Taitus
1
1Mi Pol mi raitim dispela pas. Mi wokman bilong God na mi aposel bilong Jisas Krais. Mi stap olsem bilong strongim bilip bilong ol manmeri God i bin makim bilong kisim bek, na bilong strongim save bilong ol long trupela tok. Na trupela tok i save stiaim ol long pasin i holi, 2na i givim hop long ol long kisim laip i stap oltaim oltaim. Bipo tru, taim dispela graun i no kamap yet, God i bin promisim laip. Na God i no save giaman. 3Long rait taim Em i putim tok bilong Em long ol dispela samting long ples klia, na Em i yusim mi bilong autim dispela tok. God Bilong Sevim yumi i bin makim na tokim mi long autim tok bilong Em.
4Mi salim dispela pas long yu Taitus. Long wanpela bilip yu pikinini tru bilong mi.
Papa God wantaim Krais Jisas Bilong Sevim yumi, i ken i mekim grasia long yu na mekim bel isi long yu.
Wanem kain man i ken i kamap elda bilong sios?
5Long dispela as mi bin lusim yu long ailan Krit, bai yu ken i pinisim wok mi bin lusim, na bai yu makim ol elda bilong sios long olgeta taun olsem mi bin tokim yu long mekim. 6Man i ken i kamap elda em mas i stap gutpela man na i no gat wanpela rong i stap we ol manmeri i tok baksait long em, na em i man bilong wanpela meri tasol, na ol pikinini bilong em ol i feitful na i stap gutpela na ol manmeri nabaut ol i no sutim tok olsem, “Ol i pilai nabaut wantaim ol man na meri, na ol i no save harim tok bilong papamama.” 7Lida bilong sios em i wokman bilong lukautim sios bilong God, na long dispela as em mas i stap gutpela man na i no gat wanpela rong i stap we ol manmeri i tok baksait long em. Na em i no man bilong apim em yet, na em i no man bilong bel hat hariap, na em i no pas long ol strongpela dring bilong spak, na em i no man bilong bel hat hariap na solapim narapela manmeri, na em i no man i hangre long kisim planti samting. 8Na em i man i amamas long mekim gutpela long ol manmeri i no wantok bilong em, na em i lavim ol stretpela samting, na em i stiaim gut tingting na pasin bilong em yet, na em i stap stret long olgeta samting, na em i mekim pasin i holi long laip bilong em, na em i strongpela man bilong mekim wok. 9Em i mas holim strong trupela tok em i bin kisim, na bai em i ken i skulim ol manmeri long trupela tok, na bai em i ken i krosim ol manmeri i egensim trupela tok.
10Long wanem, i gat planti manmeri i stap na ol i no save harim tok, na ol i save mekim tok nating, na ol i save giamanim ol manmeri. Ol lain i save katim skin ol i stap olsem. 11Yu mas stopim toktok bilong ol. Long wanem, ol i bagarapim ol wan wan femili. Ol i autim tok i no gutpela tok bilong autim, na ol i mekim olsem bilong kisim planti samting tasol. 12Wanpela man Krit, em i wanpela profet bilong ol Krit yet, em i bin tok olsem, “Ol manmeri Krit, ol i pulap long tok giaman, na ol i manmeri nogut tru olgeta, na ol i tingting tasol long kaikai planti na les nabaut.” 13Em i mekim trupela tok. Olsem na, yu mas krosim ol strong, bai ol i holim bilip i stret olgeta, 14na ol i no ken i pas long ol stori i no tru bilong ol Juda, na ol i no ken i pas long toktok bilong ol manmeri i tanim na lusim trupela tok. 15Olgeta samting em i klin bilong ol manmeri i klin long ai bilong God. Tasol wanpela samting em i no klin bilong ol manmeri i no bilip na i doti long ai bilong God. Long wanem, tingting bilong ol wantaim bel bilong ol i doti pinis. 16Ol i tok olsem, “Mipela save long God.” Tasol pasin ol i mekim i soim olsem ol i givim baksait pinis long God. Laip bilong ol i sting tru, na ol i lain bilong sakim tok, na ol i no fit long mekim wanpela gutpela pasin.
