Moning.
Long Hebru 4:12-13 i gat dispela tok i stap….
12 Long wanem, tok bilong God em i gat laip na em i bisi long mekim wok, na sap bilong em i winim sod i gat 2-pela sap, na em i sutim i go insait tru bilong katim na skelim laip na bodi, na katim na skelim skru na kru bilong bun, na em i skelim tingting na laik i stap long bel. 13 Na i no gat wanpela samting God i bin wokim i hait long ai bilong God. Nogat tru. Olgeta samting i stap ples klia long ai bilong Em, na long kot bilong dispela God bai yumi sanap. Hebru 4:12-13.
Na dispela tok i ken i pretim yumi. Long wanem, dispela tok i tokim yumi olsem, God i save long olgeta samting bilong yumi. Wanpela samting bilong yumi i no hait long ai bilong God. Wanpela samting long tingting na long bel bilong yumi i no hait long ai bilong God. Em olsem na, wanpela sin na wanpela tingting nogut i no save hait long ai bilong God. Nogat. Wanpela samting i no hait long ai bilong God, olsem na taim God i toktok, orait Em i no inap abrusim wanpela samting. Long dispela as Tok bilong God i save katim dip tru long laip bilong yumi. (Man i raitim buk Hebru i yusim tok piksa toktok bilong soim hau Tok bilong God i save sutim bel bilong yumi olsem sod i katim bodi.)
Skelim bilong God
Yumi klia pinis olsem, God i save lukim olgeta sin i stap long tingting na long bel bilong yumi. Na yumi klia long skelim bilong God. Long Rom 3:10-12 God i tokaut klia olsem….
“I no gat wanpela manmeri i stretpela, nogat tru. 11 I no gat wanpela manmeri i gat gutpela tingting, na i no gat wanpela manmeri i save bihainim God. 12 Olgeta manmeri ol i bin givim baksait long God, olsem na, olgeta i kamap manmeri nogut. I no gat wanpela manmeri i save mekim gutpela pasin. Tru, i no gat wanpela.” Rom 3:10-12.
Tasol, olgeta taim yumi save haitim sin bilong yumi long ai bilong God. Yumi no inap haitim, tasol long tingting bilong yumi, yumi tingting long haitim sin bilong yumi long ai bilong God. Em olsem na taim yumi prea, orait yumi no save autim olgeta sin bilong yumi long God. Nogat. Yumi save autim sin yumi tingim olsem i orait liklik na i no bikpela tumas. Na sin yumi tingim olsem em i bikpela tumas, orait yumi sem na pret na yumi no inap autim long God.
Promis bilong God
Long 1 Jon 1:9 i gat wanpela gutpela promis bilong God i stap….
9 Sapos yumi konfesim sin bilong yumi, God Em i feitful na tru na Em bai fogivim olgeta sin bilong yumi. Em bai rausim ol pasin nogut bilong yumi na mekim yumi klin. 1 Jon 1:9
God i mekim gutpela promis long yumi i bilipim na trastim feitful wok bilong Jisas long diwai kros, tasol olsem wanem yumi pret long konfesim na autim olgeta sin bilong yumi long God? Olsem wanem yumi pret long Em na yumi traim na haitim ol sampela sin bilong yumi long ai bilong Em?
Planti manmeri ol i pret, long wanem, ol i no save long God na ol i no bilipim na trastim rot God yet i bin makim bilong fogivim na kisim bek sinmanmeri. Ol i tingim olsem, God i kisim bek sinmanmeri long wok bilong ol yet. Em olsem na ol i wok long stretim laip bilong ol, bai God i fogivim na kisim bek ol. Na taim ol i skelim bel bilong ol yet na ol i lukim planti sin i stap yet, orait ol i pret na ol i traim na haitim long ai bilong God. Long wanem, ol i pret God bai lukim na Em bai lusim ol.
Tasol yumi i bilipim na trastim God long fogivim na kisim bek yumi long feitful wok bilong Jisas long diwai kros, yumi tu yumi save traim na haitim sin bilong yumi long ai bilong God. Long wanem, yumi tingim olsem, “Sapos God i lukim olgeta sin bilong mi, orait Em i ken i les long mi na lusim mi.” Yumi save olsem, sin bilong yumi i bikpela tru, na yumi wariwari na yumi pret yet long God i lusim yumi.
God i no olsem ol manmeri bilong dispela graun.
Yumi mas klia olsem, God i no olsem yumi manmeri bilong dispela graun. Nogat. God Em i gutpela na Em i stretpela na Em bai bihainim promis bilong Em.
God i wokim rot long feitful wok bilong Jisas long diwai kros bilong tekewe olgeta pe bilong olgeta sin bilong yumi i bilipim na trastim feitful wok bilong Jisas. God i ken i fogivim yumi na kisim bek yumi bikos Jisas i bin kisim pe pinis long olgeta sin bilong yumi. Taim Jisas i dai long diwai kros, orait Em i pinisim pinis pe bilong sin bilong yumi i bilipim na trastim na bihainim Em. Wok bilong Jisas i opim rot bilong God i fogivim na kisim bek yumi.
Tasol ol promis bilong God i sanap long God yet. God Em i wanem kain God? God Em i gutpela na Em i stretpela, na long dispela as God bai bihainim tru ol promis bilong Em. Na God Em i God bilong lavim na Em i God bilong fogivim na kisim bek ol sinmanmeri bilong Em, na long dispela as God Em i amamas long fogivim na kisim bek yumi long feitful wok bilong Jisas. God Em i wanbel nating long fogivim na kisim bek yumi long feitful wok bilong Jisas long diwai kros. God Em i kain God olsem.
Long dispela as yumi no ken i pret long konfesim na autim olgeta sin bilong yumi long God. Long wanem, “God Em i feitful na tru na Em bai fogivim olgeta sin bilong yumi. Em bai rausim ol pasin nogut bilong yumi na mekim yumi klin.”
Na tru tumas, taim yu konfesim na autim olgeta sin bilong yu long God, orait bai yu save olsem God Em i gutpela tumas, na sem na pret bai lusim yu, na bai yu kisim amamas na bel isi long bel bilong yu.
Glenn.
