Aposel 5:33-42.
Bilong harim (Audio)
33Orait, taim ol kaunsil i harim dispela tok, ol i belhat nogut tru na ol i laik kilim ol i dai. 34Tasol wanpela man bilong kaunsil, nem bilong em Gamaliel, em i sanap. Em i wanpela Farisi na tisa bilong lo, na ol manmeri i givim biknem long em. Na em i tokim ol long rausim ol aposel i go autsait. 35Na em i tokim ol kaunsil olsem, “Yupela ol man bilong Israel, yupela mas tingting gut pastaim long pasin yupela i laik mekim long ol. 36Long wanem, bipo wanpela man, nem bilong em Teudas, em i bin kirap na em i tingim olsem em i wanpela bikpela man stret, na ol sampela manmeri olsem 400 samting i bihainim em. Ol i bin kilim em i dai na ol man i bihainim em ol i ranawe nabaut na wok bilong em i lus nating. 37Na bihain long dispela man, long taim bilong gavman i kisim nem bilong ol manmeri, narapela man i kirap, nem bilong em Judas bilong distrik Galili. Na em i bin pulim ol sampela manmeri i bihainim em. Na em tu em i dai na ol manmeri i bihainim em ol i ranawe nabaut. 38Em olsem na mi laik tokim yupela olsem, ol dispela man nau yumi holim, orait yumi larim ol i stap. Long wanem, sapos ol man tasol i as bilong dispela samting ol i mekim, orait dispela samting bilong ol bai pinis nating. 39Tasol sapos God Em i as bilong dispela samting bilong ol, orait yupela no inap winim ol. Nogut pasin yupela i mekim i egensim God.” Em olsem na ol i harim tok bilong em. 40Na ol i singautim ol aposel i kam insait gen. Na ol i paitim ol na tambuim ol long autim tok long nem bilong Jisas. Na ol i lusim ol i go. 41Na ol aposel i lusim ol kaunsil na ol i go. Na ol i amamas. Long wanem, God i orait long ol i ken i kisim sem long nem bilong Jisas. 42Na long olgeta de, long tempel na long haus tu haus, ol i no lusim wok bilong skulim na autim tok olsem, Jisas Em i Krais.
Long de Pentikos Pita i bin autim tok long bikpela lain manmeri, na 3000 manmeri, em ol manmeri i trupela manmeri i lotu long God na ol i bilipim promis bilong God long Olpela Testamen, ol i tanim bel na ol i bilipim na trastim Jisas (yumi bin lukim dispela tok long Aposel 2:5 na 2:41). Na Pita i bin tokaut klia olsem, “…dispela Jisas yupela i bin kilim i dai long diwai kros, God yet i mekim Em i stap BIKPELA na i stap Krais tu.” (Aposel 2:36.) Long Olpela Testamen God i bin promis olsem, Krais bai kam. Minim bilong dispela tok “Krais” i olsem, “Man God i makim bilong kisim bek ol manmeri bilong Em” (Jon 1:41 na Jon 4:25-26). Pastaim ol i no tingim olsem Jisas Em i Krais, ol i no tingim olsem Jisas Em i Man God i makim bilong kisim bek ol manmeri bilong Em. Em olsem na taim ol i harim tok Pita i autim, orait ol i pret. Long wanem, ol i bin kilim Jisas i dai.
Na ol i kraiaut long Pita olsem, “Ol brata, bai mipela mekim wanem nau?” Na Pita i tokim ol olsem, “Yupela olgeta wanwan, yupela tanim bel na kisim baptais long nem bilong Jisas Krais na bai God i fogivim sin bilong yupela.” (Aposel 2:38.) (Taim Pita i tok “kisim baptais long nem bilong Jisas Krais” em i minim samting olsem “long ai bilong olgeta manmeri yupela soim olsem nau yupela pas olgeta long Jisas.”)
