Wokman bilong God

Moning.

Yumi save pinis aposel Pol em i wokman bilong God na yumi save pinis long ol sampela tisim bilong em. Tasol, Pol yet em i wanem kain man? Pol em i wanem kain wokman?

Long Efesus 3:1-13 yumi ken i save long Pol, em i wanem kain man na em i wanem kain wokman.

¹Mi Pol, mi kalabusman bilong Krais Jisas. Mi bin mekim wok namel long yupela ol lain Jentail na long dispela as mi stap nau long kalabus.
²Ating yupela harim pinis olsem, God i bin makim mi na Em i givim wok long mi long karim grasia bilong Em i go long yupela. ³Mi tok nau long tok hait God i bin soim mi. Long dispela tok mi raitim liklik hap pinis long yupela. ⁴Taim yupela ritim dispela tok yupela bai klia olsem God i givim gutpela save long mi long dispela tok hait bilong Krais. ⁵God i no putim dispela tok hait long ples klia long ol narapela jeneresen. Nau tasol Holi Spirit i putim dispela tok hait long ples klia long ol holi aposel na profet bilong God. ⁶Na dispela tok hait i olsem, olgeta samting God i promisim ol lain Israel ol lain Jentail tu bai kisim.
Tupela i stap long wanpela bodi tasol na tupela wantaim bai kisim olgeta samting God i bin promisim long wok bilong Krais. Na ol dispela samting i kamap long rot bilong gutnius.
⁷God i bin mekim mi kamap wokman bilong autim dispela gutnius. Em i bin mekim strongpela wok na mekim grasia long mi na Em givim dispela wok long mi. ⁸Namel long ol manmeri bilong God mi yet mi man nating tumas. Tasol God i mekim grasia long mi na Em i givim dispela wok long mi. Na dispela wok i olsem, mi mas karim gutnius i go long ol lain Jentail. Mi mas tokim ol long olgeta gutpela samting Krais i bin mekim. ⁹Mi mas mekim plen bilong dispela tok hait i kamap klia olgeta long olgeta manmeri. God i wokim olgeta samting, na Em i holim dispela tok hait long tingting bilong Em i kam i kam inap long nau. ¹⁰God i mekim olsem bilong ol samting bilong heven i ken i lukim wok Em i mekim long sios na ol i ken i klia olsem, save bilong Em i moa moa yet. ¹¹Ol dispela samting em i plen bilong God bilong oltaim oltaim, na long wok bilong Krais Jisas, BIKPELA bilong yumi, God i kamapim pinis plen bilong Em. ¹²Yumi ken i kam bek long God na yumi no inap sem o pret bikos Krais i bin feitful long mekim wok. ¹³Olsem na, mi laik tokim yupela olsem, yupela no ken i pilim hevi long dispela pen mi karim bilong helpim yupela. Nogat. Dispela pen mi karim em i gutpela samting tru bilong yupela.

Yumi ken i save long 5-pela samting bilong Pol.

• Pol em i orait long kisim pen bilong helpim ol narapela manmeri. Lukim lain 1-2 na lain 12-13.

Ol manmeri Efesus ol i Jentail manmeri na Pol i mekim wok bilong autim tok bilong God namel long ol. Em i autim tok olsem, olgeta samting God i promisim ol lain Israel ol lain Jentail tu bai kisim (lain 6). Feitful wok bilong Jisas i bringim ol wanwan Juda (Israel) manmeri i kam long God, na feitful wok Jisas i bin mekim i bringim ol wanwan Jentail manmeri i kam long God tu, na tupela wantaim bai kisim olgeta blesim bilong God. Long feitful wok bilong Jisas God i bungim tupela wantaim long femili bilong Em.

Ol lain Juda na Israel ol i bel hat long dispela kain toktok, long wanem, ol i tingim olsem ol lain Israel tasol ol i spesol komyuniti femili bilong God. Olsem na, ol i no laik Pol i mekim narapela toktok. Tok Pol i autim, na wok Pol i mekim namel long ol Jentail manmeri i save kapsaitim tok bilong ol lida bilong lotu Juda na Israel.

Long dispela as ol i laik kilim Pol, tasol ol ofisa bilong gavman Rom ol i holim Pol na kalabusim em. Pol em i sitisen bilong Rom na ol lain Rom ol i no inap larim ol Juda manmeri i kilim wanpela sitisen bilong ol. Na tu ol ofisa i lukim trabel i kamap long toktok bilong Pol. Em olsem na ol i kalabusim em na ol i tok, “Mipela yet bai kotim Pol, na em i gat rong o nogat, em i disisen bilong mipela.” (Yu ken skelim ol dispela samting long Aposel sapta 21-28.)

Na yu tingim. Sapos Pol i lusim dispela tok bilong em, orait em i no inap fesim trabel – em i no inap i stap long kalabus. Tasol, em i no tingim skin bilong em yet. Nogat. Em i tingim ol lain Jentail na em i mekim hat wok namel long ol bilong helpim ol save gut tru long wok bilong Krais na hau dispela wok bilong Krais tasol i bringim ol i kam long God na i kam long nupela komyuniti bilong God.

