Aposel 2:22-36.
Wanpela rong tingting ol planti manmeri i kisim i olsem, ol i tingim olsem ol i ken i givim baksait long Jisas o givim baksait long tok bilong Jisas na ol i stap yet trupela manmeri bilong God na i stap trupela lotu bilong God. Ol planti manmeri Juda (Israel) i kisim dispela kain tingting. Ol i tingim olsem ol i trupela manmeri bilong God na ol i trupela lotu bilong God, tasol ol i givim baksait long Jisas na ol i givim baksait long tok bilong Jisas. Ol i givim baksait long toktok Jisas i mekim long Em yet, na ol i givim baksait long toktok Jisas i mekim long rot bilong God bilong kisim bek sinmanmeri.
Na sampela manmeri bilong P.N.G. ol i tok olsem, “Jisas i dai long diwai kros bilong tekewe sin bilong mipela.” Em olsem tasol ol i no bilipim na trastim toktok Jisas i mekim. Jisas i tok Em yet Em i rot na i no gat narapela rot God i yusim bilong kisim bek sinmanmeri. Jisas i tok olsem, God i kisim bek sinmanmeri long feitful wok bilong Jisas tasol na God i no inap tru long kisim bek sinmanmeri long narapela rot.
Skelim tok bilong Jisas…. “Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.” (Jon 3:36.) “Tru tumas, Mi tokim yupela: Man i harim tok bilong Mi, na i bilip long God i bin salim Mi i kam, em i gat laip i stap gut oltaim oltaim. Em bai i no gat kot. Nogat. Em i lusim sait bilong i dai na em i kamap insait long laip pinis.” (Jon 5:24.) “Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.” (Jon 14:6.)
Tok bilong Jisas i klia olgeta, God i save kisim bek sinmanmeri long feitful wok bilong Jisas tasol, na Em i no inap kisim bek sinmanmeri long narapela rot. Nogat. Long rot bilong feitful wok bilong Jisas tasol.
Em olsem tasol ol planti manmeri i tingim olsem dispela tok i no tru. Ol i tingim olsem, God i ken i kisim bek ol long baptais bilong ol. Ol i tingim olsem, God i ken i kisim bek ol long pasin bilong ol bilong kaikaim Lordsapa. Ol i tingim olsem, God i ken i kisim bek ol long pasin bilong lukautim de Sabat. Ol i tingim olsem, God i ken i kisim bek ol long ol lotu pasin bilong ol. Ol i tingim olsem, God i ken i kisim bek ol long ol kainkain rot ol yet i makim na bihainim.
Ol planti manmeri i bilipim na trastim ol dispela kain samting ol i tingim olsem, “Mipela trupela manmeri bilong God na mipela trupela lotu bilong God.” Tasol nogat. Long Aposel 2:22-36 Pita i putim ples klia olsem, manmeri i givim baksait long Jisas na i givim baksait long tok bilong Jisas, orait ol i givim baksait long God wantaim. Ol i no trupela manmeri bilong God na ol i no trupela lotu bilong God.
Taim Pita i sanap na autim tok, orait em i autim tok long ol manmeri i pas long lotu bilong ol Juda na ol i strong long bihainim ol samting bilong lotu bilong ol. Long Aposel 2:5 Luk i makim ol olsem, “ol i trupela manmeri bilong lotuim God”. Long wanem, ol i no pilai pilai long bihainim lotu bilong ol.
Na ol dispela “trupela manmeri bilong lotuim God” ol i bilong God trutru o nogat? Pita i tok nogat. Long wanem? Ol i givim baksait long Jisas na ol i no bilipim na trastim tok bilong Jisas. Pita i autim tok long ol na 2-pela taim em i tokaut klia olsem, ol dispela “trupela manmeri bilong lotuim God” ol i kilim Jisas i dai. Lukim Aposel 2:23 na lain 36…. “Na yupela wantaim ol man i save mekim pasin i no stret, yupela i nilim Jisas long diwai kros na kilim Em i dai.” “….olgeta lain Israel ol i mas save gut olsem, dispela Jisas yupela i bin kilim i dai long diwai kros….” Ol dispela “trupela manmeri bilong lotuim God” ol i givim baksait long Jisas na ol i givim baksait long tok bilong Jisas na ol i kilim Jisas i dai.