Em olsem tasol ol bikman na ol lida bilong lotu Juda, em ol man i arestim ol aposel na kotim ol, ol i egensim Jisas i go yet. Ol i no bilip olsem, Jisas Em i Man God i makim bilong kisim bek ol manmeri bilong Em. Ol i no bilip olsem Jisas Em i Krais. Na ol tok Pita i bin autim long de Pentikos, orait ol aposel i autim wankain tok long ol bikman na ol lida man i kotim ol, tasol ol i belhat na ol i les long harim dispela kain tok. God i mekim Jisas i stap BIKPELA na i stap Krais, i stap Man God i makim bilong kisim bek sinmanmeri. Tasol ol bikman bilong lotu Juda ol i tingim olsem Jisas Em i samting nating. Em olsem na ol i belhat long ol aposel i autim tok olsem, na tru tumas ol i laik kilim ol i dai (lukim lain 33).
Na planti bilong ol dispela bikman i kotim ol aposel ol i bilong ol lain Sadyusi (lukim Aposel 5:17). Ol lain Sadyusi ol i bilip olsem, long bihain ol daiman ol i no inap kirap bek gen (lukim Mak 12:18). Em olsem na taim Jisas i dai na Em i kirap bek gen, orait dispela i soim olsem ol Sadyusi ol i rong long bilip bilong ol. Kirap bek bilong Jisas i kapsaitim bilip bilong ol.
Ol Sadyusi ol i strong tumas long holim dispela bilip bilong ol. Long dispela as taim ol aposel i autim tok long Jisas i kirap bek na Em i stap laip, orait ol Sadyusi i belhat nogut tru na ol i laik kilim i dai ol aposel. Ol i no laik senisim bilip bilong ol na bilipim na trastim Jisas. Nogat. Ol i belhat tasol na ol i laik kilim i dai ol aposel, ol i laik sailensim ol aposel.
Yumi mas klia long ol dispela Sadyusi lain. Long ai bilong ol manmeri ol i sanap olsem ol i wokman bilong God. Tasol, long tok bilong ol na long pasin bilong ol, ol i egensim God na ol i birua long God.
Ol brata na sista, yumi mas klia tu long ol sampela manmeri long ples bilong yumi. Yumi no ken i pasim tingting bilong yumi na yumi tingim olsem, sapos ol i wokman bilong misin o long sios, orait ol i stap trupela wokman bilong God na ol i autim trupela tok bilong God. Nogat. Yumi mas yusim het bilong yumi na yumi skelim ol na skelim tok ol i autim.
Long PNG na long olgeta hap bilong dispela graun i gat ol sampela wokman na long ai bilong ol manmeri ol i autim ol misin toktok na ol lotu toktok. Tasol ol i no save bilipim na trastim feitful wok bilong Jisas. Planti taim i gat ol sampela wokman bilong misin na long lotu na ol i no tanim bel na pas olgeta long Man God i makim bilong kisim bek sinmanmeri.
Ol i ken i tok “Yes, yes” long Jisas, tasol ol i no bilipim na trastim Em. Ol i ken i tok “Yes, yes” long Jisas, tasol ol i no bilipim na trastim Jisas Em i Man God i makim bilong kisim bek sinmanmeri. Ol i ken i tok “Yes, yes” long Jisas, tasol ol i no bilipim na trastim God long kisim bek ol long feitful wok bilong Jisas tasol. Nogat. Ol i bilipim na trastim God long kisim bek ol long ol narapela samting. Ol i bilipim na trastim ol narapela samting em i samting God i makim bilong kisim bek sinmanmeri.
Na yumi mas klia long bikpela lotu man Gamaliel (lain 34). Gamaliel em i mekim wanpela trupela tok, tasol dispela i no minim olsem Gamaliel em i trupela wokman bilong God. Gamaliel em i mekim wanpela trupela tok, tasol em i no bilipim na trastim na bihainim Jisas. Nogat. Gamaliel em i wanpela kleva man tasol na em i laik lukautim skin bilong em yet na em i mekim toktok.
Ol bikman bilong kaunsil ol i laik kilim i dai ol aposel. Gamaliel em i gat biknem, na taim em i toktok, orait ol bikman bilong kaunsil ol i rispektim tok bilong em (lain 34).
