Moning.
Ating yumi olgeta yumi bin lukim ol kainkain man i autim tok long lotu. Sampela man i save autim tok long ol samting bilong ol misin bilong ol tasol. Na sampela man i save autim tok long tingting na save bilong ol yet. Na sampela man i autim tok long ol kainkain kleva save pasin bilong ol na ol i save mekim ol kainkain so-of bilong ol long ai bilong ol manmeri.
Baibel i tok klia olsem, Tok bilong God i olsem sod ol i sapim long 2-pela sait, na em i ken i sut i go insait tru long bel na laip bilong manmeri. Tok bilong God i olsem sod Holi Spirit i holim na i yusim bilong sutim bel na tingting na laip bilong yumi manmeri bilong dispela graun. Lukim Hebru 4:12 wantaim Efesus 6:17….
12….Tok bilong God em i gat laip, na em i wok strong i stap. Sap bilong em i winim sod i sap long 2-pela sait. Na em i ken i sutim i go insait tru namel long laip na spirit bilong yumi, namel long skru na kru bilong bun wantaim. Em i ken i sutim i go insait tru bilong skelim tingting na laik i stap long bel bilong yumi.
17…. sod bilong Holi Spirit – dispela em i Tok bilong God.
Tok bilong God em i no sod bilong yumi. Tok bilong God em i no strong bilong yumi. Yumi no ken i tingim olsem, taim yumi autim Tok bilong God na yumi yusim ol kainkain kleva save pasin bilong yumi na yumi autim, orait yumi givim sap long Tok bilong God. Nogat tru! Tok bilong God yet i gat sap na taim Holi Spirit i holim na yusim, orait Tok bilong God i sutim i go insait tru long bel na laip bilong manmeri. Tok bilong God yet em i sap, na long han bilong Holi Spirit sap bilong en i ken i sut i go insait stret long bel na tingting bilong sinmanmeri.
Tok bilong God em i no samting nating. Nogat. Em i trupela samting. Na long han bilong Holi Spirit em i ken i katim i go dip insait long bel bilong yumi sinmanmeri. Tok bilong God i gat laip na i wok strong, na long han bilong Holi Spirit em bai painim mak bilong em long bel bilong yumi. Long han bilong Holi Spirit Tok bilong God i save katim bel bilong yumi sinmanmeri.
Lukim tok bilong Pita long Aposel 2:37-41….
37Ol i harim pinis tok Pita i mekim na dispela tok i sutim tru bel bilong ol. Na ol i tokim Pita wantaim ol narapela aposel olsem, “Ol brata, bai mipela i mekim wanem nau?” 38Na Pita i tokim ol, “Yupela olgeta wanwan, yupela tanim bel na kisim baptais long nem bilong Jisas Krais na bai God i fogivim sin bilong yupela, na bai God i givim Holi Spirit long yupela. 39Long wanem, dispela promis em bilong yupela na bilong ol pikinini bilong yupela na bilong ol manmeri i stap longwe, na em bilong olgeta manmeri BIKPELA, God bilong yumi, i singautim i kam long Em yet. 40Na Pita i autim planti tok moa long ol dispela samting, na em i tok strong moa long ol na em i tok, “Yupela tanim bel, nogut yupela i bagarap wantaim ol dispela jeneresen nogut.” 41Em olsem na ol manmeri i harim tru tok bilong Pita ol i kisim baptais. Na long dispela de God i joinim 3000 manmeri wantaim ol manmeri i bilip.
Taim ol manmeri i harim tok aposel Pita i autim, orait dispela tok “i sutim tru bel bilong ol” (lain 37). Yumi no ken i saprais (kirap nogut) long dispela samting. Long wanem, Pita i autim Tok bilong God tasol, na long han bilong Holi Spirit Tok bilong God i sutim tru bel bilong sinmanmeri.
Pita em i autim Tok bilong God bilong Olpela Testamen. Em i autim tok bilong Joel 2:28-32 na em i autim tok bilong Buk Song 16:8-11 na Buk Song 110:1 (lukim Aposel 2:14-36). Na Pita i autim tok Jisas i bin skulim em long en – tok bilong Jisas em i Tok bilong God tu.