• Pol em i save gut tru long trupela as na minim bilong Tok bilong God. Lukim lain 2-7.

Pol em i no man bilong raun na autim tingting bilong em yet. Nogat tru. Long rot bilong Holi Spirit, God i givim tok long Pol na Pol em i raun na autim dispela tok tasol. Bipo 2-pela tok i hait – tok bilong God i kisim bek sin manmeri long feitful wok bilong Jisas Krais na tok bilong nupela sios komyuniti – dispela 2-pela tok i hait, tasol nau God i putim olgeta wok na plen bilong Em long ples klia long ai bilong Pol na long ai bilong ol narapela aposel na profet.

Na tu, taim ol manmeri i harim dispela tok Pol i autim, ol i klia olsem, dispela tok bilong Pol i trupela tok bilong God. Ol manmeri God i bin makim na pasim long Jisas, taim ol i harim tok bilong Pol, orait ol i save olsem dispela tok bilong em i tru tumas. (Tingim tok i stap long Jon 10:27-28.)

• Pol i save gut tru long gutnius bilong Krais, na em i wok hat bilong autim na serim dispela gutnius long ol narapela manmeri. Lukim lain 7-9.

Pol i kisim save long feitful wok bilong Jisas na hau dispela wok bilong Jisas i save bringim ol kainkain lain manmeri i kam long God na i kam insait long nupela sios komyuniti. Na wanem hap Pol em i go long en, em i no pasim maus na i stap. Nogat. Em i autim na em i serim dispela gutnius bilong Krais. Na taim em i bungim ol narapela manmeri i holim bilip i no stret na i no tru, orait em i no amamasim ol na tok “Yumi olgeta yumi lain bilong God.” Nogat. Em i tokaut klia olsem, “Ai brata, bilip bilong yu i popaia – mi laik tokim yu long trupela wei bilong Krais. Mi laik tokim yu long trupela as na minim bilong feitful wok bilong Krais.”

• Pol em i wanpela bikman, tasol em i no apim em yet, nogat, em save daunim em yet. Lukim lain 7-8.

God i bin makim Pol na mekim em i kamap aposel. Na long dispela samting Pol em inap apim em yet. Tasol em i no mekim olsem. Em i daunim em yet, na em i wok long apim nem na wok bilong Krais tasol.

Pol em i no save putim em yet antap long ol narapela manmeri. Nogat tru. Em i save putim em yet i go daun na em i putim Jisas Krais i go antap. Yu save, Pol em i no laik ol manmeri i bihainim em na litimapim nem bilong em. Nogat tru. Em i laik ol manmeri i bihainim Krais na litimapim nem bilong Krais tasol. Ol trupela wokman bilong God bai mekim olsem. Dispela pasin em i wanpela bikpela mak bilong trupela wokman bilong God.

• Pol, taim em i autim gutnius bilong Krais, orait em i autim bilong givim biknem long God na bilong helpim ol narapela manmeri. Lukim lain 9-13.

Yumi tok pinis olsem, Pol em i no autim gutnius bilong Krais bilong apim em yet long ai bilong ol manmeri. Nogat. Orait, long wanem as Pol i autim gutnius bilong Krais? Tupela samting….

1. Pol i autim gutnius bilong Krais bilong givim biknem long God, na
2. Pol i autim gutnius bilong Krais bilong helpim ol narapela manmeri.

Pol em i no tingting long pulim mani. Pol em i no tingting long pulim ol manmeri i kam long “misin” bilong em. Pol em i no autim toktok bai ol manmeri i ken i kisim gutpela tingting long em yet. Pol em i no autim tok bilong Krais bai em i ken i stap bikman namel long ol manmeri. Nogat tru. Em i autim gutnius bilong feitful wok bilong Jisas bilong givim biknem long God na bilong helpim ol narapela manmeri i kisim laip.

Em i laik ol manmeri ol i mas save long feitful wok Jisas i bin mekim bilong bringim sin manmeri i kam long God na i kam long nupela sios komyuniti. Em i tingim ol narapela manmeri – em i no selfis na tingim em yet.

Na taim ol ensel bilong heven ol i lukim olgeta wok God i mekim bilong kisim bek sin manmeri long feitful wok bilong Jisas na bilong bungim ol long nupela komyuniti bilong God, orait ol i save tanim het na givim biknem long God long heven. (Lukim lain 10.)

Ol ensel ol i no inap givim biknem long Pol. Nogat tru! Tingim – i no Pol i bringim ol kainkain sin manmeri i kam long God. Nogat. Em i wok God i mekim long feitful wok bilong Jisas long diwai kros i bin bringim ol i kam long God na i kam insait long sios femili bilong God. Olsem na, ol i litimapim nem bilong God tasol na nem bilong wokman nogat.

Gutpela wokman bilong God bai wok bilong givim biknem long God na bilong helpim ol narapela manmeri save long wei bilong Krais.

Glenn.