Ol dispela “trupela manmeri bilong lotuim God” ol i givim baksait long Jisas na givim baksait long tok bilong Jisas na ol i tingim olsem ol i trupela manmeri bilong God. Tasol nogat. Long wanem? God yet i givim namba long Jisas. God yet Em i pas long Jisas. God yet Em i sapotim na wanbel long Jisas. Jisas Em i “Man” God yet i bin makim, Em i bilong God, na sapos ol i givim baksait long Jisas, orait ol i givim baksait long God wantaim.
Tingim. Sapos yu salim wanpela man i kam long haus bilong mi bilong mekim sampela toktok, na mi givim baksait long em na mi givim baksait long tok bilong em, orait i olsem mi givim baksait long yu na mi givim baksait long tok bilong yu. Na wankain olsem, God i salim Jisas i kam long yumi, na sapos yumi givim baksait long Jisas na yumi givim baksait long tok bilong Jisas, orait i olsem yumi givim baksait long God. Em i dispela toktok Pita i tokim ol dispela manmeri, em ol manmeri i tingim olsem ol i manmeri bilong God.
Orait, yumi skelim tok bilong Pita. Pita i makim 5-pela samting God i mekim na i soim olsem, God i givim namba long Jisas, na God Em i pas long Jisas, na God Em i sapotim na wanbel long Jisas. Pita i makim 5-pela samting bilong soim yumi olsem, Jisas Em i “Man” God i bin makim, Jisas Em i bilong God.
1. Jisas i wokim ol sain.
Lukim lain 22. Holim tingting long tok God i mekim long Aisaia (Aisaia 35:4-6). God i tokim Aisaia olsem, taim Mi kam bilong mekim wok bilong kisim bek yupela, orait bai yupela lukim aipas man i lukluk, na iapas man i harim, na lek nogut man i kalap, na mauspas man i toktok. Na taim ol manmeri ol i lukim ol kainkain sain (mirakel) olsem, orait ol i ken i save olsem, samting God i tokaut long en i kamap pinis.
Em olsem na Jisas i no kam ples hait. Nogat. Taim Jisas i kam Em i wokim ol dispela samting wankain stret olsem God i tokim Aisaia. Ol manmeri ol i lukim na ol inap save olsem, samting God i tokaut long en i kamap pinis. Em olsem na ol inap save olsem, Jisas Em i “Man” God i bin makim, Jisas Em i God i kam bilong mekim wok bilong kisim bek sinmanmeri.
Na ol narapela sain tu i stap. Long baptais bilong Jisas God i bikmaus na makim Jisas, na ol planti manmeri ol i harim (Matyu 3:17). Taim Jisas i kisim Pita na Jems na Jon i go antap long wanpela maunten, orait God i tok olsem, “Dispela man Em i Pikinini bilong Mi, na Mi lavim Em. Yupela harim tok bilong Em.” (Mak 9:7.)
Em olsem na long dispela as Pita i tokim ol manmeri olsem, “Yupela save pinis long ol dispela samting.” Ol i lukim na ol i save, tasol ol i pasim tingting na givim baksait long Jisas na givim baksait long tok bilong Jisas.
2. God i bosim na stiaim olgeta samting bilong dai bilong Jisas.
Lukim lain 23 wantaim lain 36. Ol manmeri i harim Pita i autim tok, ol i manmeri i bin pasim ol yet wantaim ol man i save mekim pasin i no stret, em ol lain Rom, na ol i nilim Jisas long diwai kros na kilim Em i dai. Ol i les long Jisas na ol i laik daunim Jisas na semim Jisas. Em olsem na ol i pas wantaim ol Rom bilong kilim Jisas i dai.
Tasol God i onarim Jisas. God i bin givim bikpela lain manmeri long Jisas bai Jisas i lusim laip bilong Em bilong sevim laip bilong ol. Jisas i mekim bikpela wok na God i givim biknem long Jisas na Em i givim namba long Jisas. Jisas Em i BIKPELA. Na Jisas Em i Krais. Krais Em i “Man” God i makim bilong mekim wok bilong sevim sinmanmeri.
God i bin plenim ol dispela samting na long dispela as ol dispela samting i kamap olsem. Long plen bilong God Jisas i dai long diwai kros na Em i kirap bek gen. Long wanem, long plen bilong God, God bai kisim bek sinmanmeri long wok bilong Jisas long diwai kros – sinmanmeri bai kisim laip long wok bilong Jisas tasol.
