Moning.
Mi harim wanpela stori. Wanpela pasta em i kisim bikpela sik na em i prea i go i go long God, bai God i ken i rausim sik na em i ken i stap gut. Em i prea i go i go, tasol sik i stap i go i go yet. God i no rausim sik bilong em. Em olsem na pasta em i bel hat long God na em i tok swea long God na em i lusim bilip bilong em.
Yumi manmeri i bilipim na trastim God long kisim bek yumi long feitful wok bilong Jisas, yumi no ken i mekim pasin olsem dispela man. Yumi trastim God long wokim pasin i gutpela long yumi, maski dispela samting i givim amamas long yumi o em i givim hevi long yumi.
Sampela taim God bai givim pen na hevi long yumi.
Tingim aposel Pol. God i bin givim wanpela hevi long em. Baibel i tok dispela hevi em bilong stopim Pol long mekim bikhet pasin. Lukim 2 Korin 12:7-10.
7God i bin soim mi ol gutpela gutpela samting tru, tasol nogut mi bikhet long dispela samting. Olsem na Em i givim wanpela sik long mi, i olsem nil i sutim bodi bilong mi. Dispela samting i wok olsem wanpela wokboi bilong Satan na i givim bikpela hevi stret long mi. 83-pela taim mi prea long BIKPELA long rausim dispela samting long mi. 9Tasol, Em i tokim mi olsem, “Grasia bilong Mi em i inap bilong yu. Long wanem, strong bilong Mi i ken i wok moa taim strong bilong man i go daun.” Olsem na, mi ken i amamas long ol samting long laip bilong mi i slekim strong bilong mi bikos taim mi no gat strong, strong bilong Krais i ken i stap wantaim mi. 10Long dispela as, bilong litimapim nem bilong Krais, mi amamas taim mi yet mi no gat strong, na ol man i sutim tok nogut long mi, na mi fesim ol kainkain hevi, na ol man i bagarapim mi nating, na mi fesim ol kainkain trabel. Long wanem, taim mi yet mi no gat strong, orait mi save kisim strong bilong Krais.
God i bin soim planti gutpela samting long Pol – em ol samting bilong gutnius na ol samting bilong kingdom bilong God. Tasol nogut Pol i bikhet na i tingim olsem, “Ating mi wanpela strongpela man.”
God i laik Pol i daunim em yet na i klia olsem Krais tasol i bin givim strong long em. God i laik Pol i mas tingting long sin bilong em na hau God i bin mekim grasia long em tasol na sevim em long feitful wok bilong Krais long diwai kros. Em olsem na, God i givim wanpela sik long Pol bilong slekim strong bilong Pol, bai Pol i tingting long strong Krais yet i bin givim em bilong autim tok bilong God.
Na dispela hevi em i gutpela samting bilong Pol. Long wanem, dispela hevi i helpim Pol holim gutpela tingting, na taim em i holim gutpela tingting, orait strong bilong Krais i wok moa insait long laip bilong Pol.
Na tingim dispela – i no wanpela man long ples i wokim posin long Pol na dispela sik i kamap long em. Nogat tru! God tasol i givim sik long Pol bilong mekim gutpela wok insait long laip bilong em – bilong givim gutpela tingting long em – bilong daunim strong bilong em – bai strong bilong Krais i ken i wok moa long laip bilong em.
Taim Pol i apim em yet, orait em i daunim Krais. Tasol taim em i daunim em yet, orait Krais i wok moa yet long laip bilong Pol na Krais i yusim em long mekim gutpela wok moa long kingdom bilong God.
Olsem na, sampela taim yumi ken i askim God long rausim sik bilong yumi o rausim ol raskol long rot bai yumi go fri, tasol sampela taim God i ken i larim sik i stap o larim raskol i stap na Em i yusim dispela samting bilong mekim gutpela wok insait long laip bilong yumi.
Yumi ken i trastim God, long wanem, save bilong God i winim save bilong yumi.
Yumi mas klia olsem, save bilong God i winim save bilong yumi. Na yumi mas trastim Em tasol – Em i laik givim amamas long yumi o Em i laik givim pen wantaim, stil yumi ken i trastim save bilong Em.
God tasol i bosim na kontrolim olgeta samting na Em i mekim olsem bikos Em i gat tingting long mekim gutpela wok insait long laip bilong yumi. God i ken i yusim olgeta samting bilong mekim gutpela wok long yumi. God i gat save na yumi ken i trastim save bilong God.
Eksempel bilong Habakuk.
God i bin tokim Habakuk olsem, wanpela bikpela hevi bai kamap long hauslain bilong Habakuk. Habakuk i harim, na em i mekim dispela toktok long Habakuk 3:16-19….
16Mi harim pinis tok bilong BIKPELA na lewa bilong mi em i pam,
na maus bilong mi em i guria.
Ol bun bilong mi i lus na mi no gat strong,
na lek bilong mi em i guria.
Tasol, mi bai stap na wetim dispela samting nogut i laik kamap long ol i laik bagarapim mipela.
17Sapos ol diwai fik i no karim pikinini,
na ol diwai wain i no karim prut.
Na sapos ol diwai oliv i no karim gut ol kaikai,
na ol gaden i no kamapim kaikai.
Na sapos mipela i no gat sipsip i stap,
na mipela i no gat bulmakau i stap.
18Em i orait, mi bai amamas long BIKPELA.
Na mi bai amamas long dispela God bilong helpim mi.19BIKPELA Bilong Bosim Olgeta Samting Em bai strongim mi.
Em save mekim lek bilong mi i stap strong na mi no ken i pundaun.
Em save strongim mi na litimapim mi.
Habakuk i trastim God tasol, maski wanem kain hevi God i laik kamapim. Maski ol birua i kam distroim olgeta samting, Habakuk i trastim God tasol. Em i no krosim God. Em i no bel hat long God. Nogat. Em i trastim God na Em i askim God long helpim em i stap strong taim dispela hevi i kamap.
Yumi mas trastim God olsem Habakuk na Pol i trastim God. Maski wanem samting i kamap long yumi, askim God long helpim yumi stap strong na bihainim Em i go i go i go olgeta.
Trastim God bikos God i promis olsem Em i bosim na kontrolim olgeta samting bilong mekim gut long olgeta manmeri i lavim Em. God yet i gat gutpela save. Olsem na wanem samting em i laik givim yumi o wokim long yumi, orait yumi trastim Em tasol.
Glenn.