Em olsem na Pita em i no autim tok bilong em yet, na em i no autim tok long strong bilong em yet. Nogat. Em i autim Tok bilong God tasol, na Em i autim long strong bilong Holi Spirit. (Lukim Aposel 2:4.)
Holi Spirit i kisim Tok bilong God, tok Pita i autim na eksplenim, na Em i “sutim tru bel bilong ol” manmeri i harim tok Pita i autim. Holi Spirit i sutim tru bel bilong ol 3000 manmeri! Long lain 41 Luk i tok olsem (Luk em i man i raitim Buk Aposel), “Long dispela de God i joinim 3000 manmeri wantaim ol manmeri i bilip.”
Taim Holi Spirit i sutim tru bel bilong ol long trupela Tok bilong God, orait ol dispela 3000 manmeri i kraiaut olsem, “bai mipela i mekim wanem nau?” Holi Spirit i sutim bel bilong ol na ol i klia nau olsem, ol i bin wokim rong taim ol i givim baksait long Jisas na ol i givim baksait long tok bilong Jisas. Ol i klia olsem ol i stap insait long bikpela trabel (kot bilong God) na ol yet i no gat rot bilong abrusim dispela trabel bilong ol. Olsem na ol i kraiaut na askim Pita olsem, “bai mipela i mekim wanem nau?”
Ol brata na sista, mi laik tokim yu olsem, yumi no nidim ol man i save autim tok long tingting na save bilong ol yet. Yumi no nidim ol man i save autim tok long ol samting bilong ol misin bilong ol. Yumi no nidim ol man i autim tok long ol kainkain kleva save pasin bilong ol na ol i save mekim ol kainkain so-of bilong ol long ai bilong ol manmeri. Nogat. Yumi nidim man i autim trupela Tok bilong God na i trastim Holi Spirit i kisim trupela Tok bilong God na i sutim bel bilong sinmanmeri.
Yumi no nidim man i apim em yet bilong autim tok long lotu bilong yumi. Nogat. Yumi nidim man i lavim trupela Tok bilong God na i trastim trupela Tok bilong God na i autim trupela Tok bilong God, na i trastim Holi Spirit long yusim Tok bilong God bilong sutim bel na mekim wok insait long laip bilong yumi manmeri.
God Em i gutpela tumas!
Ol 3000 manmeri i kraiaut olsem, “bai mipela i mekim wanem nau?”. Orait, Pita i bekim askim bilong ol. Lukim lain 38. Pita i tokim ol olsem, “Yupela olgeta wanwan, yupela tanim bel na kisim baptais long nem bilong Jisas Krais na bai God i fogivim sin bilong yupela, na bai God i givim Holi Spirit long yupela.”
Pita i tokim ol long tanim na kam long Jisas na bihainim Jisas. Pita i tokim ol long tanim na kam long rot God yet i bin makim bilong kisim bek sinmanmeri. Pastaim ol dispela 3000 manmeri ol i bin givim baksait long Jisas na ol i givim baksait long tok bilong Jisas. Ol i tingim olsem Jisas Em i no rot God i bin makim bilong kisim bek sinmanmeri. Em olsem na Pita i tokim ol long tanim na lusim dispela tingting bilong ol. Pita i tokim ol long tanim na kam long Jisas na bihainim Jisas na trastim God long kisim bek ol long rot bilong feitful wok bilong Jisas long diwai kros. Na taim ol i mekim olsem, orait ol i kam aninit long fogivim bilong God. God Em i gutpela tumas na Em i fogivim ol.
Na God i ken i fogivim yumi tu long rot bilong feitful wok bilong Jisas. God i ken i kisim bek yumi tu long rot bilong feitful wok bilong Jisas. Sapos yumi tanim bel na yumi lusim ol kainkain rot yumi yet i makim, na yumi kam bilipim na trastim rot God i makim, yumi bilipim na trastim Jisas, yumi bilipim na trastim God long kisim bek yumi long wok bilong Jisas, orait bai yumi sindaun tu aninit long fogivim bilong God.
Glenn.
Sapos yu laik save moa long dispela tok, orait yu lukim Aposel 2:37-41 long Autim Tok long pngbibleresources.org.
