Moning.
Wanpela bikpela samting long tingting bilong yumi i olsem, yumi laik sindaun long gutpela amamas. Amamas em i wanpela bikpela samting stret bilong yumi olgeta manmeri bilong dispela graun. Em olsem na yumi save tingting strong long kisim amamas na yumi wok hat long painim rot bilong kisim amamas.
Na yumi manmeri yumi save makim kainkain rot na yumi tingim olsem yumi bai kisim amamas long dispela rot yumi makim.
- Sampela manmeri i tingim mani bai kamapim amamas. Em olsem na ol i bisi bilong painim rot bilong kisim mani.
- Sampela manmeri i tingim olsem, “Sapos mi kamap bikman, orait mi bai kisim amamas.” Em olsem na ol i wok hat bilong painim rot bilong kamap bikman.
- Sampela manmeri i tingim marit na marit pasin bai kamapim amamas. Em olsem na ol i bisi long painim meri na slip wantaim bilong kisim amamas.
Yumi manmeri yumi bihainim ol kainkain rot olsem, na sampela taim yumi lukim amamas na sampela taim nogat. Sampela taim yumi lukim amamas, tasol amamas i stap liklik taim tasol na i lus gen. Amamas i hat tru long lukim na kisim na holim.
Man i raitim Buk Song 1 em i lukim trupela amamas. Skelim tok bilong em.
1 Man i kisim amamas tru
em i man i no save wokabaut long toktok bilong ol manmeri nogut,
na em i no save sanap long pasin bilong ol sin manmeri,
na em i no save sindaun wantaim ol manmeri i tok bilas long God.
2 Em i save amamas long bihainim ol lo bilong BIKPELA,
na em i save tingim ol lo bilong BIKPELA long san i go tudak.3 Em i olsem wanpela diwai ol i bin planim klostu long wara
na em i save karim kaikai long rait taim bilong em,
na lip bilong em i no save drai.
Olgeta samting em i mekim i save kamap gutpela.
4 Ol manmeri nogut i no olsem. Nogat.
Ol i stap olsem skin bilong wit na win i save rausim i go.5 Em olsem na, ol manmeri nogut ol i no inap winim bikpela kot bilong bihain,
na ol sin manmeri ol i no inap sindaun wantaim ol kongregesen bilong ol stretpela manmeri bilong God,
6 long wanem, BIKPELA i save pinis long wei bilong ol stretpela manmeri bilong Em,
tasol ol manmeri nogut na wei bilong ol bai lus olgeta.
Man i lukim trupela amamas em i man i harim na i bilipim na i trastim na i bihainim God. Em i no pas long ol pasin bilong dispela graun. Nogat. Em i pas long God na em i pas long tok bilong God. Em i no bihainim stia bilong ol manmeri bilong dispela graun. Nogat. Em i bihainim stia bilong tok bilong God.
Na husat i pas tru long God na i pas tru long tok bilong God? Lukim tok i stap long Hebru 1:1-2.
Bipo, long planti taim na long kainkain pasin God i bin tok long ol tumbuna bilong yumi long maus bilong ol profet. Tasol long dispela taim nau, taim bilong ol las de, God i bin tokim yumi long maus bilong Pikinini Man bilong Em. Hebru 1: 1-2.
Manmeri i pas tru long God na i pas tru long tok bilong God, orait em i pas tru long Jisas na em i pas tru long tok bilong Jisas. Na Jisas i tok wanem? Lukim Jon 14: 6.
Mi yet Mi rot, na Mi as bilong Tok i tru, na Mi as bilong laip. I no gat wanpela man inap i go long Papa long narapela rot. Nogat. Long Mi tasol. Jon 14: 6.
Man i kisim amamas tru em i man i pas long Jisas na i bilipim na trastim feitful wok bilong Jisas long diwai kros. Man i kisim trupela amamas em i man i trastim God long kisim bek em long feitful wok bilong Jisas tasol. Em i bilipim na trastim tok bilong Jisas na em i trastim Jisas tasol.
Ol manmeri i bilipim na trastim ol narapela rot, ol manmeri i bihainim stia bilong ol manmeri bilong dispela graun, orait ol i manmeri nogut, na ol i no inap sindaun wantaim ol kongregesen bilong ol stretpela manmeri bilong God. Long wanem? Ol i givim baksait long Jisas, na ol i givim baksait long tok bilong Jisas, na ol i bihainim ol kainkain rot ol manmeri yet i kamapim.
Na husat i stap ol kongregesen bilong ol stretpela manmeri bilong God? Em ol manmeri God yet i stretim long feitful wok bilong Jisas long diwai kros, na ol i trastim God long kisim bek ol long feitful wok bilong Jisas, na ol i pas long Jisas na bihainim Em.
Trupela amamas i kamap long manmeri i bilipim na trastim feitful wok bilong Jisas. Long wanem? Ol i save olsem, ol i sin manmeri, na ol i save olsem, God i no inap kisim bek ol long ol feitful wok bilong ol yet, nogat, God i kisim bek ol long feitful wok bilong Jisas long diwai kros. Ol i save olsem ol i feil manmeri, tasol ol i save tu olsem, God i stretim ol long feitful wok bilong Jisas long diwai kros.
Sapos yu laik kisim trupela amamas, orait yu lusim ol narapela rot na yu bilipim na trastim tok bilong Jisas na bilipim na trastim God long kisim bek yu long feitful wok Jisas i bin mekim long diwai kros. Trastim God long stretim yu long ai bilong Em long feitful wok bilong Jisas tasol.
Glenn.
