Moning.
Taim yumi prea, orait yumi mas trastim God. Mi no minim olsem, yumi mas trastim God long givim ol samting long yumi olsem yumi askim long Em. Nogat. Mi no tok long dispela samting. Yu save, sampela manmeri i tok olsem, “Taim yu askim God long kisim sampela samting, orait yu mas bilip strong long bel bilong yu bai God i givim dispela samting long yu, na sapos yu bilip strong olsem, orait bai yu kisim ol dispela samting yu laik kisim. Na sapos yu no bilip strong olsem, orait yu no inap kisim.”
Mi tok pinis, mi no tok long dispela kain samting. Nogat. Toktok bilong mi i go long narapela sait olgeta.
Taim yumi prea yumi trastim God long wokim rait disisen long askim bilong yumi.
Sampela taim yu bai askim God long givim sampela samting long yu. Na sampela taim God i ken i givim dispela samting long yu, tasol sampela taim God i no inap givim dispela samting long yu. Na sampela taim Em i ken i givim narapela samting olgeta long yu, samting yu no askim Em long en.
Sampela taim yu ken i askim God long wokim ol sampela samting bilong yu. Na sampela taim God i ken i wokim ol samting olsem yu askim Em na sampela taim Em i no wokim dispela samting olsem yu askim Em. Na sampela taim Em i ken i wokim narapela samting olgeta long yu.
Mi save prea long God i ken i lukautim mi na femili bilong mi taim mipela raun long rot na raun long taun. Mipela askim God long rausim ol raskol na ol i no ken i holim mipela na givim pret long mipela o bagarapim mipela. Na planti taim mipela save raun fri. Tasol sampela taim God i putim ol raskol i stap bilong wetim mipela na ol i hansapim mipela na mekim nogut long mipela. Olsem na, mi tok pinis, sampela taim God i no save mekim ol samting olsem yumi askim Em.
Na dispela i olsem wanem? Yumi ken i kisim wanem tingting long dispela kain samting?
Yumi mas klia olsem, God i no save wok bilong givim olgeta samting yumi askim long Em. Nogat. God i save wok long kamapim ol samting i gutpela tasol – ol samting i gutpela long laip bilong yumi na i gutpela bilong kingdom bilong Em. Long Rom 8:28 i gat dispela toktok i stap….
28…..God i save bosim olgeta samting bilong mekim gut long ol manmeri i lavim Em.
God i save yusim pawa bilong Em bilong mekim gut long ol manmeri i lavim Em. Yu save, God i no tingting long givim ol samting yumi save askim long Em. Nogat. God Em tingting tasol long yusim pawa bilong Em bilong mekim gut long ol manmeri i lavim Em.
God Em i dispela kain God – God Em i God bilong mekim gut long ol lain manmeri bilong Em. God i gat bikpela tingting long wokim ol samting i gutpela long laip bilong ol manmeri i lavim Em na i gutpela bilong kingdom bilong Em. Dispela em i wei bilong God – Em i save bosim na kontrolim olgeta samting bilong kamapim ol gutpela samting long yumi manmeri Em i bin makim na pasim long Krais.
Em olsem na sampela taim yumi askim God long wanpela samting o yumi askim God long wokim sampela samting bilong yumi, tasol God i gat narapela tingting – Em i laik wokim narapela samting long yumi bikos dispela narapela samting i gutpela moa long yumi na i winim ol sampela samting yumi bin askim long Em.
Mi givim wanpela eksempel long yu – bai mi stori long samting i bin kamap long aposel Pol.
Ol birua bilong gutnius ol i arestim Pol na ol i salim em i go long bikpela taun Rom we ol i kalabusim em. Ol i kalabusim em long wanpela haus bilong king Sisar, na ol sikuriti lain bilong Sisar i sikuriti long Pol.
Na planti manmeri i bihainim gutnius Pol i autim ol i tingim olsem, “Pol i stap long kalabus, olsem na, wok bilong God i no inap i stap gut.” Em olsem na ol i prea long God, bai God i ken i lusim Pol long kalabus na gutnius bai ron fri na wok bilong God bai i stap strong. Em olsem na ol i tingim olsem fridom bilong Pol i gutpela bilong Pol na i gutpela bilong wok bilong kingdom bilong God tu.
Tasol God i gat narapela tingting. God i larim Pol i stap long kalabus. Long wanem? God i larim Pol i stap long kalabus bikos God i laik mekim wok i gutpela moa yet. Harim tok bilong Pol long Filipai 1:12-14.
12Ol brata, mi laik bai yupela i save, dispela samting i bin kamap long mi em i no pasim gutnius. Nogat. Em i mekim gutnius i kamap strong. 13Olsem na, olgeta lain soldia bilong lukautim haus bilong Sisar, na olgeta narapela man tu, ol i save pinis olsem, mi stap long kalabus bikos mi pas long Krais. 14Na long dispela samting planti manmeri bilong BIKPELA i kisim strong na ol i raun na autim tok bilong God na ol i no pret nau.
Taim Pol i stap insait long kalabus bilong Sisar, orait em i tokim olgeta manmeri long feitful wok bilong Jisas long diwai kros, na sampela bilong ol i tanim bel na bilipim na trastim na bihainim Jisas. Yu klia? God i no rausim Pol long kalabus, long wanem, God i laik ol sikuriti bilong kalabus i mas harim gutnius bilong Jisas na ol i tanim bel na kam insait long femili bilong God. God i laik Sisar yet i mas harim gutnius!
Na tu, taim ol narapela Kristen brata i lukim dispela wok bilong God long hauslain bilong Sisar, orait dispela i strongim ol na ol i strong moa yet long raun na autim tok bilong God. Ol i no pret moa long ol birua i laik putim ol long kalabus.
Em olsem na God i kamapim ol samting i gutpela moa taim Em i putim Pol long kalabus na Em i larim Pol i stap long kalabus.
Yu save, sampela taim yumi bai askim God long wokim wanpela samting, tasol God bai wokim narapela samting bikos Em i laik wokim sampela samting i gutpela moa bilong yumi na bilong ol lain manmeri bilong Em. Em olsem na, long dispela as, yumi trastim God long wokim rait disisen long olgeta askim bilong yumi.
Taim yumi prea, orait yumi trastim God long ensaim prea bilong yumi long gutpela tingting na gutpela save bilong Em yet. Sampela taim God bai givim ol samting na wokim ol samting olsem yumi askim Em bikos Em i tingim dispela samting i gutpela. Tasol sampela taim Em bai givim na wokim narapela samting olgeta bikos Em i tingim dispela narapela samting i gutpela moa. Tasol wanem samting God i laik givim na wanem samting God i laik wokim, orait yumi pikinini bilong Em, yumi trastim God long wokim olgeta samting long gutpela wei tasol.
Glenn.
