Rom
Lo i pinis long yumi i pas long Krais.
7
1Ol brata, yupela save pinis long lo. Olsem na, yupela save pinis olsem lo i ken i bosim ol manmeri taim ol i stap laip tasol. 2Mi tok piksa na yupela harim. Lo bilong marit i save pasim meri long man bilong em i go i go olgeta. Tasol taim man bilong em i dai pinis, orait lo bilong marit i no pasim meri moa long dispela man. 3Em olsem na sapos meri i lusim man bilong em na em i go marit long narapela man, orait lo i ken i tok olsem meri i mekim pamuk pasin. Tasol sapos man bilong em i dai pinis na em i go marit long narapela man, orait lo i no gat toktok na meri em i no pamuk meri. Long wanem, taim man bilong em i dai pinis marit i pinis na meri em i fri long maritim narapela man.
4Ol brata, taim yupela i bin i dai wantaim Krais marit bilong yupela long lo em i pinis olgeta, bilong yupela ken i pas long narapela man na bai yupela i karim kaikai God i save laikim. Mi tok long dispela man i bin kirap long matmat na Em i no inap dai moa. 5Taim olpela bel i bosim yumi ol kain kain tingting nogut i wok insait long yumi. Na lo i bin sikrapim dispela. Em olsem na yumi karim kaikai nogut bilong i dai tasol. 6Tasol nau yumi dai pinis na samting i laik pasim yumi em i no inap pasim yumi moa. Em olsem na yumi fri long lo. Long dispela as yumi no inap tanim pes moa long olpela wei bilong lo. Nogat. Nau yumi bihainim nupela wei bilong Spirit.
Sin i resis long yumi.
7Orait, bai yumi tok wanem? Lo em i samting nogut, a? Nogat tru! Pastaim mi no save wanem samting i sin, tasol lo i soim mi wanem samting i sin. Em olsem na lo i tok, “Yu no ken i mangalim ol samting bilong narapela manmeri.” (Kisim Bek 20:17, Lo 5:21) Orait, nau mi klia olsem dispela sin pasin i stap pinis long laip bilong mi. 8Tasol sin i yusim dispela lo bilong kirapim ol kain kain mangal pasin long tingting bilong mi. Sapos lo i no stap, orait sin i save hait. 9Pastaim mi no save long lo na mi stap gutpela. Tasol taim lo i kam long mi sin i kirap long laip bilong mi na mi klia olsem mi lus. 10Lo em i samting bilong kamapim laip, tasol em i no kamapim laip long mi. Nogat. Em i kamapim dai long mi. 11Long wanem, sin i yusim dispela lo bilong giamanim mi, na long rot bilong lo sin i kilim mi i dai. 12Em olsem na lo yet em i holi, na olgeta tok i stap insait long lo em i holi na stretpela na gutpela.
13Orait, dispela gutpela samting em i bin kamapim dai long mi, a? Nogat tru. Sin i yusim dispela gutpela samting na kamapim dai long mi. Em olsem na long dispela pasin mi ken i save long pasin bilong sin. Na long rot bilong lo sin i kamap ples klia pinis na yumi ken i save olsem sin em i bikpela samting nogut tru. 14Yumi save pinis lo em i holi. Tasol mi no holi na sin i save holim mi. 15Mi paul long pasin bilong mi. Pasin mi laik mekim mi no save mekim. Tasol pasin mi hetim mi save mekim. 16Lo em i gutpela na mi wanbel long dispela. Na long dispela as mi no laikim dispela pasin mi save mekim. 17Olsem na, taim mi mekim sin, i no mi yet i mekim. Nogat. Em i sin i stap insait long mi i mekim. 18Mi klia olsem wanpela gutpela samting em i no stap insait long mi, mi minim dispela olpela bel bilong mi. Em olsem na mi laik mekim gutpela pasin, tasol mi no gat strong long mekim. 19Na ol pasin mi save mekim em i no ol dispela gutpela pasin mi laik mekim. Nogat. Na ol pasin nogut mi no laik mekim em dispela pasin mi save mekim. 20Na sapos mi mekim pasin mi no laik mekim, orait i no mi i mekim. Nogat. Em i sin i save stap insait long mi i mekim.
21Orait, mi lukim dispela samting i stap. Taim mi laik mekim gutpela pasin, pasin nogut i stap wantaim mi tu. 22Olsem na, mi yet insait long tingting bilong mi, mi save amamas long lo bilong God. 23Tasol mi lukim narapela lo i mekim wok insait long mi. Em i lo bilong sin. Na dispela lo i save kirap na pait wantaim lo bilong God i stap long tingting bilong mi. Em olsem na sin i stap insait long mi i save holim mi. 24Tru tumas, mi man nogut tru! Husat bai helpim mi bilong lusim dispela bodi bilong i dai? 25Givim tenkyu long God! Long rot bilong Jisas Krais, BIKPELA bilong yumi, Em bai helpim. Em olsem na mi yet long tingting bilong mi, mi aninit long lo bilong God. Tasol, insait long olpela bel bilong mi, mi aninit long lo bilong sin.