3. God i lukautim Jisas na kirapim Em long matmat na Em i stap laip.
Lukim lain 24-32. Pita i kisim tok king Devit i bin mekim, tasol Devit em i no tokaut long ol samting bilong em yet. Nogat. Devit em i wanpela profet (lain 29-31) na Em i tokaut long ol samting bilong Jisas. Em olsem na toktok i stap long lain 25-28 em i toktok Jisas i mekim.
Na dispela tok em i diskraibim taim Jisas i wokabaut long rot bilong diwai kros. God i bin promis long lukautim Jisas taim Jisas i kam i dai long diwai kros. Em olsem na Jisas i holim tingting long promis bilong God na Em i tok, “Mi lukim BIKPELA i stap klostu long Mi olgeta taim, Em i stap han sut bilong Mi na Mi no seksek……Yu no inap lusim Mi i stap long ples bilong ol daiman, na Yu no inap larim Holi Man bilong Yu i sting long matmat…..Yu stap wantaim Mi na dispela bai pulimapim Mi long amamas.” God i stap klostu long Jisas, na God i pas wantaim Jisas, na God i kirapim Jisas long matmat. Papa God i lavim Jisas na Em i lukautim Jisas na Jisas i trastim Papa God na Em amamas.
Pita i tok olsem, “…dispela man Jisas, God i kirapim Em pinis na mipela i lukim na witnisim.” (Lain 32.) Jisas Em i Holi Man bilong God, na God i lukautim Jisas olsem Em i bin promis. Jisas i no man nating. Nogat. Jisas Em i dispela Holi Man bilong God. God i pas long Em, God i lavim Em, na Em i lukautim Em.
4. God i givim Holi Spirit i go long han bilong Jisas.
Lukim lain 33. God i givim Holi Spirit i go long han bilong Jisas olsem Em i bin promis. God i givim namba long Jisas bilong Jisas i ken i givim Holi Spirit long ol manmeri Jisas i dai long diwai kros bilong sevim. Jisas i gat namba bilong kapsaitim Holi Spirit long ol man na meri wantaim, long manmeri i gat namba na manmeri nating wantaim, long yangpela manmeri na lapun manmeri wantaim, long pikinini man na pikinini meri wantaim – long olgeta manmeri Jisas i dai long diwai kros bilong sevim.
Na Pita i tokim ol manmeri i harim tok bilong em olsem, “…em i dispela samting nau yupela lukim na harim.” Jisas i kapsaitim Holi Spirit long ol aposel wantaim ol disaipel bilong Jisas, na ol i autim tok bilong ol gutpela wok bilong God long feitful wok bilong Jisas long diwai kros. Ol i autim long ol wanwan tokples bilong ol manmeri, na ol i lukim na harim. Ol manmeri ol i witnisim pawa na namba bilong Jisas.
5. God i givim namba long Jisas na Em i putim olgeta birua aninit long lek bilong Jisas.
Lukim lain 33-36. Devit em i mekim tok profet na em i toktok. Taim Devit i tok, “BIKPELA i tokim BIKPELA bilong mi…” orait em i makim God na Em i makim Jisas. Tok bilong em i olsem, “BIKPELA (God) i tokim BIKPELA (Jisas) bilong mi olsem, Yu sindaun long han sut bilong Mi, na bai Mi winim ol birua bilong Yu na putim ol i stap aninit long lek bilong Yu.” Jisas i kam bihain long Devit, tasol Devit i tok olsem Jisas Em i BIKPELA bilong em. God i givim dispela namba long Jisas. Em olsem na Pita i toksave olsem, “….dispela Jisas yupela i bin kilim i dai long diwai kros, God yet i mekim Em i stap BIKPELA na i stap Krais tu.”
Long Baibel tok “han sut bilong God” i makim namba bilong man i sindaun long en. Na i no gat wanpela man i winim namba bilong man i sindaun long han sut bilong God. Em olsem na Jisas i gat namba i winim namba bilong olgeta man i gat namba. Na God i putim olgeta birua bilong Jisas aninit long lek bilong Em.
Papa God i givim namba long Jisas na Em i mekim Jisas i stap BIKPELA bilong olgeta samting na i winim olgeta samting na i gat pawa bilong olgeta samting. Em olsem na i no gutpela long wanpela man i givim baksait long dispela BIKPELA o givim baksait long tok bilong dispela BIKPELA.
