Rom

Holi Spirit i stiaim nupela laip.

8

¹Olsem na, nau God i no save daunim manmeri i pas long Krais Jisas. ²Long wanem, Krais Jisas i bin mekim wok, na long dispela rot lo bilong Spirit bilong laip i mekim yumi fri long lo bilong sin na dai. ³Yumi no gat strong long bihainim lo, na long dispela as lo i no kamapim laip long yumi. Tasol samting lo i no inap mekim God yet i mekim. God i salim PIKININI bilong Em yet i kam. Em i kamap man olsem yumi manmeri i mekim sin, na Em i kam bilong mekim wok long sin. Em olsem na long bodi bilong PIKININI bilong Em, God i daunim sin. ⁴God i mekim olsem bai olgeta stretpela pasin bilong lo bai kamap long laip bilong yumi i no laik bihainim pasin bilong olpela bel na i laik bihainim laik bilong Holi Sprit. ⁵Manmeri i wokabaut long laik bilong olpela bel ol i gat strongpela tingting long bihainim laik bilong olpela bel. Tasol manmeri i wokabaut long laik bilong Holi Spirit ol i gat strongpela tingting long bihainim laik bilong Holi Spirit. ⁶Tingting bilong sin manmeri em i tingting bilong i dai. Tasol tingting bilong manmeri Holi Spirit i bosim em i tingting bilong laip na bel isi. ⁷Tingting bilong sin manmeri em i pait long God. Long wanem, em i no laik i stap aninit long lo bilong God, na tu, em i no inap i stap aninit long lo bilong God. ⁸Ol manmeri we olpela bel i save bosim ol, ol i no inap tru long mekim pasin God i save laikim.

⁹Tasol olpela bel i no save bosim yupela. Nogat. Holi Spirit i save bosim yupela, sapos Spirit bilong God i stap long yupela. Na manmeri i no gat Spirit bilong Krais i stap long em, orait em i no bilong Krais. ¹⁰Tasol Krais i stap insait long yupela. Sin i bin wok insait long yupela na long dispela as bodi bilong yupela bai i dai. Tasol God i mekim wok pinis bilong kolim yupela “stretpela man”, na long dispela as Holi Spirit i kamapim laip long yupela. ¹¹God i bin kirapim Jisas long dai, na Spirit bilong dispela God i stap insait long yupela. Em olsem na dispela God i bin kirapim Jisas, Em bai givim laip long bodi bilong dai bilong yupela. Em bai mekim olsem long strong bilong Spirit bilong Em i stap pinis insait long yupela.

Ol samting Jisas i kisim yumi bai kisim.

¹²Ol brata, nau dispela tok mi mekim em i mas holim yumi. Yumi no ken i wokabaut long laik bilong olpela bel. Nogat. ¹³Sapos yupela wokabaut long laik bilong olpela bel yupela bai dai. Tasol sapos long strong bilong Holi Spirit yupela i wok long mekim sin pasin i dai long bodi bilong yupela, orait yupela bai i stap laip. ¹⁴Long wanem, manmeri i save bihainim stia bilong Spirit bilong God em i pikinini bilong God. ¹⁵Olsem na, Holi Spirit Em i no kam long yupela bilong mekim yupela pret gen. Nogat. Holi Spirit Em i Spirit bilong mekim manmeri i kamap pikinini bilong God. Na Em yet i mekim yumi singaut, “Aba! Papa!” ¹⁶Holi Spirit Em i pas wantaim yumi yet na dispela i save soim yumi olsem yumi pikinini bilong God. ¹⁷Na sapos yumi pikinini bilong God, orait ol samting God i laik givim Krais yumi tu bai kisim. Em olsem tasol yumi mas kisim hevi wantaim Krais pastaim, na bihain yumi bai sindaun wantaim Em long glori bilong Em.

Glori bilong bihain.

