Rom
Bel isi na amamas i kamap.
5
1Long rot bilong bilip God i givim stretpela pasin long yumi na kolim yumi “stretpela man”. Long dispela as, nau God Em i stap bel isi wantaim yumi. Dispela bel isi bilong God i kam long yumi long wok bilong BIKPELA Jisas Krais. 2BIKPELA Jisas Krais, long wok bilong Em, Em i kisim yumi i kam insait long grasia bilong God, na long rot bilong bilip nau yumi i stap insait long dispela grasia. Na yumi save amamas. Long wanem, nau yumi klia olsem yumi bai lukim glori bilong God. 3Na tu, nau yumi amamas taim yumi kisim sampela hevi. Long wanem, yumi klia olsem hevi bai mekim yumi kamap strong. 4Na dispela strong bai mekim yumi kamap manmeri i gat gutpela save na strongpela tingting. Em olsem na bai yumi bilip strong na wetim promis bilong God. 5Na yumi i bilip strong na i wetim promis bilong God, yumi no inap sem. Long wanem, God i bin givim Holi Spirit long yumi, na long wok bilong Holi Spirit insait long laip bilong yumi, bai yumi klia olsem God Em i lavim yumi.
6Tingim. Yumi no gat strong bilong helpim yumi yet. Tasol God i bin makim wanpela taim, na long dispela taim stret Jisas Em i dai bilong helpim manmeri nogut. 7Ating i no gat wanpela bilong yumi bai i lusim laip bilong em bilong helpim wanpela stretpela man. Sapos yumi lukim wanpela gutpela man yumi laikim tumas, orait ating wanpela bilong yumi i ken i strongim bel na i dai bilong helpim em. 8Tasol taim yumi i stap yet insait long sin pasin, Krais Em i dai bilong helpim yumi. Long dispela pasin God i soim yumi olsem Em i lavim yumi. 9Sapos blut bilong Krais i bin kapsait bilong God i ken i kolim yumi “stretpela man”, orait i no gat kwesten mak, wok bilong Krais bai sevim yumi na yumi no inap tru long lukim bel hat bilong God. 10Bipo yumi birua bilong God. Tasol nau long dai bilong PIKININI bilong God Em i mekim yumi pren bilong Em. Em olsem na, nau Krais Em i stap laip na tru tumas yumi tu bai i stap laip. 11Ol dispela samting i tru, na yumi save amamas long God na long BIKPELA Jisas Krais. Long wanem, long wok bilong Krais, God i mekim yumi kamap pren bilong Em pinis.
Adam i kamapim dai na Krais i kamapim laip.
12Wanpela man i bin mekim sin. Na long rot bilong dispela man sin i kam long olgeta manmeri. Na sin i bin kamapim dai. Na long dispela as dai em i kam long olgeta manmeri. Long wanem, olgeta manmeri i bin kamap sin manmeri. 13Long dispela taim lo i no kamap yet. Tasol sin i kamap pinis. Na sapos wanpela lo i no kamap yet, orait sin i no inap kamap. 14Tasol dai em i stap long taim bilong Adam i go i go long taim bilong Moses. Na sampela manmeri ol i no sakim tok olsem Adam i bin mekim. Tasol ol dispela manmeri tu ol i bin i dai. Olsem na, Adam i olsem wanpela narapela man i kamap bihain long em.
15Tasol presen God i givim mipela em i no wankain olsem sin Adam i givim mipela. Nogat. Sin bilong dispela wanpela man Adam i putim mipela planti manmeri insait long dai. Tasol dispela wanpela man Jisas Krais i mekim gutpela wok bilong helpim mipela planti manmeri. Em olsem na God i mekim grasia long mipela na Em i givim presen long mipela, na Em i kapsaitim ol dispela gutpela samting long mipela planti manmeri. 16Na tu, presen God i givim mipela na sin Adam i givim mipela em i no kamapim wankain samting long bihain. Nogat. Bikpela kot i kamap bihain long wanpela sin Adam i mekim, na dispela kot i save daunim ol manmeri. Tasol presen bilong God i kamap bihain long planti sin pasin, na dispela presen i kamapim pasin we God i kolim manmeri “stretpela man”. 17Dispela wanpela man Adam em i bin mekim wanpela sin, na long dispela rot dai i kamap na dai i save stap i go i go. Tasol God i kamapim gutpela wei bilong helpim manmeri. Em olsem na Em i mekim grasia long ol na Em i givim wanpela presen long ol na dispela presen em i stretpela pasin. Na tru tumas ol manmeri i kisim dispela gutpela grasia na i kisim dispela gutpela presen, bai ol i stap laip i go i go. Na ol dispela gutpela samting em i kamap tasol long wok bilong dispela wanpela man Jisas Krais.
18Orait, wanpela sin i bin daunim olgeta manmeri na putim ol insait long dai. Na wankain olsem, wanpela stretpela laip i kamapim pasin we God i kolim manmeri “stretpela man” na dispela i kisim laip i kam long ol manmeri. 19Wanpela man i bin sakim tok bilong God, na long dispela rot mipela planti manmeri i kamap sin manmeri. Na wankain olsem, wanpela man i bihainim olgeta tok bilong God, na long dispela rot God i mekim mipela planti manmeri i kamap “stretpela man”. 20God i givim lo bilong mekim sin bilong manmeri i kamap bikpela moa yet. Tasol taim sin i kamap bikpela moa yet, orait grasia bilong God i kamap bikpela moa moa yet. 21Sin i kamapim dai na sin i save stap i go i go. Na grasia bilong God bai i stap i go i go bikos God Em i givim stretpela pasin long manmeri. Na dispela stretpela pasin i kamapim laip i stap oltaim oltaim. Na ol dispela i kamap long wok bilong Jisas Krais BIKPELA bilong yumi.