Sapos yu no trastim Jisas, orait yu givim baksait long God.
Taim Pita i sanap na autim tok, orait em i autim tok long ol lotu manmeri. Ol i pas long lotu bilong ol na ol i bihainim ol samting bilong lotu bilong ol. Ol i tingim olsem ol i trupela manmeri bilong lotuim God. Tasol Pita i putim ples klia olsem, ol i givim baksait long God na ol i egensim God na egensim wok bilong God. Long wanem? Ol i givim baksait long Jisas na kilim Em i dai. Manmeri i givim baksait long Jisas na i givim baksait long tok bilong Jisas, orait ol i givim baksait long God wantaim.
Yumi no ken i paul long ol samting bilong lotu. Lotu em i no nambawan samting. Nogat. Jisas na tok bilong Jisas em i nambawan samting. Manmeri i tingim olsem God i ken i kisim bek ol long baptais bilong ol o God i ken i kisim bek ol long Sabat pasin bilong ol o God i ken i kisim bek ol long lotu pasin bilong ol o God i ken i kisim bek ol long ol gutpela pasin bilong ol o God i ken i kisim bek ol long ol kainkain rot ol yet i makim olsem, orait ol dispela manmeri ol i givim baksait long tok bilong Jisas pinis. Na manmeri i givim baksait long tok bilong Jisas, orait ol i givim baksait long Jisas na ol i givim baksait long God wantaim.
Aposel Pol i mekim wankain tok. Lukim Galesia 5:4….
4Sapos yupela i laik bihainim lo na long dispela pasin yupela i laik God i kolim yupela stretpela man (kisim bek yupela), orait yupela i lusim Krais pinis. Yupela i lusim pinis grasia bilong God.
Manmeri i lotu trutru long God, ol i bilipim na trastim God long kisim bek ol long feitful wok bilong Jisas tasol, na ol i stap aninit long bosim bilong Jisas. Ol i bilipim na trastim tok bilong Jisas. Bilipim na trastim bilong ol i olsem, Jisas wanpela Em i rot na i no gat narapela rot, na long feitful wok bilong Jisas tasol ol i ken i stap orait long ai bilong God na kisim laip.
Long P.N.G. ol planti manmeri ol i lotu, na ol i tingim olsem, ol i trupela manmeri bilong lotuim God. Tasol nogat. Long wanem? Ol i givim baksait long tok bilong Jisas na ol i makim ol narapela narapela rot bilong God i kisim bek ol. Long dispela pasin ol i givim baksait long Jisas na ol i givim baksait long God wantaim. Ol i no bilong God. Nogat. Ol i manmeri i egensim God na egensim wok bilong God.
Jisas i salim ol aposel bilong Em i go aut long olgeta 4-kona bilong dispela graun bilong witnisim Em. Long wanem, Jisas wanpela Em i rot bilong God i kisim bek sinmanmeri. Jisas Em i “Holi Man” God i bin makim. Jisas Em i BIKPELA bilong olgeta samting. Na Jisas Em i Krais. Krais Em i Man God i bin makim, na long feitful wok bilong Krais tasol God bai kisim bek sinmanmeri. Olgeta manmeri long olgeta 4-kona bilong dispela graun ol i mas save long Jisas, na ol i mas save olsem God i kisim bek sinmanmeri long feitful wok bilong Jisas tasol.
Ol brata na sista, yu stap olsem wanem? Yu bin sakim tok bilong Jisas na yu bilipim na trastim God long kisim bek yu long rot yu yet i makim o rot misin bilong yu i makim, a? Sapos yu mekim olsem, orait yu mas save olsem, yu lusim Jisas pinis na yu lusim God wantaim.
Ol brata na sista, sapos yu mekim olsem, orait yu tanim bel na yu lusim dispela pasin, na yu harim tok bilong Jisas, na yu bilipim na trastim God long kisim bek yu long feitful wok bilong Jisas tasol. Jisas wanpela Em i rot God i makim bilong kisim bek sinmanmeri. Olsem na yu singaut long BIKPELA, yu askim God long kisim bek yu long feitful wok bilong Jisas, yu bilipim na trastim God long kisim bek yu long feitful wok bilong Jisas, na yu kam na i stap aninit long bosim bilong Jisas. Kam na kisim laip long feitful wok bilong Jisas.
Em tasol.
