Moning.
Sapos yu raun insait long PNG na yu bungim ol sampela manmeri na yu sindaun stori wantaim ol na yu toktok wantaim ol long ol samting bilong gutnius bilong God, orait planti bai tok olsem, “Mi save, Jisas i dai long diwai kros long sin bilong mi.”
Na taim yu harim dispela toktok, bai yu tingim olsem, ol i bilipim na trastim Jisas long bel bilong ol. Yu bai tingim olsem, ol i bilipim na trastim God long kisim bek ol long rot bilong feitful wok bilong Jisas long diwai kros.
Tasol, sapos yu stori moa wantaim ol, orait bai yu save olsem, ol i no bilipim na trastim God long kisim bek ol long feitful wok bilong Jisas. Nogat. Ol i tingim olsem, God i ken i kisim bek ol long misin pasin bilong ol, o God i ken i kisim bek ol long ol gutpela wok bilong ol, o God i ken i kisim bek ol long Sabat pasin bilong ol, o God i ken i kisim bek ol long baptais bilong ol, o God i ken i kisim bek ol long Lodsapa bilong ol, o God i ken i kisim bek ol long bilip pasin bilong ol.
Yu save, long maus ol i autim tok olsem, “Jisas i dai long diwai kros long sin bilong mi,” tasol long bel ol i bilipim na trastim ol narapela samting, em ol samting ol yet i save mekim na wokim. Long maus ol i tok, “Jisas i mekim gutpela wok,” tasol long bel ol i tingim wok bilong ol yet i gutpela na God bai kisim bek ol long ol gutpela na naispela wok bilong ol yet.
Em olsem na, ol i no klia olsem, God i kisim bek sin manmeri long rot bilong feitful wok bilong Jisas long diwai kros. Ol i no klia olsem, em i wok bilong Jisas yet i save sevim yumi sin manmeri.
Jisas i tok olsem,
“Mi yet Mi rot, na Mi as bilong Tok i tru, na Mi as bilong laip. I no gat wanpela man inap i go long Papa long narapela rot. Nogat. Long Mi tasol.” Jon 14:6.
Jisas i tok, “Mi yet Mi rot.” Dispela tok i minim olsem, Jisas wanpela Em i rot. Jisas tasol Em i rot. Na bilong kliaim na strongim tok bilong Em Jisas i skruim tok olsem, “I no gat wanpela man i nap i go long Papa long narapela rot. Nogat. Long Mi tasol.” Dispela tok i minim olsem, i no gat narapela rot i stap na bai God i kisim bek sin manmeri. Nogat. Jisas wanpela Em i rot bilong God i kisim bek sin manmeri. Wok bilong Jisas tasol em i rot bilong God i kisim bek sin manmeri olsem yu na mi.
Aposel Pita i klia long tok bilong Jisas na i mekim wankain tok olsem Jisas. Pita i tok olsem,
“Dispela man Jisas, Em i ston yupela ol wokman i bin lusim, tasol nau Em i kamap as ston. Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.” Aposel 4:11-12.
Yumi ken i kisim laip long nem bilong Jisas wanpela tasol. Sin manmeri olsem yu na mi i ken i kisim laip long wok bilong Jisas long diwai kros tasol. God i no makim narapela samting na God i no givim narapela nem na bai yumi sin manmeri i ken i go long Papa na lukim laip. Nogat. Jisas yet. Jisas wanpela tasol.
Na ol dispela toktok i no liklik samting. Harim tok bilong Aposel Pol long buk Galesia.
Sapos yupela i laik bihainim lo na long dispela pasin yupela i laik God i kolim yupela stretpela man, orait yupela i lusim Krais pinis. Yupela i lusim pinis grasia bilong God. Galesia 5:4.
Wok bilong Jisas tasol em i rot bilong God i kisim bek sin manmeri olsem yu na mi.
Manmeri i bihainim ol gutpela pasin bilong lo bilong God na i tingim olsem God bai kolim ol stretpela manmeri na kisim bek ol long ol dispela gutpela pasin ol i mekim, orait ol i no bilong Jisas. Ol i lusim Jisas pinis, maski toktok ol i mekim long maus. Long bel bilong ol na long laip bilong ol, ol i lusim Jisas. Ol i lusim rot. Ol i lusim trupela tok. Ol i lusim laip. (Lukim Jon 14:6 gen.)
Yumi mas tingting gut. Nogut yumi mekim gutpela tok long maus bilong yumi long wok bilong Jisas, tasol long bel bilong yumi, yumi bilipim na trastim ol gutpela wok yumi yet i mekim. Nogut yumi tingim God bai kolim yumi stretpela manmeri na kisim bek yumi long feitful wok bilong yumi yet. Sapos yumi mekim olsem, orait yumi mas save olsem, yumi lusim Jisas pinis na yumi lusim rot pinis na yumi bai lukim pe bilong sin bilong yumi.
Plis, yu na mi wantaim, yumi mas skelim bel bilong yumi na yumi mas putim olgeta bilipim na trastim bilong yumi i go long feitful wok Jisas yet i bin mekim long diwai kros. Wok bilong Jisas em i rot, na God i save kisim bek manmeri i bilipim na trastim feitful wok bilong Jisas trutru long bel bilong ol.
Glenn.