Gamaliel em i tokim ol long ol i mas tingting gut pastaim long pasin ol i laik mekim long ol aposel (lain 35). Long wanem, nogut ol i mekim pasin bilong egensim God, nogut pasin bilong ol i kirapim God long mekim birua long ol na ol i lukim trabel (lain 39). Gamaliel i mekim trupela tok olsem, “Sapos ol man tasol i as bilong dispela samting ol i mekim (ol samting ol aposel i mekim), orait dispela samting bilong ol bai pinis nating. Tasol sapos God Em i as bilong dispela samting bilong ol, orait yupela no inap winim ol. Nogut pasin yupela i mekim i egensim God.” (Lain 38-39.) Dispela tok i trupela tok, tasol Gamaliel i mekim dispela tok bilong lukautim skin bilong em yet – em i no laik ol bikman bilong kaunsil i mekim sampela pasin na God i birua long ol na em i kisim hevi wantaim ol.
Na Gamaliel i makim 2-pela samting bilong sapotim tok bilong em….
- Lukim lain 36. Teudas em i tingim olsem em i wanpela bikman, na em i kirapim ol sampela tok, na 400 manmeri samting i bihainim em. Tasol taim ol i kilim em i dai (ating ol soldia bilong gavman Rom i kilim em i dai), orait ol dispela 400 manmeri i ranawe, na ol samting Teudas i laik kamapim i lus nating.
- Lukim lain 37. Na wankain samting i kamap long narapela man Judas bilong Galili (dispela Judas em i no bipo disaipel bilong Jisas, nogat, em i narapela man). Na Judas bilong Galili em i bin kirapim ol sampela tok na pulim ol planti manmeri i bihainim em. Na wankain olsem Teudas, ol soldia i kilim em i dai, na ol manmeri i bihainim em ol i ranawe, na samting em i laik kamapim i lus nating.
Na Gamaliel i mekim dispela 2-pela tok bilong soim olsem, sapos ol man tasol i as bilong dispela samting ol aposel i mekim, orait dispela samting bilong ol bai pinis nating (wankain olsem samting Teudas na Judas bilong Galili i mekim na i pinis nating). Tasol sapos God Em i as bilong dispela samting ol aposel i mekim, orait ol man bilong kaunsil ol i no inap winim ol (lain 38-39). Gamaliel i pret olsem, sapos God i pas wantaim ol aposel, na ol bikman bilong kaunsil i kilim ol i dai, orait ol i egensim God, na nogut God i birua long ol na ol i kisim bikpela hevi.
Na Gamaliel em i no minim olsem, sapos God i pas long wok bilong ol aposel, orait em wantaim ol kaunsil ol i ken i lusim pasin nogut bilong ol na bihainim tok bilong ol aposel. Nogat. Gamaliel em i wanbel long paitim na solapim ol aposel, na dispela i soim olsem, em i les tru long bihainim tok bilong ol aposel (lain 40).
Gamaliel em i laik stopim ol aposel long autim tok bilong feitful wok bilong Jisas. Tasol em i pret long kisim hevi long han bilong God. Olsem na, em i stopim ol man bilong kaunsil i kilim ol aposel, tasol em i paitim ol aposel na solapim ol bilong stopim ol long autim tok bilong feitful wok bilong Jisas. Em olsem na pastaim i luk olsem Gamaliel em i gutpela man, tasol nogat.
Ol brata na sista, yumi mas lukaut long ol kain man olsem Gamaliel. Ol i ken i luk olsem ol i gutpela wokman bilong God, tasol ol i no bihainim trupela tok bilong God na ol i egensim rot God i makim bilong kisim bek sinmanmeri. God i kisim bek sinmanmeri long rot bilong feitful wok bilong Jisas wanpela tasol na i no gat narapela rot. Em olsem tasol ol i save makim na bihainim ol narapela rot, na long dispela pasin ol i egensim rot God i makim na ol i egensim Jisas.