¹⁸Taim mi tingting long glori God bai soim yumi long bihain, mi save tingim olsem ol hevi nau yumi save pilim em i liklik samting tumas. ¹⁹God i bin wokim ol samting antap na Em i wokim dispela graun, na ol dispela samting i strong long wetim taim we ol pikinini bilong God i kamap ples klia. ^20-21Ol samting antap na ol samting bilong dispela graun ol tu i save pilim hevi bilong sin. Ol i no mekim wanpela rong na kisim dispela hevi. Nogat. God i putim ol dispela samting insait long hevi bilong sin. Tasol ol dispela samting i no inap i stap olsem i go i go. Nogat. Bihain, ol dispela samting bai fri long hevi bilong sin na dai, na ol bai kam insait long glori bilong God wantaim ol pikinini bilong God. ²²Yumi save ol samting bilong antap na ol samting bilong dispela graun i pilim hevi kain olsem meri i pilim hevi taim em i laik karim pikinini. Na ol i pilim dispela hevi i kam i kam long nau. ²³Em i no dispela samting tasol i pilim hevi i go i go. Nogat. Yumi we Holi Spirit i karim sampela kaikai pinis long laip bilong yumi, yumi tu i pilim olsem. Em olsem na yumi save pilim hevi bilong sin na yumi strong long wetim taim we God bai kamapim nupela bodi bilong yumi. Na taim bodi bilong yumi i kamap nupela, em nau yumi kamap pikinini bilong God olgeta. ²⁴Taim God i kisim bek yumi, yumi bin tingting strong long dispela samting God i laik mekim long bihain. Yumi no kisim yet, olsem na yumi tingting strong long ol dispela samting. ²⁵Tasol sapos yumi no kisim yet, orait yumi mas bel isi i stap na wetim ol dispela samting yumi tingting strong long kisim.

²⁶Na tu, Holi Spirit i save helpim yumi. Yumi no gat strong, tasol Em i save helpim. Taim yumi laik prea yumi bai askim God long wanem samting? Yumi no save gut. Tasol Holi Spirit i pilim tru ol hevi bilong yumi, na dispela i dip tumas na i winim toktok, na Em i save karim hevi bilong yumi i go long God. ²⁷God Em i klia long olgeta tingting bilong yumi na Em i klia long tingting bilong Holi Spirit. Olgeta taim Holi Spirit i save bihainim laik bilong God. Olsem na, taim Em i wok long askim God long helpim yumi, orait olgeta askim bilong Em i pas tru long laik bilong God. ²⁸Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em. ²⁹Bipo tru God i save tru long lain bilong Em, na Em i bin makim ol bilong mekim ol i kamap wankain olsem PIKININI bilong Em na bai dispela PIKININI i stap fesbon bilong planti brata. ³⁰Na ol lain God i bin makim, Em i singautim ol. Na ol lain God i singautim, Em i givim stretpela pasin long ol na kolim ol “stretpela man”. Na ol lain God i kolim “stretpela man”, Em i kisim ol i kam insait long glori bilong Em.

Lavim bilong God i no inap pinis.

³¹Orait, nau yumi bai tok wanem? Sapos God i mekim wok bilong helpim yumi, orait husat inap winim yumi? ³²God i no holim bek dispela wanpela PIKININI bilong Em. Nogat. Em i givim Em bilong helpim yumi olgeta. Olsem na, yumi ken i save, God Em i God bilong mekim grasia na Em bai givim ol narapela samting wantaim long yumi. ³³Husat inap kotim ol manmeri God i bin makim? I no gat wanpela man inap mekim. Nogat. Em i God yet i bin givim stretpela pasin long ol na kolim ol “stretpela man”. ³⁴Husat inap daunim ol lain bilong God? I no gat wanpela man inap mekim. Krais Jisas i bin i dai, na tu, Em i kirap gen na kisim laip. Em i stap pinis long han sut bilong God, na Em i save wok long askim God long helpim yumi. ³⁵Husat inap rausim yumi long lavim bilong Krais? Ol kain trabel nabaut i ken i kamap, na ol kain hevi i ken i kamap, na ol kain bagarap i ken i kamap, tasol ol dispela kain samting i no inap tru long rausim yumi long lavim bilong Krais. Nogat. Na kaikai i ken i sot na klos i ken i sot, na samting nogut i ken i kamap, na pait i ken i kamap, tasol ol dispela kain kain samting i no inap tru long rausim yumi long lavim bilong Krais long yumi. ³⁶Dispela kain tok i stap pinis long Buk bilong God, na i tok,

“Bilong Yu yet mipela i save kisim bagarap olgeta taim.
Ol i lukim mipela i olsem sipsip
bilong kilim i dai tasol.”

(Buk Song 44:22)

³⁷Maski wanem kain samting i kamap long yumi Krais i save lavim yumi tru na long dispela as yumi bai winim olgeta kain kain trabel. ³⁸Mi klia pinis long dispela. Wanpela samting i no inap tru long rausim yumi long lavim bilong Krais. Dai na laip i no inap. Ol ensel na ol spirit nogut i no inap. Ol samting bilong nau na ol samting bilong bihain i no inap. Na bikpela strong bilong wanpela samting i no inap. ³⁹Ol samting bilong antap na ol samting bilong daunbilo i no inap. God i save lavim yumi tru na Em i soim yumi lavim bilong Em long wok bilong Krais Jisas BIKPELA bilong yumi. Olsem na, i no gat wanpela samting God i bin wokim inap tru long rausim yumi long dispela bikpela lavim bilong God.