmeri. Tasol em i tingting long promis na em i bilipim na trastim God. God i bin tokim Abraham olsem, “Ol lain bilong yu bai kamap planti tru olsem ol sta.” (Jenesis 15:5) 19Abraham i bin kisim klostu 100 krismas pinis, na em i save olsem em i lapun pinis na strong bilong em i lus pinis. Na em i save olsem Sara tu em i lapun pinis na em i no inap karim wanpela pikinini. Abraham em i klia long ol dispela samting, tasol em i bilipim na trastim God i go yet. 20Na taim em i tingting long promis bilong God em i no tingim God Em i giaman. Nogat. Na Abraham em i no tubel. Nogat. Em i kamap strong moa yet long bilipim na trastim God na em i litimapim nem bilong God. 21Abraham em i holim wanpela strongpela tingting tasol. Na dispela tingting i olsem, God i gat strong na Em inap tru long kamapim dispela samting Em i bin promisim. 22Na long dispela as “God i givim nating na givim stretpela pasin long em.” 23Dispela tok, “God i givim nating na givim stretpela pasin long em,” i no kamap bilong givim tingting long Abraham tasol. Nogat. 24Dispela tok i kamap bilong givim tingting long yumi tu. Long wanem, God bai givim nating na givim stretpela pasin tu long yumi i bilipim na trastim God, em dispela God i bin kirapim Jisas, BIKPELA bilong yumi. 25God i bin givim Jisas, bai Jisas i dai bilong sin bilong yumi. Na God Em i kirapim Jisas gen bilong Em i ken i kolim yumi “stretpela man”.