Orait, yumi skelim trupela tok Gamaliel i bin mekim. Gamaliel i bin tok olsem,
Sapos ol man tasol i as bilong dispela samting ol aposel i mekim, orait dispela samting bilong ol bai pinis nating. Tasol sapos God Em i as bilong dispela samting ol aposel i mekim, orait dispela samting i no inap feil, i no inap pundaun na pinis nating.
Sapos God i pas long en, em i no inap feil.
Sapos ol aposel ol i wok long kamapim nupela lotu tasol long laik na save bilong ol yet, orait dispela samting bilong ol bai feil na i no inap i stap trupela samting bilong God. Sapos ol aposel i kamapim nupela lotu long laik na save bilong ol yet, orait dispela samting i ken i stap, ol i ken i lotu i stap, tasol dispela lotu samting bilong ol i no trupela lotu bilong God, na long dispela as em i feil samting tasol. God i no pas long en, na em i samting bilong ol man tasol.
Planti taim yumi lukim dispela kain samting long PNG. Yumi lukim ol sampela manmeri i kisim lotu i kam long ples, na ol i wokim haus lotu na kisim ol manmeri i kam na ol i lotu i stap. Tasol, ol i no autim trupela tok bilong God. Ol i no tokaut klia olsem, God i kisim bek sinmanmeri long feitful wok bilong Jisas tasol. Na ol i save makim ol narapela narapela rot, na ol i skulim ol manmeri long
God i ken i kisim bek sinmanmeri long ol dispela rot ol yet i makim. Em olsem na, God i no pas long dispela samting, na dispela samting em i samting bilong ol man tasol, em i samting ol man tasol i kamapim. Ol i ken i lotu i stap, tasol lotu bilong ol em i wanpela feil samting. Lotu bilong ol i no trupela sios bilong God.
Ol man i mekim wok na God i no pas long en, orait dispela wok bai i stap feil samting. Tasol wok God i pas long en, orait tru tumas dispela wok i no inap feil.
Long Buk Aposel yumi lukim stori bilong wok bilong Jisas bihain long kirap bek bilong Em. Pastaim Em i bin lusim laip bilong Em bilong sevim (kisim bek) ol planti planti manmeri. Nau Em i wok long kisim ol dispela manmeri i kam long Em yet na ol i stap manmeri bilong God. Jisas i makim ol aposel, bai ol i witnisim Em, na long dispela rot Jisas i wok long singautim ol manmeri bilong Em i kam long Em yet.
Em olsem na ol aposel ol i autim tok bilong feitful wok bilong Jisas, ol i witnisim Jisas, na Jisas i yusim dispela tok bilong kirapim nupela laip long ol dispela manmeri Em i bin lusim laip bilong Em bilong sevim. Taim Jisas i go bek long heven Em i salim Holi Spirit i kam na Holi Spirit i opim ai na ia na bel bilong ol, bai ol i ken i harim na tanim bel na bilipim na trastim feitful wok bilong Jisas, bai ol i bilipim na trastim God long kisim bek ol long feitful wok bilong Jisas tasol. Ol i save tanim na pas olgeta long Jisas na ol i bihainim Jisas.
Dispela wok bilong Jisas em i stat long Jerusalem, na bihain em i ron i go long Judia na Samaria, na long yia 2020 em i ron i go yet long olgeta hap bilong dispela graun, na i ron i go long PNG. Maski ol sampela lotu i kapsaitim feitful wok bilong Jisas. Maski ol i makim ol narapela rot bilong God i kisim bek sinmanmeri. Maski ol i paulim ol manmeri. Ol dispela samting i no stopim wok bilong Jisas. Nogat. Gutnius bilong feitful wok bilong Jisas i ron i go yet insait long PNG. Jisas i wok yet long singautim ol wanwan manmeri i kam long Em yet, na Holi Spirit i givim laip long ol, bai ol i harim na tanim bel na bilipim na trastim God long kisim bek ol long feitful wok bilong Jisas, na ol i bihainim Jisas na i stap manmeri bilong God long femili bilong God.
Long olgeta yia, long taim bilong ol aposel i kam i kam long yia 2020, i gat planti trabel na hevi i kamap. Na long PNG tu i gat planti trabel na hevi i stap. Tasol, trupela gutnius bilong feitful wok bilong Jisas i stap yet, na Jisas i wok yet long singautim ol lain bilong Em i kam long Em yet. Long wanem, God i pas long dispela samting, na long dispela as wok bilong Jisas i no inap feil. Tru tumas, maski ol sampela lotu i paulim ol manmeri long ol narapela narapela rot, Jisas bai kisim ol manmeri bilong Em i kam long Em yet na ol bai bilipim na trastim Em, ol bai bilipim na trastim God long kisim bek ol long feitful wok bilong Jisas tasol. Na ol bai lavim Jisas na tok tenkyu long Jisas long feitful wok bilong Em bilong sevim ol, na ol bai bihainim Em.
Ol aposel ol i amamas long kisim sem.
Lukim lain 40-42. Gamaliel wantaim ol kaunsil ol i paitim na solapim ol aposel. Tasol ol aposel ol i amamas. Long wanem? “God i orait long ol i ken i kisim sem long nem bilong Jisas.” Sem Jisas i kisim, ol aposel i kisim tu. Sem ol i hipim long Jisas, ol i hipim long ol aposel tu. Jisas Em i BIKPELA na Em i Krais, na ol aposel i amamas long God i orait long ol i serim ol samting bilong BIKPELA Jisas Krais. Ol i serim nupela laip Jisas i kamapim long ol, na ol i amamas long serim sem bilong Jisas tu.
Ol bikman bilong lotu Juda ol i rabisim Jisas long olgeta wok bilong Em na ol i hipim sem long Em. Tasol, ol i no save olsem, God i pas long olgeta wok bilong Jisas, na long dispela as wok bilong Jisas i no inap feil. Ol aposel ol i klia long ol dispela samting, na taim ol i kisim sem wantaim Jisas, orait ol i amamas. God i pas wantaim olgeta wok bilong Jisas, na God i orait long ol aposel i serim sem bilong Jisas.
Ol brata na sista, taim yumi pas long Jisas na yumi bilipim na trastim God long kisim bek yumi long feitful wok bilong Jisas tasol, na ol manmeri i hipim sem long yumi long dispela samting, orait yumi ken i amamas olsem ol aposel. Long wanem, God i orait long yumi serim sem bilong BIKPELA Jisas Krais. Long feitful wok bilong Jisas yumi kisim nupela laip wantaim Em, na wanem sem ol i laik hipim long Jisas, orait yumi ken i amamas long karim dispela sem tu.
Ol aposel ol i no amamas long pen ol i kisim long paitim na solapim bilong ol bikman bilong lotu. Nogat. Ol i amamas long God i orait long ol i serim sem bilong Jisas.
Ol bikman bilong lotu ol i tambuim ol aposel long autim tok bilong feitful wok bilong Jisas. Tasol, long amamas bilong ol, ol aposel ol i no harim tok bilong ol bikman, na ol i autim tok bilong feitful wok bilong Jisas i go moa yet. Long feitful wok bilong Jisas tasol ol aposel i kisim fogivim na nupela laip wantaim Jisas, na ol i amamas long God i orait long ol i pas long sem bilong Jisas tu.
Ol brata na sista, i gutpela tru long yumi kisim wankain tingting olsem ol aposel na yumi amamas long God i orait long yumi kisim sem long nem bilong Jisas. Long nem bilong Jisas, long feitful wok bilong Jisas, God i kisim bek yumi na givim nupela laip long yumi. Na ol manmeri i laik hipim sem long yumi long dispela samting, em i orait. Long wanem, God i orait long yumi serim dispela sem bilong Jisas wantaim Jisas.
Em olsem na maski yumi kros na komplen. Yumi amamas long yumi serim nupela laip wantaim Jisas na yumi amamas long serim sem bilong nupela laip bilong Jisas wantaim.
Em tasol.
